Свет
(Видео) Уапсени Палестинци кои го поддржуваат планот на Израел
Палестинската власт уапси неколку Палестинци кои се изјасниле дека го поддржуваат планот на Израел да ги примени своите закони на делови од Западниот Брег, пренесува „Франс прес“.
Во емисија емитувана во јуни на израелската телевизија израелскиот известувач за арапски работи Зви Јечезкели интервјуираше Палестинци на улица за нивните ставови за оваа проблематика. Многумина изразија надеж дека Израел навистина ќе го примени суверенитетот на областите во кои живеат.
„Сакам израелска лична карта“, вели еден Палестинец. Друг изјави дека не ги гледа Израелците како непријатели, туку дека нивната влада е непријател. Трет анкетиран рече дека го избрал Израел и дека не се плаши јавно да зборува.
Во друг извештај на „Брејтбарт“ објавен во истиот период беа добиени слични одговори.
„Мислам дека ќе биде подобро да се живее според израелскиот закон. Сè е подобро од палестинската власт што само ни ги украде парите“, изјави И. од северниот Западен Брег во анкетата.
Друг анкетиран рече: „Прашајте ме мене или некој од моите пријатели. Сите претпочитаме да бидеме под Израел. Можеби ќе имаме подобри работни места, поголеми плати, сè е подобро од ова“.
Извештајот на „Брејтбарт“ првично содржи идентификациски детали, вклучувајќи имиња и локации, со експлицитна дозвола на интервјуираните кои изјавија дека не се плашат да зборуваат за тоа што мислат. Сепак, откако дозна дека некои од интервјуираните од страна на Јечезкели биле уапсени од палестинската полиција, „Брејтбарт“ одлучи да ги редактира тие детали.
Извештајот на „Франс прес“ го цитира Јечезкели, кој вели дека најмалку шест Палестинци кои ги интервјуирал биле уапсени.
„Се изненадив кога видов дека иако ги замаглував лицата на сите луѓе кои ги снимав и ги модифицирав нивните гласови, Управата стигна до нив и уапси некои од нив, тоа е едноставно неверојатно“, рече Јечезкели за АФП.
Од Рамалах негираат дека уапсиле некого, но сепак се потврдени изјавите на палестинските извори, вклучително и оној кој рекол дека негов роднина неколку недели е во притвор кај палестинската полиција и наскоро треба да оди на суд откако му кажал на Јечезкели дека и покрај стравот од апсење, се надева дека Израел ќе им даде државјанство.
Т.н. Визија за мир на американскиот претседател Доналд Трамп предвидува Израел да анектира 30 отсто од Западниот Брег и долината на Јордан. Исто така, се разграничува демилитаризирана палестинска држава основана на поголемиот дел од Западниот Брег со делови од источен Ерусалим, кои се наоѓаат надвор од израелската безбедносна ограда, како нејзин главен град.
Официјални претставници на Палестинската самоуправа предупредуваа за трета Интифада ако Израел продолжи со плановите за анексијата. Палестинското раководство предупреди и дека еднострано ќе прогласи држава заснована на линиите од пред 1967 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двегодишното девојче кое исчезна во Србија се бара насекаде, полицијата врши распити на голем број лица
Потрагата по девојчето Данка Илиќ (2), кое во вторникот исчезна во Бањско поле во Бор, се уште трае и не се знае како е можно девојчето да се изгуби. Полицијата ја проверува секоја информација што ќе дојде до нив, сослушани се неколку лица, повторно се разговараше со родителите, но ниту една информација не укажува на тоа што се случило и каде е Данка, пишува „Нова.рс“
Екипата на порталот денеска беше во Бањско поле каде се уште има голем број полицајци. Властите со багер го чистеа теренот околу куќата во која последен пат била видена Данка. Исто така, на имотот е извршено ископување, а јамите повторно се пребаруваат.
Полицијата ја истражува секоја трага што може да укаже на тоа што се случило со девојчето.
„Полицијата разговараше со голем број луѓе, соседи, познаници, се со цел да ја пронајде Данка. Досега ниту една трага не довела до тоа каде е девојчето или што и се случило“, вели изворот на Нова.рс.
