Европа
Блиндиран Велигден во Италија: нема излети и семејни ручеци, ангажирани 70.000 полицајци
Италијанците претстојните велигденски празници ќе ги поминат во блиндирана атмосфера, пишуваат медиумите.
Министерството за внатрешни работи даде инструкции, а 70.000 полицајци ќе надгледуваат дали се почитуваат строгите мерки против коронавирусот.
Контролите се веќе засилени и оние што ќе се најдат на улица, без валидна причина, плаќаат казна од 400 евра, пренесува агенцијата „Анса“.
За време на празниците дозволена е посета на едно семејство, но за разлика од годините пред пандемијата, нема излети во природа или големи семејни ручеци во ресторани.
Министерот за здравство, Роберто Сперанца, во интервју за „Кориере дела сера“ не даде точен датум кога строгите мерки на ограничување поради пандемијата на Ковид-19 ќе бидат олеснети или целосно укинати, но тој рече дека повеќето Италијанци ќе бидат вакцинирани до крајот на летото.
Во четвртокот беше поставен рекорд на бројот на вакцинирани лица за еден ден кога вкупно 280.000 лица примија инјекција, но најголемиот проблем сепак останува недостигот на вакцини.
Во регионите Венето и Лацио веќе закажаните вакцинации се одложени затоа што има недостиг на лекот.
Граѓаните протестираат затоа што поединци успеваат да се вакцинираат преку ред.
На добро познатиот новинар Андре Сканци, кој е чест гостин во телевизиските емисии и кој јавно се пофали дека го сторил тоа, му е забранета соработката на телевизиите РАИ и „Ла 7“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Повеќе од сто килограми кокаин пронајдени меѓу банани во супермаркети во Германија
Вработени во неколку германски супермаркети во Берлин и Бранденбург откриле повеќе од 100 килограми кокаин во пакувања со банани, пренесува „Билд“ повикувајќи се на полициски извори.
Во Бранденбург, како што се наведува, во најмалку четири продавници биле пронајдени меѓу 20 и 100 килограми кокаин, пренесува „Танјуг“.
Полицијата во моментот спроведува истрага со проверка на стоката во продавниците поради што сѐ уште не се знае конечната количина дрога во нив, но не и информацијата во колку продавници има.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.