Германија викендов е домаќин на клучни дипломатски разговори за можен прекин на огнот во Украина, на кои учествуваат американски и украински делегации. Разговорите претходат на самитот што во понеделник ќе се одржи во Берлин со европски лидери и украинскиот претседател Володимир Зеленски, потврди германски функционер.

Од Вашингтон беше потврдено дека американскиот пратеник Стив Виткоф и зетот на претседателот Доналд Трамп, Џаред Кушнер, пристигнале во Германија, што се толкува како сигнал дека САД гледаат можност за напредок во мировниот процес.

Во понеделник, германскиот канцелар Фридрих Мерц ќе биде домаќин на самит со Зеленски и европски лидери. Средбата се одржува во услови на засилен притисок врз Киев да го прифати мировниот план на Вашингтон, кој, според нацртите, вклучува територијални отстапки, откажување од членство во НАТО и ограничувања на украинските вооружени сили.

Велика Британија, Франција и Германија во изминатите недели работат на измени на американските предлози.

Фото: pexels

Чешка нема да дава никакви гаранции за финансирање на Украина, изјави новиот чешки премиер Андреј Бабиш, кој ќе ја преземе функцијата во понеделник, додавајќи дека Европската комисија мора да најде алтернативни начини за поддршка на земјата.

Европските лидери следната недела ќе разговараат за сложената шема за заем за Украина што ќе користи замрзнати руски средства, но ќе вклучува и национални гаранции.

„Нема да земаме гаранции за ништо, ниту ќе инвестираме никакви пари“, рече Бабиш, според видео од изјавата објавена на социјалните мрежи.

Сите земји-членки на ЕУ, освен две, во петокот преку писмена постапка ја одобрија одлуката за трајно замрзнување на руските средства, што е клучен предуслов за одобрување на заем за репарација за Украина.

Ова е клучен дел од предлогот на Европската комисија за користење на замрзнатите руски средства како основа за репарациски заем за Украина.

Фото: depositphotos

Украина можела да ја избегне ескалацијата на конфликтот со Русија во 2022 година доколку навреме се откажела од амбициите за членство во НАТО и прогласела неутралност, изјави поранешна советничка во администрацијата на американскиот претседател Џо Бајден.

Аманда Слоут, поранешна виша директорка за Европа во Советот за национална безбедност на САД, ова го изјавила во разговор со руските комичари и „пранкстери“ Вован и Лексус, кои се претставиле како советници на украинскиот претседател Володимир Зеленски.

Според објавените снимки, Слоут изјавила дека доколку Украина во 2021 година или на почетокот на 2022 година прогласела неутралност и се откажела од членство во НАТО, тоа „сигурно ќе го спречело разорувањето и загубата на животи“ и можело да ја спречи војната. Таа додала дека, три години по почетокот на конфликтот, останува прашањето дали било подобро тоа да се реши пред војната или за време на разговорите во Истанбул во 2022 година.

„Во една алтернативна историја, да – Украина можела во јануари 2022 година да соопшти дека нема да влезе во НАТО или да постигне договор во Истанбул по почетокот на војната. Во тој период во САД се водеше дебата и се веруваше дека Украина ќе успее во контраофанзивата, ќе врати дел од територијата и ќе избори поповолен мировен договор“, изјавила Слоут.

Истовремено, таа нагласила дека ѝ било непријатно од идејата САД активно да ја поттикнуваат Украина на таков чекор, бидејќи тоа, според неа, би значело „премолчено признавање на одредена руска сфера на влијание или право на вето“ врз украинските аспирации за членство во НАТО.

Високиот руски преговарач Кирил Дмитријев ги коментираше изјавите на Слоут, оценувајќи дека, како што рече, „длабоката држава“ на Бајден ја испровоцирала војната која можела да биде избегната.

Разговорите со поранешни функционери на Советот за национална безбедност се дел од серија снимки што Вован и Лексус ги објавуваат со години, претставувајќи се како високи политички функционери, а кои во повеќе наврати предизвикале дипломатски и политички реакции. Најчесто нивна цел биле западни политичари и критичари на Русија.