Свет
Венецуела преку суд ќе бара Банката на Англија да ѝ префрли дел од златото
Централната банка на Венецуела поднесе правно побарување во трговски суд во обид да ја принуди Банката на Англија да ѝ пренесе 1,13 милијарда американски долари од златото што го чува таму за да ги финансира владините мерки против Ковид-19, пренесува „Ројтерс“ повикувајќи се на документ доставен во судот во Лондон.
Во барањето од 14 мај се вели дека венецуелската Централна банка бара судот да ѝ наложи на Банката на Англија да се придржува кон предложените инструкции.
Венецуела, која од март е под карантин поради коронавирусот, се надева дека дел од нејзиното злато во парична вредност ќе биде префрлено во УНДП за набавка на медицински производи, лекови и храна. Венецуела досега има регистрирано 749 заболени и 10 починати од коронавирус.
Владата на Николас Мадуро се обидува да ги продаде златните резерви на земјата како начин за собирање средства во услови на здравствена криза и карантинските мерки што ги наметна. Ситуацијата е влошена од падот на глобалните цени на нафтата и санкциите од САД.
„Влечкањето од страна на Банката на Англија е критична пречка за напорите на Венецуела и ОН за борба против Ковид-19 во земјата“, рече Сарош Зајвала, адвокат од Лондон, кој ја претставува Централната банка на Венецуела.
Ниту од Банката на Англиј, ниту од Централната банка на Венецуела нема официјален коментар во врска со побарувањето.
Судската постапка доаѓа по барањето од владата на Николас Мадуро во април до Банката на Англија – која го чува златото на неколку земји во развој – да продаде дел од своите резерви на злато и да ги насочи средствата кон ОН.
Правниот ќор-сокак се одолжува веќе извесно време бидејќи Банката на Англија одби да ѝ пренесе околу 31 тони венецуелско злато на владата на Николас Мадуро кого Велика Британија од 2018 година одбива да го признае како легитимен лидер на земјата.
Венецуела е во политичка криза од 2019 година кога лидерот на опозицијата поддржан од САД, Хуан Гваидо, се прогласи за привремен претседател и ја доби поддршката од повеќето западни земји, а САД и нејзините сојузници набргу потоа почнаа да ги запленуваат државните средства на Венецуела во странство и да воведуваат строги санкции за компаниите во земјата. Мадуро доби поддршка од Русија, Кина, Турција и неколку други нации. Венецуелските власти ги нарекоа мерките економска војна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Граѓаните на ЕУ повеќе претпочитаат печатени отколку електронски книги
Уделот на граѓаните на ЕУ, кои купуваат печатени книги, списанија или весници преку интернет, е сè уште значително поголем од оние што купуваат е-книги, списанија или весници, покажува новото истражување на Евростат објавено по повод Светскиот ден на книгата и авторското право, кој се слави на 23 април.
На ниво на ЕУ, во 2023 година, 13,4 отсто од оние што купиле на три месеци пред истражувањето платиле печатена книга преку интернет. Тоа беше повеќе отколку во 2022 година (12,7 проценти), но помалку отколку во 2021 година (14,5 проценти).
Во набљудуваниот период 7,2 отсто од граѓаните во ЕУ купиле е-книга во споредба со 6,6 отсто во 2022 година и слично како во 2021 година. Најголем процент граѓани што купиле печатена книга во трите месеци од 2023 година пред истражувањето е во Холандија, во Луксембург и во Ирска – над 20 отсто, а најмалите, само малку повеќе од еден отсто, на Кипар.
Во исто време, најголем број на оние што купиле е-книга е забележан во Данска – 22 отсто, а најмал на Кипар – помалку од еден отсто. Данска и Финска се единствените земји членки на ЕУ во кои повеќе луѓе купувале електронски отколку печатени книги.
Регион
Европскиот парламент одобри визна либерализација за Србите од Косово
Европскиот парламент денеска одобри визна либерализација за имателите на српски пасоши од Косово, кои ги издава Координативната управа на Србија на предлог на европратеникот и известувач за укинување на тие визи, Матјаж Немец.
За извештајот на Немец гласале 406 од 597 европратеници, 97 биле против, а 94 биле воздржани.
По гласањето во ЕП, последниот збор за овој предлог треба да го дадат министрите на Советот на ЕУ.
Претходно овој месец, амбасадорите на земјите членки на ЕУ се согласија со предлогот на ЕП и Советот на ЕУ за измена на регулативата за иматели на српски пасоши издадена од Координативната управа на Србија, со која се доделува визна либерализација на носителите на овие пасоши, пишува српската новинска агенција „Танјуг“.
Претходно, Комитетот за граѓански слободи, правда и внатрешни работи на ЕП на 9 април го усвои нацрт-извештајот за визна либерализација.
Целиот Западен Балкан ќе има ист визен режим за патување во ЕУ
Оваа одлука гарантира целиот регион на Западен Балкан да има ист визен режим за патување во ЕУ, објави тогаш ЕП.
Постои можност одлуката за визна либерализација за имателите на српски пасоши во Косово да почне да се применува до почетокот на летото.
Србите од Косово се единствените од Балканот на кои им е потребна виза за ЕУ
Србите од Косово и Метохија, кои поседуваат пасоши издадени од Координативната управа, која функционира во рамките на Министерството за внатрешни работи на Србија, се единствените на кои им е потребна виза за влез во земјите на ЕУ откога од 1 јануари годинава беа укинати визите за граѓаните на Косово.
Во ноември 2023 година Европската комисија предложи да почне постапка за вклучување на граѓаните на Косово, кои имаат пасоши издадени од Координативната управа на Србија, преку визна либерализација.
Свет
(Видео) Драматична снимка од спасување во Минесота, маж беше заглавен во запален автомобил
Група луѓе успеале да скршат запален автомобил и да спасат маж заробен во возилото, а драматичниот момент на спасувањето во Минесота беше снимен.
На видеото се гледа група луѓе околу автомобил зафатен од пламен. Тие очајнички се обидуваат да ја отворат вратата пред некој да го скрши прозорецот на возачот и потоа да го повлече на безбедно.
Инцидентот се случил минатиот четврток околу 18.30 часот.
Властите соопштија дека „хондата“ скршнала надесно и удрила во столб за осветление, а потоа и во заштитна ограда пред да се запали, создавајќи чад и голем пожар.
Возачот потоа бил пренесен во болница, но не добил сериозни повреди.