Европа
Благи симптоми, ниска стапка на хоспитализацијa – oхрабрувачки вести за омикрон
Додека новиот сој омикрон се шири низ светот, лекарите во Јужна Африка од каде потекнува мутацијата имаат охрабрувачки вести.
Лекарот Унбен Пилеј кој спасува десетици заразени пациенти од коронавирус дневно истакнува дека никогаш не испратил никого во болница на лекување од омикрон, што е исклучително важно за следење на овој нов сој велат упатените.
Ова е една од причините зошто тој, заедно со други лекари и медицински експерти, се сомнева дека новиот сој омикрон предизвикува поблага форма на болеста од делта-сојот, иако се чини дека се шири побрзо.
„Засега сите пациенти се на домашно лекување, немаше потреба од хоспитализација. Повеќето од нив закрепнаа во периодот на изолација од 10 до 14 дена“, посочи Пилеј.
Неговите пациенти вклучуваат постари лица, но и оние со здравствени проблеми кои можат да ги направат подложни на инфекција со коронавирус. Дури и тие имаат развиено релативно благи клинички слики и се опоравуваат како што се очекуваше, вели тој.
За две недели откако омикрон првпат беше пријавен во Јужна Африка, и други лекари споделија слични приказни. Сите предупредуваат дека ќе бидат потребни уште многу недели за да се соберат доволно податоци за да бидат сигурни во целсот за последиците од омикрон, но нивните набљудувања и раните докази даваат одредени индикации.
Според Јужноафриканскиот национален институт за заразни болести, само околу 30 отсто од хоспитализираните во последните недели биле сериозно болни, што е помалку од половина од потешките случаи забележани во првите недели од претходните пандемични бранови. Просечниот престој во болница на пациентите со ковид овој пат беше пократок – околу 2,8 дена во споредба со осум дена. Само 3 отсто од пациентите неодамна хоспитализирани поради коронавирус починале, во споредба со околу 20 отсто во претходните епидемии во земјата, покажале најновите извештаи.
„Во моментов практично сè укажува дека се работи за полесна болест“, вели Вилем Ханек, директор на Институтот за африкански здравствени истражувања, повикувајќи се на податоци од националниот институт и други извештаи.
Во меѓувреме, научниците ширум светот го следат бројот на случаи и стапките на хоспитализација додека тестираат како функционираат сегашните вакцини и третмани. Додека делтата сè уште е доминантен вид на коронавирус ширум светот, случаите на омикрон се јавуваат во десетици земји, а епицентарот е Јужна Африка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.