Свет
„Вашингтон пост“: Трамп на Лавров му рекол дека не му е грижа за руското мешање во изборите
Американскиот претседател, Доналд Трамп, на средбата со рускиот министер за надворешни работи, Сергеј Лавров, која се одржа во мај 2017 година, а на која присуствуваше и рускиот амбасадор во САД, Сергеј Кисљак, изјавил дека не го засега руската вмешаност во претседателските избори, бидејќи, како што рекол, САД го правеле истото во други земји, објави синоќа „Вашингтон пост“.
Весникот, кој се повикува на три извори, дознава дека соработници во Белата куќа биле алармирани поради ваквиот коментар и ги сокриле од јавноста записите од средбата.
Според изворите, пишува весникот, меморандумот од исходот на средбата бил со ограничен пристап и тој документ можеле да го видат само неколку доверливи официјални лица.
Во мај 2017 година започна истрага за можна вмешаност на Русија во претседателските избори кои се оддржаа една година претходно. Случајот беше воден од специјалниот обвинител Роберт Мулер кој ја заврши истрагата во март 2019 година. Тогаш, државиот обвинител Вилијам Бар соопшти дека во текот на истражните постапки се дознало за повеќе обиди на агенти на Русија да влијаат на изборните резултати во полза на Трамп.
Меѓутоа, Мулер не успеа да покрене обвинение, бидејќи не можеше да најде индиции за заговор на кампањата на Трамп со Русија и го предаде случајот на претрес во Конгресот.
Претставничкиот дом неделава покрена постапка за разрешување на претседателот Трамп, за друг случај. Имено, демократите во конресот реагираа откако неименуван укажувач откри детали за телефонски разговор на Трамп со украинскиот колега Володомир Зеленски, барајќи од него да го испита неговиот ривал на претседателските избори во 2020, Џо Бајден.
Укажувачот тврди дека Белата куќа се обидела да го ограничи пристапот до документи и записници од овој и други разговори, преместувајќи ги во тајна компјутерска мрежа што не е наменета за таа цел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД: Ќе го блокираме полноправното членство на Палестина во ОН, тие треба да преговараат со Израел
САД ќе гласаат против палестинската кандидатура за полноправно членство во Обединетите нации и ќе ја блокираат светската организација да признае палестинска држава.
„САД продолжуваат да тврдат дека најбрзиот пат до државност за палестинскиот народ е преку директни преговори со Израел и палестинската управа со поддршка на САД и други партнери“, рече американскиот претставник.
Планирано е 15-члениот совет да гласа за нацрт-резолуцијата со која се препорачува на Генералното собрание на ОН од 193 држави „Државата Палестина да биде примена во членство во ОН“.
За да усвои резолуцијата, потребни се најмалку девет гласа и никакво вето од САД, Велика Британија, Франција, Русија или Кина. Дипломатите проценуваат дека резолуцијата би можела да собере 13 гласа, што би ги принудило САД да стават вето.
„Одамна јасно ставивме до знаење дека предвремените акции во Њујорк, дури и ако се во најдобар интерес, нема да резултираат со државност за палестинскиот народ“, рече американскиот функционер. Палестинците во моментов имаат статус на набљудувач не-членка, што е де факто признавање на државноста доделена од Генералното собрание на ОН во 2012 година.
Меѓутоа, барањето за полноправно членство мора да биде одобрено од Советот за безбедност, а потоа од најмалку две третини од членовите на Генералното собрание. Засилените напори на Палестина за полноправно членство дојдоа шест месеци по масакрот на Хамас во јужен Израел и војната во Појасот Газа по започнувањето на израелската офанзива и проширувањето на еврејските населби на Западниот Брег.
Генералниот секретар на ОН, Антонио Гутереш, смета дека „повеќе од кога било, неопходно е да се поддржат напорите со добра волја за воспоставување траен мир меѓу Израел и независна, одржлива и суверена палестинска држава“.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Европа
Уапсен Полјак: „Планирал убиство на Зеленски“
Маж од Полска е уапсен под обвинение дека бил подготвен да шпионира за руското воено разузнавање и да и помогне да го испланира убиството на украинскиот претседател Володимир Зеленски, соопштија полските обвинители, а пренесе Асошиетед прес.
Полското национално обвинителство соопшти дека мажот, идентификуван само како Павел К., бил обвинет дека сакал да ги пренесе безбедносните информации на аеродромот на руски агенти и бил уапсен вчера во Полска.
Човекот побарал контакт со Руси директно вклучени во војната во Украина и се очекувало да пренесе детални информации за аеродромот Жешов-Јасионка во југоисточна Полска, во близина на границата со Украина, кој е портата за меѓународни воени и хуманитарни снабдувања за Украина. Аеродромот е под контрола на американски војници.
Доколку биде прогласен за виновен, тој може да добие и до осум години затвор, се вели во соопштението за печатот.
Обвинителите рекоа дека апсењето е резултат на блиска соработка со обвинителите и безбедносните служби на Украина, кои обезбедија клучни докази. Членката на ЕУ, Полска е цврст поддржувач на соседна Украина и Зеленски во одбрана од руската агресија повеќе од две години.