Истрагата се одвива во повеќе правци, а денеска полицијата повторно разговараше со родителите на девојчето.
„На вториот ден од нејзиното исчезнување, родителите на девојчето биле во полиција до доцна во ноќта. Тие утрово биле повторно повикани, а исто така цел ден поминале во полициска станица. Не се познати околностите врз основа на кои два дена биле на распит. Извесно е дека родителите вчера имале разговори и со Центарот за социјална работа, а повеќе од тоа не се знае“, додава изворот на „Нова.рс“.
Неофицијално беше објавено и дека полицијата нашла нова трага, односно дупка на местото на кое исчезна девојчето, и дека целото внимание го насочува кон тоа.
Она што е сигурно е дека се проверуваат сите околности и се сослушуваат и сите лица кои можеби имаат сознанија за случајот.
Меѓу нив е и кој бил зад воланот на автомобилот „пунто“ што го снимиле надзорните камери на куќата во Бањско Поље, во моментот на исчезнувањето на малата Данка. Куќата пред која е снимен автомобилот се наоѓа на стотина метри од местото каде исчезна Данка.
На снимката се гледа автомобил кој брза околу 13 часот и 47 минути, а малото девојче исчезнало малку пред тоа, околу 13 часот и 45 минути, како што вели нејзината мајка.
„Ја знам таа жена, ја видов како носи две деца во парк, страшно е што се случи“, велат соседите.
Девојчето Данка Илиќ исчезна во вторникот во Бањско Поље кај Бор. Во средата по 27 часот полицијата ја прекина потрагата и започна друг вид на акција за пронаоѓање на детето. Во ова мало место кај Бор се уште остана одреден број полицајци, а вчера беше блокиран и пристапот до куќата.
Во потрагата по исчезнатото дете се вклучени припадници на Жандармеријата, пожарникари, планинска спасувачка служба, како и голем број доброволци.
Регион
„Само се шалевме“ – уапсените поради тврдењата за исчезнатото девојче се донесени во полиција
Тројцата кои беа уапсени во Босна и Хервеговина, а тврдеа дека имаат информации за исчезнатото девојче од Србија, Данка Илиќ и бараа пари, во полиција рекле дека „само се шегувале“, пренесува Н1 Сараево.
Федералната полициска управа вечерва уапси три лица кои на социјалните мрежи тврдеа дека имаат информации за исчезнувањето на двегодишното девојче од Србија, Данка Илиќ, по коешто трага речиси целиот регион.
Како што јави известувачот на Н1, уапсените биле донесени во зградата на Федералната полициска управа.
Како што се дознава, за време на преносот во живо на „Тик-ток“, тие побарале десетици евра за да ја откријат локацијата на девојчето и тврделе дека ја чуваат во подрумот.
Веднаш по апсењето изјавиле дека „само се шегувале“. Сите уапсени се членови на исто семејство.
Инспекторите на Одделот за компјутерски криминал на Федералната полициска управа преку ИП адресата ги лоцираше лицата кои тврделе дека имаат информации за исчезнувањето на детето.
Вчера на социјалните мрежи се појави видео од надзорната камера на куќа лоцирана во близина на местото каде исчезна Данка Илиќ во 13:45 часот.
На видеото се гледа автомобил кој брза во 13 часот и 47 минути, а малото девојче исчезнало малку пред тоа, односно во 13 часот и 45 минути, како што рекла нејзината мајка.
Свет
Тешка автобуска несреќа во Јужна Африка, загинаа 45 лица
Министерството за транспорт на Јужна Африка денеска соопшти дека 45 лица загинале, а едно лице е повредено во автобуска несреќа кај Маматлакала во северната провинција Лимпопо.
Министерството објави дека возачот изгубил контрола над автобусот, кој потоа удрил во бариерите на мостот, по што возилото паднало преку мостот, удрило во земјата и се запалило.
Автобусот превезувал луѓе од Боцвана до Морија, град во Лимпопо.
Спасувачките операции продолжија до доцна денеска.
Некои тела изгореле до непрепознатливост, а некои патници останале заробени во урнатините на автобусот, соопштија сообраќајните власти во Лимпопо.