Свет
Јапонија упати протест до Москва за запленетиот рибарски брод

Јапонија протестираше до Москва во врска со запленувањето на јапонски рибарски брод минатата недела и побара итно ослободување на екипажот, објави денеска јапонскиот генерален секретар на Владата, Катсунобу Като.
Тој на прес-конференцијата прецизираше дека Токио преку дипломатски канали ѝ порачал на Москва дека инспекцијата и заплената на бродот и притворањето на 14 членови на екипажот се неприфатливи, пренесува Кјодо.
„ Според нашите информации, бродот пловел во ексклузивната економска зона на Јапонија. Протестиравме до Москва преку дипломатски канали и бараме итно ослободување на бродот и екипажот“, рече Като.
Руската безбедносна служба во регионот Сахалин соопшти дека јапонски брод бил запленет во Охотското Море по обид за бегство, а на бродот биле пронајдени ракови и други морски плодови.
Претходните извештаи наведоа дека бродот извршувал опасни маневри и дека претставувал закана за рускиот патролен брод, бидејќи за малку ќе дошло до судир.
Бродот е запленет и транспортиран до пристаништето Корсаков за понатамошна истрага.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Екс полицајци обвинети за убиство

Петмина поранешни полицајци во Мемфис, во врска со смртта на Тајри Николс на 10 јануари се во притвор и денеска се обвинети за убиство, соопштија официјални лица.
Записите покажуваат дека освен за убиство, тие се соочуваат и со други обвиненија како што се тешко киднапирање и тежок напад.
Тадариус Бин, Деметриус Хејли, Емит Мартин Трети, Дезмонд Милс и Џастин Смит беа отпуштени во петокот, откако полициската истрага покажа дека употребиле прекумерна сила или одбиле да интервенираат и да му помогнат на осомничениот
Тие се „директно одговорни за физичкото малтретирање на Николс“, рече началникот на полицијата.
Првичните наоди од обдукцијата покажуваат дека Николс бил жестоко претепан пред да почине, пишува „NBC News“.
„Си-Ен-Ен“ јавува дека полицајците го извлекле Николс од возилото и употребиле сила за да го приведат.
Николс почина три дена откако полицијата го приведе, поради наводно несовесно возење, на 7 јануари.
Полицијата во Мемфис и Бирото за истраги во Тенеси ја истражуваа употребата на полициска сила при апсењето на Николс.
Европа
Лавров по посетата на Африка: Русија останува посветена на извозот на храна во сиромашните земји

Рускиот министер за надворешни работи, Сергеј Лавров по посетата на Еритреја потврди дека Москва останува посветена на извозот на храна во сиромашните африкански земји, соопшти денеска руското Министерство за надворешни работи.
„Лавров ја потврди цврстата посветеност на Русија во исполнувањето на обврските во однос на испораката на клучните прехранбени производи за африканските земји, вклучително и пакетите помош од договорите потпишани со посредство на ОН“ – се наведува во соопштението на министерството, пренесува ТАСС.
Свет
Трамп: Прво тенкови, па потоа нуклеарно оружје

Конфликтот во Украина би можел да ескалира во нуклеарна војна поради префрлањето на западните тенкови во Киев, изјави поранешниот американски претседател Доналд Трамп.
– Прво тенкови, па нуклеарно оружје. Запрете ја оваа луда војна сега. Тоа е толку лесно да се направи – напиша политичарот на својата социјална мрежа „Truth Social“.
Трамп постојано предупредуваше дека ситуацијата во Украина може да ескалира во трета светска војна. Политичарот е убеден дека непријателствата немаше да започнат доколку тој продолжеше да биде претседател на САД.
Германската влада претходниот ден објави дека ќе испрати тенкови Леопард 2 во Украина, пренесува РИА Новости.
Планирано е формирање на два тенковски баталјони, а во првата фаза Берлин од складиштето на Бундесверот ќе префрли чета од 14 борбени возила А6.
Како што истакна германскиот министер за одбрана Борис Писториус, тенковите би можеле да пристигнат во Украина на крајот на март.