Европа
Британските пратеници утре мора да донесaт одлука за брегзит
Британските пратеници утре повторно ќе гласаат за договорот за брегзит, како што беше договорено меѓу премиерката Тереза Меј и претставниците на ЕУ. Пред нив е историска одлука за тоа дали ќе го поддржат договорот или ќе ризикуваат хаотичен излез од ЕУ, кој треба да се случи за помалку од три недели.
Долниот дом на британскиот Парламент пред два месеца го отфрли овој договор со големо мнозинство од гласовите и ја испрати Меј во Брисел на нови преговори.
Европските лидери ги отфрлија нејзините барања, а во преговорите меѓу британските и европските претставници сè уште нема напредок.
Доколку британските пратеници не го прифатат договорот и доколку не се договори продолжување на преговорите, Велика Британија ќе мора да ја напушти ЕУ на 29 март по 46 години членство, што ќе предизвика големи промени за двете страни.
Договорот за разидување во јануари беше отфрлен од мнозинството од 230 пратеници и иако во меѓувреме неколку пратеници го променија мислењето и сега го поддржуваат договорот, сè уште нема индикации дека има голем пресврт во мислењето кај повеќето од нив.
Опозициската лабуристичка партија сè уште се спротивставува на тоа, дури и кога Меј се обиде да придобие некои пратеници ветувајќи дека ќе ги заштити работничките права, како и дополнителни пари за сиромашните градови.
Ако договорот утре биде повторно отфрлен, пратениците в среда би требало да гласаат за брегзит, без договор, а в четврток за одложување на брегзитот.
Меј понуди можност за кратко и ограничено одложување, но е против тоа предупредувајќи дека пратениците на крајот сепак ќе мора да донесат одлука за иднината на земјата.
Секое одложување би требало најпрвин да биде одобрено од лидерите на 27-те земји членки на ЕУ, кои ќе се состанат на самит во Брисел на 21 и 22 март, една недела пред договорениот датум за брегзитот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.