Францускиот претседател Емануел Макрон им рече на своите колеги од Европската Унија дека Франција ќе ги направи ПЦР-тестовите задолжителни за сите патници во Франција, вклучително и другите земји на ЕУ, соопшти кабинетот на Макрон.

Прекуграничните работници и копнениот транспорт ќе бидат ослободени од таа обврска, додаде француското претседателство, пренесува „Ројтерс“.

Тестот ќе треба да се изврши најдоцна 72 часа пред поаѓањето, беше речено по видеосамитот на лидерите на ЕУ, што се одржа во четвртокот.

Шпанија објави рекордни 44.357 нови инфекции со коронавирус за еден ден. Во претходните 24 часа 404 лица починаа од коронавирус во Шпанија, со што бројот на смртни случаи од инфекцијата достигна 55.000.

Просечниот број на заразени во последните 14 дена денес се зголеми на 796 од вчерашните 736 на 100.000 жители. Во Шпанија 36 проценти од креветите моментно се зафатени во единиците за интензивна нега, а во регионите Ла Риоха и Валенсија повеќе од 50 проценти. Инфекцијата е потврдена кај 2,5 милиона Шпанци, со што оваа земја е на седмата позиција во светот.

Земјите членки на ЕУ се согласија за зајакнување на употребата на брзи антиген-тестови и за меѓусебно признавање на резултатите од тестот на Ковид-19, објави Советот на ЕУ.

Советот наведува дека употребата на брзи тестови и меѓусебно препознавање на резултатите од тестовите на Ковид-19 во ЕУ се од суштинско значење за ублажување на ширењето на вирусот, како и за придонес кон непречено функционирање на внатрешниот пазар и олеснување на прекуграничното движење и лекување.

„Клучните компоненти на оваа препорака вклучуваат валидација и меѓусебно признавање на брзи антиген-тестови и RT-PCR-тестови меѓу земјите членки, размена на стандардизиран сет на податоци, изработка на заеднички список на брзи тестови на Ковид-19 и одредување приоритет за употреба на таквите тестови, се наведува во соопштението на Советот на ЕУ.

Препораката исто така вклучува одредби што се однесуваат на предизвиците на еволутивната пандемија, односно дека заедничката листа на соодветни брзи тестови на Ковид-19 треба да биде доволно флексибилна за да се додадат или отстранат оние тестови врз чија ефикасност влијаат мутациите на вирусот.