Свет
(Видео) Деветгодишно девојче било силувано од свештеник и тројца мажи, ја убиле и го запалиле телото
Стотици луѓе протестираа во индиската престолнина Делхи четврти ден по ред поради наводно силување и убиство на деветгодишно девојче од една од најзагрозените индиски касти.
Демонстрантите одеа држејќи транспаренти и бараа сторителите на злосторствата да бидат казнети за она што го направија, пренесуваат светските агенции.
„Сакаме правда, правда за ќерките на Индија“, извикуваа тие.
Мајката на девојчето ја испрати да донесе вода од блискиот крематориум во Делхи во неделата вечерта.
Еден час подоцна, таа беше пронајдена мртва во влажна облека, со крвав нос, со модринки на рацете и нозете и помодрени усни на подот од крематориумот, објави „Дејли мејл“.
Родителите на девојчето ги обвинија хинду-свештеникот и уште тројца мажи дека ја нападнале.
Мајката рече дека ѝ се заканувале кога се противела на кремирањето на ќерка ѝ.
Полицијата регистрира случај на групно силување и убиство и ги уапси мажите.
Таткото на девојчето рекол дека додека стигнал до крематориумот, придружуван од речиси 150 селани, телото на неговата ќерка главно било изгорено.
Свештеникот и неговите помошници ја заклучија вратата и насилно го кремираа телото на девојчето и покрај протестите на мајката, а таткото на девојката и соседите, кои дојдоа во меѓувреме, ги фатија свештеникот и тројца помошници, кои потоа, според локалните медиуми, признале дека ја силувале девојката.
Таткото и селаните го изгаснале пожарот, но тој успеал да ги спаси само нозете на девојчето, што значи дека полицијата не може да докаже дека била силувана.
Напаѓачите беа обвинети за групно силување, убиство и за сексуален напад врз дете.
Лекарите што ја извршија обдукцијата рекоа дека изгореното тело им оневозможило да ја утврдат точната причина за смртта.
Девојчето било член на најниската Дали-каста, некогаш позната како недопирлива, и живеела питајќи пред муслиманскиот суфиски храм.
Случајот предизвика гнев во Индија, демонстрантите ги запалија сликите на премиерот Нарендра Моди обвинувајќи го дека не го осудува нападот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД: Ќе го блокираме полноправното членство на Палестина во ОН, тие треба да преговараат со Израел
САД ќе гласаат против палестинската кандидатура за полноправно членство во Обединетите нации и ќе ја блокираат светската организација да признае палестинска држава.
„САД продолжуваат да тврдат дека најбрзиот пат до државност за палестинскиот народ е преку директни преговори со Израел и палестинската управа со поддршка на САД и други партнери“, рече американскиот претставник.
Планирано е 15-члениот совет да гласа за нацрт-резолуцијата со која се препорачува на Генералното собрание на ОН од 193 држави „Државата Палестина да биде примена во членство во ОН“.
За да усвои резолуцијата, потребни се најмалку девет гласа и никакво вето од САД, Велика Британија, Франција, Русија или Кина. Дипломатите проценуваат дека резолуцијата би можела да собере 13 гласа, што би ги принудило САД да стават вето.
„Одамна јасно ставивме до знаење дека предвремените акции во Њујорк, дури и ако се во најдобар интерес, нема да резултираат со државност за палестинскиот народ“, рече американскиот функционер. Палестинците во моментов имаат статус на набљудувач не-членка, што е де факто признавање на државноста доделена од Генералното собрание на ОН во 2012 година.
Меѓутоа, барањето за полноправно членство мора да биде одобрено од Советот за безбедност, а потоа од најмалку две третини од членовите на Генералното собрание. Засилените напори на Палестина за полноправно членство дојдоа шест месеци по масакрот на Хамас во јужен Израел и војната во Појасот Газа по започнувањето на израелската офанзива и проширувањето на еврејските населби на Западниот Брег.
Генералниот секретар на ОН, Антонио Гутереш, смета дека „повеќе од кога било, неопходно е да се поддржат напорите со добра волја за воспоставување траен мир меѓу Израел и независна, одржлива и суверена палестинска држава“.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Европа
Уапсен Полјак: „Планирал убиство на Зеленски“
Маж од Полска е уапсен под обвинение дека бил подготвен да шпионира за руското воено разузнавање и да и помогне да го испланира убиството на украинскиот претседател Володимир Зеленски, соопштија полските обвинители, а пренесе Асошиетед прес.
Полското национално обвинителство соопшти дека мажот, идентификуван само како Павел К., бил обвинет дека сакал да ги пренесе безбедносните информации на аеродромот на руски агенти и бил уапсен вчера во Полска.
Човекот побарал контакт со Руси директно вклучени во војната во Украина и се очекувало да пренесе детални информации за аеродромот Жешов-Јасионка во југоисточна Полска, во близина на границата со Украина, кој е портата за меѓународни воени и хуманитарни снабдувања за Украина. Аеродромот е под контрола на американски војници.
Доколку биде прогласен за виновен, тој може да добие и до осум години затвор, се вели во соопштението за печатот.
Обвинителите рекоа дека апсењето е резултат на блиска соработка со обвинителите и безбедносните служби на Украина, кои обезбедија клучни докази. Членката на ЕУ, Полска е цврст поддржувач на соседна Украина и Зеленски во одбрана од руската агресија повеќе од две години.