Регион
(Видео) Аеродромот во Белград и натаму затворен, патниците со часови заглавени
Белградскиот аеродром, кој веќе со часови е затворен за слетување и полетување авиони, е во хаотична состојба, пишуваат српските медиуми. Патниците на аеродромот со часови чекаат да се качат на своите летови кои се откажуваат постојано поради техничките проблеми поради кои е затворен и аеродромот. Медиумите велат дека патниците се нервозни бидејќи доцнат нивните летови и поради тоа што има голем број патници што останале да чекаат на аеродромот, па некои од нив немаат ниту каде да седнат и мора да седат на подот.
Египетскиот патнички авион „боинг 737-800“ на авиокомпанијата „Египет ер“, кој без патници слета на аеродромот во Белград во 4.11 часот утринава, поради технички проблеми остана на пистата и предизвика застој во целиот авиосообраќај.
Според неофицијални информации на српските медиуми, авионот што слета во Белград, најверојатно, ги оштетил гумите при слетувањето. Четири лета на „Ер Србија“ беа пренасочени да слетаат на аеродромот во Ниш.
Од аеродромот „Никола Тесла“ велат дека се очекува пистата, која беше затворена со часови, набргу да биде подготвена за сообраќај.
На аеродромот „Никола Тесла“ во Белград утрово немаше ниту слетување ниту полетување авиони и сите летови беа пренасочени кон алтернативни аеродроми, пишува српски „Курир“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Атина прекриена со сахарска прашина, нереални сцени во градот
Атина и јужните делови на земјата повторно беа обвиени со сахарска прашина, со нијанси на жолта и портокалова боја што создава нереална атмосфера во градот.
Облаци од прашина, пренесени преку Средоземното Море од Северна Африка, го обвиле Акропол и другите знаменитости на Атина, пишува „АП“.
Силните јужни ветрови носеа прашина од Сахара, па во последните часови од денот грчката престолнина изгледаше како да е користен филтер за фотографирање, пренесува Euronews.
🚨🇬🇷
HAPPENING NOW
The sky is totally orange over Athens, Greece
— Alex Barnicoat (@mrbarnicoat) April 23, 2024
Во среда се прогнозира разведрување на небото со поместување на ветровите и поместување на прашината и опаѓање на температурите.
Дневниот максимум во делови од јужниот остров Крит надмина 30 степени Целзиусови, повеќе од 20 степени Целзиусови над она што беше забележано во поголемиот дел од северна Грција.
Корисниците на социјалната мрежа Икс објавија видеа од необична „портокалова“ појава од територијата на цела Атина.
Веста за Атина во „портокалово“ многу брзо се прошири низ светските медиуми, а видеата ги споделија и профили на социјалните мрежи кои се занимаваат со глобални актуелни вести.
Регион
Убиен работник од Украина во Славонски Брод
Во центарот на Славонски Брод во попладневните часови е пронајдено машко тело.
Полициската управа Брод-Посавина соопшти дека е приведено едно лице поврзано со инцидентот.
Се работи за млад градежен работник од Украина. Конфликт се случил во стан во центарот на градот каде што биле сместени работниците (родени во 90-тите).
Полицијата соопшти дека телото на мажот е пронајдено во куќата околу 15:17 часот и дека се води истрага, а потоа и кривична истрага која треба да ги расветли сите околности.
Регион
Таткото на осомничениот за убиството на Данка Илиќ го откажал полномошното на адвокатот
Небојша Живановиќ, адвокатот на Радослав Д., таткото на Дејан Д., кој е осомничен за убиството на двегодишното девојче Данка Илиќ, за Танјуг изјави дека неговиот клиент го откажал полномошното.
Радослав Д. е осомничен дека му помогнал на својот син да го премести телото на девојчето од депонијата на засега непозната локација.
Со оглед на тоа што го откажал полномошното на избраниот бранител, сега треба да му се определи бранител по службена должност на Радослав Д.
Биолошкиот брат на осомничениот Дејан Д., Далибор Д., почина на 7 април во Полициската станица во Бор, каде беше осомничен дека му помогнал на својот брат да го скрие телото на двегодишното девојче.
Двегодишната Данка Илиќ исчезна на 26 март во Бањско поле кај Бор, а полицијата по 10-дневна потрага и детални проверки и информации ги уапси Срѓан Ј. и Драган Д. од Бор, кои се осомничени дека го удриле девојчето со автомобил, а потоа нејзиното тело го ставиле во багажникот на автомобилот и го однеле на депонија.
Телото на девојчето се уште не е пронајдено.