Во неколку кинески региони, вклучително и во југозападниот град Чонгкинг, кој има статус на провинција, биле измерени над 40 степени Целзиусови, а државната опсерваторија ги потсетува жителите дека црвеното предупредување за екстремна топлина сè уште е на сила во поголем дел од земјата.

Метеоролозите изјавиле дека источната провинција Жеџијанг, област со многу фабрики, го соборила својот претходен топлотен рекорд оваа година кога 31 последователен ден температурата била над 35 , а 16 дена беше над 38 степени.

Освен во градот и провинцијата Чонгкинг, каде во саботата биле забележани 42,1 степени, температурите надминале 35 степени и во провинциите и регионите Хубеи, Хунан, Шандонг, Анхуи, Ксинџијанг, Џиангкси и Фуџијан.

Се чинеше дека бурата со грмотевици го спаси Шангај од саботните 40,9 степени Целзиусови, но и покрај тоа, повеќето од 25-те милиони жители на овој кинески трговски центар се пожалија на здравствени проблеми поради топлотниот бран.

„Како да сте на параброд, навистина е жешко“, кажал 70-годишниот жител на Шангај, Шен Фенгминг. „Не мора да се движите надвор за добро да се испотите“.

Во саботата, Шангајската метеоролошка опсерваторија извести дека градот 40 дена годинава забележал температура повисока од 40 Целзиусови степени, а врвот е достигнат денеска со дури 40,9 степени.

Минатата недела кинеската метеоролошка управа предупреди дека просечните температури во земјата се зголемиле многу побрзо од глобалниот просек во последните 70 години и ќе останат значително повисоки во иднина поради климатските промени.

Невообичаено високи температури го зафатија поголемиот дел од Европа.

Франција, Шпанија и Португалија се опустошени од големи шумски пожари, а делови од Англија оваа година се соочуваат со голема суша. Серијата топлотни бранови ги потврдуваат предупредувањата на научниците дека светот се соочува со последиците од климатските промени.

По масовното угинување на рибите во реката Одра, лабораториските испитувања на водата покажаа дека е констатирано високо ниво на соленост, но дека не е пронајдена жива, соопшти денеска полското Министерство за заштита на животната средина.

Полското Министерство за води во четвртокот соопшти дека околу 10 тони мртви риби биле извадени од реката, а стотици доброволци сè уште помагаат во отстранувањето на мртвите риби.

Полската министерка за клима и животна средина, Ана Москва, рече дека анализите на примероците на реката Одра земени од Полска и Германија покажале зголемено ниво на соленост, а деталната токсикологија допрва треба да биде завршена, пренесе „АП“.

Москва додаде дека резултатите од досега земените примероци од Германија не покажале големо присуство на жива.

Одра потекува во близина на чешкиот град Оломоуц и поминува низ Полска и Германија пред да се влее во Балтичкото Море, а долга е 854 километри.

Полскиот премиер Матеуш Моравјецки денеска вети дека ќе направи се за да го спречи уништувањето на животната средина, а полското МВР понуди награда од 200.000 евра за секој кој ќе помогне во откривањето на одговорните за загадувањето на реката.

Едно лице загина, а најмалку 17 се повредени кога силниот ветер урна дел од структурата на сцената на музички фестивал во источна Шпанија, соопштија регионалните служби за итни случаи.

Несреќата се случила во раните утрински часови на големиот фестивал на електронска музика „Медуза“, кој започна во петокот и беше планирано да трае шест дена во градот Кулера на источниот брег, јужно од Валенсија, пренесува „Ројтерс“.

Околу четири часот утринава силните налети на ветерот донесоа делови од градбата врз присутните, а падна и голема табла на влезот.

El escenario se viene abajo #medusa #medusafestival pic.twitter.com/mMSJwxFhCz

— Guille (@Guillealbang) August 13, 2022

28 годишен млад маж починал како последица од паѓање на делови од конструкцијата, а најмалку 17 лица се повредени, од кои тројца со тешки трауми, објавија на Твитер регионалните служби за итни случаи.

Организаторите на фестивалот соопштија дека, заради безбедност на посетителите, настанот е откажан поради лошите временски услови.