Свет
(Видео) Американски комичар распали кон конгресмените: Засрамете се што ги заборавивте спасувачите од 11 септември
Џон Стјуарт, американски комичар и поранешен водител на сатиричната емисија „Дејли шоу“, одржа говор во Конгресот на САД на тема финансиска помош и надомест за болните пожарникари и припадниците на други служби за итни случаи, кои учествуваа во спасувањето по терористичките напади на кулите близначки на 11 септември 2001 година.
„Треба да се засрамите“, рече Стјуарт, без двоумење пред конгресмените, видно вознемирен од фактот дека многу конгресмени не се појавија на заседавањето на комисијата на Претставничкиот дом (долниот дом на Конгресот) за осигурување средства за Фондацијата за надомест на жртвите од 11 септември (VCF) .
Како што објави „Си-би-ес њуз“, Фондацијата која беше основана пред девет години за покривање медицински трошоци за пожарникарите, полицајците, припадниците на брзата помош и други сектори што учествуваа во спасувањето останува без пари.
Голем број спасувачи се погодени од тешки болести, како рак или хронични белодробни заболувања, поради вдишување токсична прашина од урнатините на кулите близначки кога членови на Ал каеда ги урнаа забивајќи се со авиони во нив.
Стјуарт фактот дека речиси половина од членовите на комисијата не дојдоа на расправата го опиша како срам за државата и дамка за институцијата.
„Додека седам тука, мислам на тоа како целата оваа просторија е метафора за она што се случува со целиот процес на обезбедување здравствена заштита и надомест за спасувачите од 11 септември. Зад мене, полна просторија со спасувачи, а пред мене речиси празен Конгрес. Тешко болни дојдоа тука да разговараат, очигледно со никого“, рече Стјуарт.
„Треба да се засрамите од оние што не се тука, но знам дека нема. Знам зашто во оваа сала нема чувство за одговорност“, додаде тој.
Стјуарт го повика Конгресот да обезбеди средства за VCF во наредните 70 години за болните да не стравуваат дали нивните трошоци за третман ќе бидат покриени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД: Ќе го блокираме полноправното членство на Палестина во ОН, тие треба да преговараат со Израел
САД ќе гласаат против палестинската кандидатура за полноправно членство во Обединетите нации и ќе ја блокираат светската организација да признае палестинска држава.
„САД продолжуваат да тврдат дека најбрзиот пат до државност за палестинскиот народ е преку директни преговори со Израел и палестинската управа со поддршка на САД и други партнери“, рече американскиот претставник.
Планирано е 15-члениот совет да гласа за нацрт-резолуцијата со која се препорачува на Генералното собрание на ОН од 193 држави „Државата Палестина да биде примена во членство во ОН“.
За да усвои резолуцијата, потребни се најмалку девет гласа и никакво вето од САД, Велика Британија, Франција, Русија или Кина. Дипломатите проценуваат дека резолуцијата би можела да собере 13 гласа, што би ги принудило САД да стават вето.
„Одамна јасно ставивме до знаење дека предвремените акции во Њујорк, дури и ако се во најдобар интерес, нема да резултираат со државност за палестинскиот народ“, рече американскиот функционер. Палестинците во моментов имаат статус на набљудувач не-членка, што е де факто признавање на државноста доделена од Генералното собрание на ОН во 2012 година.
Меѓутоа, барањето за полноправно членство мора да биде одобрено од Советот за безбедност, а потоа од најмалку две третини од членовите на Генералното собрание. Засилените напори на Палестина за полноправно членство дојдоа шест месеци по масакрот на Хамас во јужен Израел и војната во Појасот Газа по започнувањето на израелската офанзива и проширувањето на еврејските населби на Западниот Брег.
Генералниот секретар на ОН, Антонио Гутереш, смета дека „повеќе од кога било, неопходно е да се поддржат напорите со добра волја за воспоставување траен мир меѓу Израел и независна, одржлива и суверена палестинска држава“.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Европа
Уапсен Полјак: „Планирал убиство на Зеленски“
Маж од Полска е уапсен под обвинение дека бил подготвен да шпионира за руското воено разузнавање и да и помогне да го испланира убиството на украинскиот претседател Володимир Зеленски, соопштија полските обвинители, а пренесе Асошиетед прес.
Полското национално обвинителство соопшти дека мажот, идентификуван само како Павел К., бил обвинет дека сакал да ги пренесе безбедносните информации на аеродромот на руски агенти и бил уапсен вчера во Полска.
Човекот побарал контакт со Руси директно вклучени во војната во Украина и се очекувало да пренесе детални информации за аеродромот Жешов-Јасионка во југоисточна Полска, во близина на границата со Украина, кој е портата за меѓународни воени и хуманитарни снабдувања за Украина. Аеродромот е под контрола на американски војници.
Доколку биде прогласен за виновен, тој може да добие и до осум години затвор, се вели во соопштението за печатот.
Обвинителите рекоа дека апсењето е резултат на блиска соработка со обвинителите и безбедносните служби на Украина, кои обезбедија клучни докази. Членката на ЕУ, Полска е цврст поддржувач на соседна Украина и Зеленски во одбрана од руската агресија повеќе од две години.