Европа
Белоруската опозиција излегува на улица, полицијата се закани со вистински куршуми
Белоруската опозиција најави нов голем протест против претседателот Александар Лукашенко за денеска, овојпат пркосејќи на опасноста и заканата од вистински куршуми испукани од полицијата, која го задуши претходниот протест минатата недела.
Овој протестен марш е исто така прв од поголеми размери по ултиматумот што му го постави на Лукашенко, лидерката на опозицијата Светлана Тихановскаја, кој по немирите поради спорните претседателски избори, побегна во Литванија. На претседателот кој е на власт од 1994. година, таа му даде рок до 25. октомври да се повлече од функцијата. Во спротивно, предупреди таа, ќе ја повика земјата на протести и генерален штрајк.
Претседателот (66), кој е под невиден притисок по спорните резултати од претседателските избори на 9. август, не покажа ни најмала желба да ги исполни барањата на неговите критичари, напротив.
Сите истакнати членови на белоруската опозиција денеска се во затвор или во егзил во странство. Минатата недела, протестот во Минск беше брутално потиснат од полицијата со водени топови и шок-бомби, а стотици луѓе беа уапсени. Тамошните медиуми пренесоа дека тоа била најгрубата интервенција во последните неколку недели.
Во понеделникот, Министерството за внатрешни работи предупреди дека полицијата, доколку е потребно, ќе употреби вистински куршуми, што може да предизвика сериозна ескалација на кризата.
Властите, кои го обвинуваат Западот дека се обидува да го собори Александар Лукашенко преку оркестрирани протести, ја оправдуваат одлуката со изјава дека протестите станале организирани и крајно радикални и дека кон силите за интервенција се фрлаат камења, шишиња и ножеви.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.