Претседателот на Франција, Емануел Макрон, денеска ја назначи актуелната амбасадорка на Франција во Велика Британија, дипломатот од кариера Катрин Колона, за нов министер за надворешни работи на земјата, соопшти Елисејската палата.

Актуелните министри за финансии и економија и за внатрешни работи, Бруно Ле Мер и Жерар Дарманен, ќе останат на функцијата, додаде генералниот секретар на Елисејската палата додека го читаше новиот состав на владата потврдувајќи ги претходните извештаи, пренесе „Ројтерс“.

Министерката за индустрија во заминување Ања Пание-Рунаше ќе го преземе новиот министерски ресор за енергетска транзиција, соопшти Елисејската палата.

Амели де Моншелен е назначена за нова министерка за животна средина и климатско планирање.

Тие ќе бидат одговорни за својата работа пред Елизабет Борн, која Макрон ја избра за нова премиерка во понеделникот.

Таа е втора жена на таа позиција во Франција.

Голем пожар избувнал денеска по експлозија во близина на аеродромот во Женева поради што во прекин е авиосообраќајот, јавува „Дејли мејл“.

На фотографиите и видеата објавени на порталот се гледаат експлозија, пожар и густ чад.

#fire and #explosion at #Geneva airport?? pic.twitter.com/ch3ZV0aZBY

— Destroyer of worlds/gummy cola bottles. (@Dan_Krall) May 20, 2022

Портпаролот на вториот најфреквентен аеродром во Швајцарија, Игнас Јанера, изјави дека се запалил нов прифатен центар за баратели на азил, кој се реконструира.

Очевидци велат дека слушнале експлозија по што избувнал пожар.

Сите слетувања на аеродромот во Женева се суспендирани, а за полетувањата одлучуваат пилотите.

11 лица загинале по гранатирањето на местото Лозова во украинскиот регион Харков, изјави украинскиот претседател Володимир Зеленски.

На снимката се гледа облак од чад, кој се издига над зградата погодена од проектил.

Зеленски на „Фејсбук“ објави видео од експлозијата. Тој изјави дека е зафатена зградата на Домот на културата и дека загинале 11 лица, меѓу кои и едно 11-годишно дете.

„Окупаторите ги зедоа културата, образованието и човештвото за свои непријатели. Тие ги гаѓаат со проектили и бомби. Што им е во умот на луѓето што избираат такви цели? Апсолутно зло, апсолутна глупост“, напиша Зеленски.