Европа
(Видео) Низ каналите во Амстердам ќе пловат електрични роботизирани чамци
Властите во Холандија имаат намера да користат прототип на футуристички електрични роботизирани чамци во област што опфаќа канали од околу 100 километри во Амстердам, а новите и целосно автономни пловни објекти треба да извршуваат разни задачи, вклучително и превоз на патници и отпад, пренесува „Индипендент“.
На проектот наречен „Робоут“, чија цел е развој на нови начини за навигација низ водните патишта во светот без човечка рака зад кормилото, работат експерти од Институтот во Амстердам и научници од Институтот за технологија (МИТ) во Масачусетс, САД.
Електричните роботизирани чамци пловат со мала брзина до шест километри на час, со помош на елиса и четири придвижувачи напојувани од електрична батерија. Во зависност од видот и капацитетот на батеријата и количината на товар, чамецот ќе може да плови помеѓу 12 часа и 24 часа со едно полнење.
Чамците од далечина се управувани од компјутер, кој ги обработува податоците од камерите и сензорите кои ја скенираат областа околу пловниот објект, притоа водејќи сметка за неподвижни и подвижни предмети во водата. Електричните чамци се модуларни, така што лесно можат да се прилагодат за различни намени, односно превоз на товар или луѓе.
Програмерите велат дека им требаат уште две до четири години за да ја усовршат технологијата за автономна контрола на ваквите пловни објекти.
Покрај тоа, новите електрични роботизирани чамци ќе треба да се нагодат да маневрираат низ густиот сообраќај на каналите во Амстердам, преполни со приватни чамци и бродови со туристи.
„Сакаме да бидеме потполно сигурни дека чамците ќе се движат безбедно низ каналите“, вели инженерот за мехатроника Ренс Дорнбуш.
„Еден од следните чекори е да се осигураме дека можеме успешно да се справиме со каква било ситуација на која би можело да се наиде при навигација во каналите“, додава тој.
Исто така, има и правен аспект на проектот и се работи на подготовка на промените неопходни за да се овозможи автономна употреба на роботизирани чамци, без капетани и кормилари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Русија и се закани на Полска
Заменик-министерот за надворешни работи на Русија, Сергеј Рјабков се закани дека Русија ќе ги таргетира нуклеарните оружја и објектите на НАТО, доколку тие бидат распоредени во Полска. Тој рече дека заедничките нуклеарни мисии на НАТО во близина на руската граница се сметаат за закана за нејзината безбедност, пренесува руската државна агенција ТАСС.
„Да не кажам ништо за трајно распоредување, за што зборуваат жешките глави во Варшава. Затоа сите оние политичари кои разговараат за таква опција во Полска и во странство треба да разберат: соодветните капацитети неизбежно ќе бидат цел. Тие ќе бидат први на список на нашето воено планирање“, се закани тој.
Полска во понеделникот објави дека е подготвена да прифати нуклеарно оружје на своја територија доколку НАТО, чиј член е, одлучи да го зајакне своето источно крило бидејќи Русија распоредува ново оружје во Калининград и Белорусија.
„Доколку нашите сојузници одлучат да распоредат нуклеарно оружје на наша територија како дел од дистрибуцијата на нуклеарно оружје за да ја зајакнеме безбедноста на источното крило на НАТО, ние сме подготвени на тоа“, изјави Анджеј Дуда за весникот Факт.
„Војната меѓу Русија на Владимир Путин и НАТО би завршила со неизбежен пораз на Москва“, изјави денеска полскиот министер за надворешни работи Радослав Сикорски.
„Ние, Западот, не треба да се плашиме од конфликт со Путин, туку обратно“, рече Сикорски за време на говорот во Сејм, Долниот дом на полскиот парламент. Сикорски додаде дека рускиот воен и економски потенцијал „бледи во споредба со оној на Западот“, бидејќи НАТО има три пати повеќе воен персонал, три пати повеќе воздушен персонал и четири пати повеќе бродови од Русија.
Европа
Писториус: Русија произведува повеќе оружје отколку што и е потребно за војната во Украина
Германскиот министер за одбрана Борис Писториус тврди дека Русија произведува повеќе оружје отколку што и е потребно за да ја продолжи својата специјална воена операција во Украина.
Во интервју за телевизијата „АРД“, тој беше прашан дали го дели стравот на балтичките земји дека Русија ќе може да ја нападне територијата на НАТО за неколку години, тој одговори дека нема кристална топка за да ја предвиди иднината, пренесе ТАСС.
„Но, она што го велат воените експерти и специјалистите за оружје е дека Русија го зголемува производството на оружје“, рече тој.
Писториус истакна дека поголемиот дел од произведеното не се испраќа на фронт, туку оди во магацини. Според германскиот министер за одбрана, во случај на ескалација ќе биде вклучено целото НАТО.
„Во тој случај треба да можеме да се одбраниме, да водиме војна која ќе ни биде наметната. Затоа не штедиме напори за соодветно опремување на вооружените сили во Европа, во НАТО“, додаде тој.
Европа
Повеќе од сто килограми кокаин пронајдени меѓу банани во супермаркети во Германија
Вработени во неколку германски супермаркети во Берлин и Бранденбург откриле повеќе од 100 килограми кокаин во пакувања со банани, пренесува „Билд“ повикувајќи се на полициски извори.
Во Бранденбург, како што се наведува, во најмалку четири продавници биле пронајдени меѓу 20 и 100 килограми кокаин, пренесува „Танјуг“.
Полицијата во моментот спроведува истрага со проверка на стоката во продавниците поради што сѐ уште не се знае конечната количина дрога во нив, но не и информацијата во колку продавници има.