Домородната заедница од Канада соопшти дека пронашла стотици необележани гробови на место на некогашен интернат на католичката црквата во провинцијата Саскачеван.

„Суверената автохтона федерација на Првите нации“ соопшти дека откритието на гробовите е „досега најзначајно во Канада“.

Заедницата во Ковесес е една од неколкуте таканаречени „Први нации“, како што се нарекува домородното население во Канада, потомци на Инуитите и Мерисите.

Кадмус Делорм, раководител на домородната заедница, изјави дека останките на 751 лице се пронајдени во необележани гробови во задниот двор на интернатот во регионот Саскачеван.

„Ова не е масовна гробница, ова се необележани гробови“, рече Делорм.

Според официјалните канадски податоци, интернатот работел од 1899 до 1997 година, на околу 140 километри источно од главниот град Регина.

Новите гробници се откриени со површински радарски скенери, што како истраги се почнати во 139 училишта низ целата земја, откако кон крајот на мај беа пронајдени останки на 215 деца, некои на возраст од три години, кои биле закопани на местото на некогашно училиште за домородни деца во Камлоупс, Канада.

Училиштата главно ги воделе христијански цркви во име на државната влада, од 1840 па се до 90-тите години на минатиот век.

Повеќето од овие деца, присилно одземени од нивните семејства и сместени во црковните интернати, (се претпоставува дека биле над 150.000 староседелски деца) биле изложени на физичко, сексуално и психолошко насилство.

Премиерот Џастин Трудо изјави дека е многу тажен поради новото откритие во интернатот „Маривал Индијан“.

Тој рече дека домородците кои претрпеле болка и траума се одговорност што Канада мора да ја сноси.

Канадската комисија за вистина и помирување, која објави извештај дека „училишниот систем на интернати придонел за културен геноцид“, соопшти дека гробиштата останале на местото на училиштето „Маривал“ по уништувањето на училишната зграда.

Од ораганизацијата на домородците велат дека се во контакт со локалната католичка надбискупија, па Делром вели дека е оптимист и верува дека ќе им биде дозволен пристап до архивите за да ги идентификуваат остатоците.

„Имаме верба во Католичката црква дека ќе ни овозможи пристап. Тие не ни рекоа ‘не’. Само сè уште немаме податоци“, додаде тој.

Претставник на ОН денеска изјави дека е можно околу 300 мигранти да се удавиле откако нивниот брод се превртел во близина на брегот на Јемен, што укажува на ризиците од миграција од Рогот на Африка кон богатите заливски земји во потрага по работа.

Претставникот на ОН и хуманитарен координатор Дејвид Гресли изјави дека мигрантската криза создава уште поголем притисок во веќе опасната ситуација во Јемен, што доведе до хуманитарни проблеми, објави „Ројтерс“.

На почетокот на овој месец, голем број тела се појавија на брегот Рас ал-Арах во Црвеното Море кај Јемен, откако нивниот брод се превртел на отворено море.

Шефот на руската делегација во преговорите за безбедност и контрола на оружјето во Виена, Константин Гаврилов, ја предупреди Велика Британија дека следниот пат Русија ќе фрли бомби на целта, наместо да испука предупредувачки истрели кон британскиот уништувач ХМС Дифендер кој, според рускуте власти, запловил во Црното Море и руските територијални води.

„Невозможно е да се скрие огорченоста поради објавата на Министерството за одбрана на Велика Британија, во која се наведува дека уништувачот наводно случајно поминал низ ‘украинските територијални води’. Морам да го предупредам поранешниот ‘морски владетел’ дека следниот пат, ако го повторат ова, бомбите ќе паѓаат не покрај, туку на целта“, изјавил Гаврилов, а пренесува агенцијата ТАСС.

Руското Министерство за одбрана во средата соопшти дека Федералната поморска гранична контрола „го запрела упадот на британскиот брод ХМС Дифендер, на руска територија во близина на Крим“.

Се наведува дека британскиот уништувач влегол во руските територијални води три километри, а крајбрежен руски воен брод испукал предупредувачки истрели, откако претходно авион „сухој-24М“ фрлил неколку бомби покрај уништувачот, кој потоа ја напуштил руската територија.

Официјален Лондон, вчера негираше дека имало инцидент, но руското министерство објави видео во кое наводно се гледа моментот кога руските сили го потиснале британскиот борбен брод.

Москва прашањето во врска со овој инцидент ќе го покрене во ОБСЕ, изјави денеска за новинарите постојаниот руски претставник во таа организација, Александар Лукашевич.

„Секако дека ќе го сториме тоа“, рече Лукашевич, одговарајќи на прашање во врска со инцидентот, пренесе TАСС. „Тоа дури и ќе биде во неколку формати“, додаде тој.