Свет
(Видео) Хамас лансира над 400 ракети кон Израел во најжестокиот борбен судир од 2014 година
Палестинските милитанти утрово кон Израел лансираа најмногу ракети од конфликтот во 2014 година предизвикувајќи израелски воздушни напади врз телевизијата на Хамас и други цели во Појасот Газа.
Разгореното насилство, во кое загинаа петмина Палестинци и еден Израелец, се заканува да ги уништи заедничките напори на ОН, Египет и на Катар за постигнување мировен договор за Блискиот Исток.
Хамас, исламистичкото движење што управува со Газа и други вооружени фракции, преку границата лансирала над 400 ракети и минофрлачки гранати.
Тоа е одмазда за акцијата на израелските специјални сили во Газа, во која беше убиен еден од командантите на Хамас и шест други члена на движењето. Во таа операција загина и еден израелски војник.
Сирените во јужниот израелски град Ашкелон ги предупредија жителите да се упатат кон засолништата за вонредни ситуации. Во ракетните напади погодени се неколку куќи, а израелската армија објави дека нивниот противракетен систем пресретнал и уништил повеќе од 100 палестински ракети.
Израел одговори со десетици воздушни напади врз разни цели вклучувајќи го и седиштето на разузнавачката служба на Хамас и телевизијата „Ал-Акса“, чии работници однапред добиле предупредување од израелската армија да се евакуираат.
Премиерот Бенјамин Нетанјаху свика итен состанок на кабинетот за да се разговара за идните чекори, а армијата објави дека испратила дополнителна пешадија и оклопни сили на границата со Газа.
Палестинските милитантни групи издадоа соопштение во кое се предупредува дека Ашдод, големо израелско пристаниште, и Биршеба, најголемиот град во јужен Израел, ќе бидат следната цел доколку Израел не ги запре вооружените акции.
Египет го повика Израел да се повлече, а САД го обвинија Хамас.
Израелската армија проценува дека Хамас и исламскиот џихад имаат повеќе од 20.000 ракети и гранати во разновиден калибар и опсег вклучувајќи ги и оние што може да стигнат до Тел Авив и Ерусалим.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во Јапонија пет лица починале од суплементи
Во неделата од почетокот на повлекувањето на серијата јапонски медицински додатоци, пет лица починаа, а повеќе од 100 лица досега се хоспитализирани, јавува Асошиејтед прес (АП).
Компанијата „Kobayashi Pharmaceuticals“ од Осака се најде на удар на критики бидејќи не излезе веднаш во јавноста со проблемите кои беа познати внатре во компанијата уште во јануари и првото јавно соопштение за тоа го објави дури на 22 март, пренесува медиумот.
Претставници на компанијата рекоа дека 114 лица биле лекувани во болниците откако ги земале производите, вклучително и „Benikoji choleste help“, која има за цел да го намали холестеролот и содржи состојка наречена беникоџи, еден вид црвена мувла.
На почетокот на неделава две лица починаа откако го земале производот. Некои луѓе развиле проблеми со бубрезите, но точната причина сè уште се истражува во соработка со владините лаборатории, рече производителот.
„Длабоко се извинуваме“, изјави денеска претседателот Акихиро Кобајаши на новинарите, пишува АП.
Тој изрази каење за загинатите и заболените, како и за нивните семејства.
Тој, исто така, се извини за проблемите предизвикани на целата индустрија за здрава храна и лекарската фела, додавајќи дека компанијата работи на спречување на дополнителни штети и подобрување на управувањето со кризи.
Производите на компанијата се отповикани – како и десетици други производи кои содржат беникоџи, вклучувајќи мисо паста, крекери и прелив со оцет.
Јапонското Министерство за здравство на својата официјална веб-страница објави список на сите повлечени производи, вклучувајќи ги и оние каде што беникоџи се користеше за бојадисување храна.
Свет
Наскоро ќе можеме да ја видиме космичката експлозија со голо око, се гледа еднаш во животот
Небесен танц меѓу две ѕвезди оддалечени 3.000 светлосни години ќе резултира со експлозија толку сјајна што ќе биде видлива со голо око со денови, изјавија денеска астрономите од Универзитетот Нотингем Трент.
