Кина планира 40 проценти од своето население да вакцинира против коронавирус до крајот на јуни, изјави експертот за респираторни заболувања Џонг Наншан.

Тоа значи дека до јуни ќе бидат вакцинирани 548 милиони луѓе во Кина, која има 1,4 милијарда жители, објаснува „Си-ен-ен“.

Кина досега вакцинираше 3,56 проценти од своето население, што е околу 51 милион луѓе, додаде Џонг.

Министерството за здравство на Саудиска Арабија објави дека муслиманите кои сакаат да го извршат годишниот аџилак годинава мора да докажат дека се вакцинирани против Ковид-19.

Владата наведува дека вакцинацијата против коронавирус ќе се смета за главен услов за учество во аџилакот во Мека. Секој муслиман, според верските закони, е должен барем еднаш во животот на отиде на аџилак.

Во соопштението не беше прецизирано дали само аџиите од Саудиска Арабија ќе можат да учествуваат во аџилакот, кој започнува на крајот на јули.

Поранешниот претседател на САД, Доналд Трамп и неговата сопруга Меланија беа вакцинирани против Ковид-19 во јануари, додека сè уште биле во Белата куќа, се дознава од сигурни извори.

За разлика од Џо Бајден, кој беше вакциниран на 21 декември, што беше пренесувано преку телевизија во живо, неколку недели пред да дојде на власт, Трамп никогаш јавно не спомна дека е вакциниран.

„Претседателот Трамп и првата дама беа вакцинирани во Белата куќа во јануари“, изјави извор близок на поранешниот претседател за „Франс прес“, без да даде други детали.

Доналд Трамп, во својот прв говор по напуштањето на Белата куќа, рече дека сите треба да се вакцинираат.

Неговите изјави добија особено значење затоа што некои од неговите симпатизери беа многу сомничави кон вакцината.

Доналд Трамп, кој беше позитивен на Ковид-19 на почетокот на октомври, помина неколку дена во воената болница Валтер Рид во предградието на Вашингтон.