Шест хуманитарци убиени во Јужен Судан

Шест хуманитарни работници се убиени во Јужен Судан, објавија во неделата Обединетите нации оценувајќи дека станува збор за најтешкиот напад врз уманитарците во повеќе од три години бруталната граѓанска војна која предизвика глад во земјата.

„Ужаснат и гневени сум поради ова срамно убиство на шесте хуманитарни работници во саботата во Јужен Судан“, наведе во писмената изјава Јуџин Овусу, од Бирото за координација на хуманитарните активности на ОН, објавена од јужносуданската престолнина Џуба, и додаде дека „целосно е неприфатливо во моментот кога хуманитарните потреби достигнаа незабележано ниво, да бидат нападнати и убиени оние коишто се обидуваат да помогнат“.

Хуманитарците, тројца Кенијци и тројца државјани на Јужен Судан, се убиени додека патувале од главниот град Џуба кон Прибор, во сојузната држава Бома, на истокот од земјата, додека патувале со колона транспортни возила, пренесува AFP. Нивното возило било запрено од засега непознати напаѓачи кои ги извлекле надвор и ги застрелале од огнено оружје, додава агенцијата повикувајќи се на неименуван извор.

Обединетите нации оценија дека ова е најкрвавиот напад врз хуманитарните работници од почетокот на конфликтот во Јужен Судан во 2013 година.

Севкупно, во оваа африканска земја за повеќе од три години убиени се најмалку 79 активисти и работници на меѓународните и локалните хуманитарни организации, кои му укажуваат помош на локалното население. Седумнаесет од нив се убиени во последните три месеца, истакнуваат од ОН. Покрај тоа, од почетокот на годинава во Јужен Судан се извршени осум напади врз хуманитарните конвои. Светската организација потсетува дека нападите врз хуманитарниот персонал може да се смета за воено злосторство.

Се проценува дека во моментов околу 100.000 луѓе гладуваат во Јужен Судан, а гладот им се заканува на околу милион жители. Според процените на ОН, на 6,2 милиони жители на оваа земја им е потребна помош во храна, односно на околу половината од вкупното население.

Властите се обвинети дека им попречуваат на хуманитарните организации пристап во некои области, повеќето кои се под контрола на бунтовниците. ОН на 20-ти февруари годинава прогласи глад во некои северни делови ја Јужен Судан.

Конфликтот во Јужен Судан започна кон средината на декември 2013 година, меѓу припадниците на племето Динка, од кое потекнува претседателот Салва Кир, и племето Нуер, од коешто потекнува неговиот поранешен заменик Риек Машар, кој го предводеше бунтот.

И покрај мировниот договор потпишан во август 2015 година, во јули минатата година во главниот град Џуба беа обновени жестоките судири. Според податоците на ОН, во текот на конфликтот во земјата, којашто се здоби со независност во 2011 година, загинале најмалку 10.000 луѓе.

На 23-ти март Советот за безбедност при ОН побара итен прекин на огнот и создавање на услови за непречено и безбедно доставување на хуманитарна помош за населението, заканувајќи со воведување санкции против завојуваните страни./крај/мф/сн