Премиерката на Нов Зеланд, Џасинда Ардерн, објави дека најголемиот град во земјата, Окленд, ќе биде затворен една недела поради појава на коронавирус од непознато потекло.

Окленд ќе биде во карантин од недела, откако во градот беше регистриран случај на коронавирус од непознато потекло.

Во остатокот од Нов Зеланд ќе биде на сила вториот степен на ограничувања, што, меѓу другото, значи и забрана за собирање, рече Ардерн.

Во средината на февруари, скоро два милиони жители на Окленд беа ставени во ненадејна тридневна блокада откако кај тричлено семејство беше регистриран британскиот вид на Ковид-19.

Во САД следниот месец ќе почнат испитувања на вакцина развиена од лабораторијата „Модерна“ против јужноафриканската варијанта на коронавирус.

Како што најави водечкиот епидемиолог во САД, Ентони Фаучи, испитувањата од првата фаза ќе почнат наскоро, а засега нема да се проучува ефикасноста, туку само безбедноста и имуногеноста на производот.

Тоа значи дека на тест ќе биде ставена способноста на вакцината да предизвика имунолошка реакција.

Првата фаза ќе се спроведе на мал број луѓе.

Повеќе од 400 осуденици избегаа од затворот на Хаити, недалеку од главниот град Порт-о-Пренс.

Во извештајот на локалните власти се наведува дека 25 лица загинале за време на масовното бегство од затворот Круа ле Буке.

Меѓу нив се и директорот на таа институција и случајни минувачи кои биле во центарот на инцидентот, пренесува Би-би-си.

Меѓу загинатите е и моќниот шеф на подземјето, Арнел Жозеф, кој настрада кога се појави на мотор на контролен пункт неколку часа по бегството.