Експлозијата што се случува еднаш во животот во системот T Coronae Borealis ќе се појави како нова ѕвезда која силно свети на ноќното небо пред да избледи и исчезне во следните 80 години. Професорот Даниел Браун објаснува дека овој небесен настан се нарекува „нова“, кога осветленоста на ѕвездата брзо се зголемува.
Според него, не е лесно да се предвиди кога ќе следи тој настан, но верува дека тоа може да се случи во секое време до септември.
„Ни претстои задоволство, ќе видиме таканаречена нова ѕвезда на небото“, рече Браун и истакна дека T Coronae Borealis не е само една ѕвезда, туку две ѕвезди кои орбитираат една околу друга. „Она што го прави овој пар толку исклучителен е тоа што одвреме навреме ја зголемува својата светлина толку многу што станува лесно видлива за нас“, рече астрономот.
Помасивната ѕвезда во парот е бело џуџе, кое во обем колку нашата Земја може да има иста маса како и нашето Сонце, рече Браун. Придружникот во тој пар беше старечки црвен џин кој се ширеше и го депонираше својот материјал на белото џуџе.
„Речиси на секои 80 години, бело џуџе собира доволно материјал за да се запали во термонуклеарна експлозија и во голема мера да ја засили својата светлина“, рече Браун.
„Сега е време за уште една ваква експлозија за T Coronae Borealis, чија светлина едвај видлива со двоглед на темното небо, ќе се зголеми и ќе биде споредлива со ѕвездите во системот Плуг и ќе биде видлива за голо око дури и на загаденото небо. „Новата“ ќе стане видлива во близина на соѕвездието Херкулес“, додаде тој.
Астрономите објаснуваат дека „новите“ во суштина се како водородни бомби.
Свет
Се отстранува срушениот мост во Балтимор, пристигна кран кој може да подигне 1.000 тони
Најголемиот кран на светот се преместува од источниот брег на САД во Балтимор за да започне денеска со отстранување на мостот кој се урна кога брод удри во него и го блокираше виталното пристаниште на градот.
Дел од мостот во Балтимор се урна откако контејнерски брод удри во него рано наутро во вторникот, со што повеќе возила завршија во водата. Од ледената вода се извлечени телата на двајца работници, а потрагата по уште четворица исчезнати во несреќата е прекината.
Гувернерот на американската сојузна држава Мериленд, каде се наоѓа Балтимор, Вес Мур, изјави дека кранот може да подигне до 1.000 тони и дека ќе се користи барем уште еден кран за отстранување на урнатиот мост.
Плановите за отстранување на мостот ги развиваат инженерскиот корпус на армијата на САД и морнарицата, кои мобилизираат ресурси од целата земја за да го исчистат водениот пат во рекордно време.
Мур рече дека не се работи само за државата Мериленд, туку и за економијата на земјата, бидејќи низ пристаништето Балтимор минуваат повеќе автомобили и земјоделска опрема од кое било друго пристаниште во Америка.
Гувернерот предупреди дека работата може да потрае долго и се заблагодари на администрацијата на американскиот претседател Џо Бајден што одобрила итна помош од 60 милиони долари. Бајден рече дека федералната влада ќе ги плати сите трошоци за обнова на мостот.
Штетата предизвикана кога контејнерски брод изгуби струја и удри во столб за потпора на мостот во вторникот вечерта е голема. Нуркачите ги извлекоа телата на двајца мажи од возило во реката во близина на средината на мостот во средата, но властите рекоа дека морале да започнат со расчистување на мостот пред некој да стигне до телата на уште четворица исчезнати работници.
Полицијата соопшти дека врз основа на снимки од сонар, нивните возила изгледале како затрупани со огромна количина бетон и метал.
Сојузните и државните власти велат дека ударот на бродот врз мостот што го предизвикал неговото уривање е, според сите пресметки, несреќа. Луѓето кои биле дел од групата работници кои ги поправале дупките на мостот загинале, тие биле од Мексико, Гватемала, Хондурас и Ел Салвадор во моментот на несреќата, изјавија официјални лица. Најмалку осум лица паднале во водата кога бродот удрил во столб на мостот, а двајца биле спасени истиот ден.
Во ударот мостот се скршил и за неколку секунди паднал во водата. Надлежните едвај имаа време да го запрат сообраќајот преку мостот, но немаа време да ги предупредат работниците на пристаништето, прашање на секунди беа кога од бродот пријавија дека им откажала струјата.