Свет
Внатрешни несогласувања ја одложија посетата на израелската делегација на ОАЕ
Внатрешните несогласувања доведоа до одложување на посетата на израелската делегација на Обединетите Арапски Емирати за финализирање на деталите за договорот за нормализирање на односите меѓу двете земји, објави израелскиот весник „Хаарец“.
Весникот наведува дека несогласувањата се појавиле околу составот на израелска делегација која ќе патува во заливската држава. Премиерот Бенјамин Нетанјаху го овласти шефот на израелскиот Совет за национална безбедност, Меир Бен Шабат, да ја формира делегацијата.
„Израелската делегација што требаше да замине во ОАЕ за тие разговори е одложена поради несогласувањата за поделбата на власта помеѓу Советот за национална безбедност, Мосад и Министерството за надворешни работи“, пишува „Хаарец“.
Според весникот, претставници на Министерството за надворешни работи веќе отпатувале во Абу Даби за да ги проверат зградите во кои може да биде сместена израелската амбасада.
„Хаарец“ пишува дека многу членови на кабинетот, особено оние од коалицијата „Бели и сини“ на министерот за одбрана Бени Ганц, се лути поради начинот на кој Нетанјаху ги спроведуваше разговорите со ОАЕ, заобиколувајќи го Министерството за надворешни работи и неинформирајќи ги Ганц и министерот за надворешни работи, Габи Ашкенази.
„Наместо да користи луѓе од Министерството за надворешни работи, кои со години работеа на зајакнување на врските со ОАЕ, Нетанјаху ги испрати својот близок соработник, шефот на Мосад, Јоси Коен и амбасадорот во САД, Рон Дермер, практично сами да ги спроведат“, пишува весникот.
Според извештајот, разговорите меѓу Израел и ОАЕ се одвиваат во изминатите два месеца откако американската администрација предложи да се одложи планот за анексија во замена за нормализирање на односите со заливската држава.
ОАЕ е првата земја од Заливот и трета арапска земја што има воспоставено целосни дипломатски односи со Израел, по Египет и Јордан.
И покрај извештаите дека договорот го стопира контроверзниот план на Израел за анектирање делови од Западниот Брег, Нетанјаху ја потврди континуираната посветеност на неговата влада за планот за анексија. Палестинските групи го осудија договорот, велејќи дека не прави ништо за палестинската кауза и ги игнорира правата на Палестинците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
„Во семејството не смее да постои ниту една тајна, верувам дека детето е со некого и дека не е надвор“: Јуриќ за случајот со исчезнатата Данка
Основачот на Центарот за исчезнати и малтретирани деца, Игор Јуриќ учествувајќи во емисија во живо кажа нови детали од истрагата за случајот со исчезнатата Данка Илиќ, објаснувајќи зошто потрагата на терен била прекината по 27 часа.
„Не, тоа апсолутно не значи дека некои работи се откриени, напротив, значи само дека нема потреба да се троши работна сила и да се насочува енергија кон тој дел од теренот, кој е целосно и темелно прегледан. Штом немаме дополнителни информации, истрагата продолжува, сега истрагата тргна во друга насока и сега се вршат некои оперативни дејствија поврзани со сознанијата за самата девојка“, изјави Јуриќ.
Тој вели дека во случаите на исчезнување на детето, родителите мора да споделат сè со полицијата, дури и најинтимните семејни тајни, кои можат да бидат важни во тие моменти.
„Кога зборуваме за овие ситуации, кога детето ќе исчезне, едноставно не смее да има никакви тајни во семејните односи, напротив, треба целосно да и помогнете на полицијата. Ако имате каква било ситуација што може да доведе до несакан настан, во случајов исчезнување на мало девојче, мора да кажете сè што знаете“.
Основачот на Центарот за исчезнати и малтретирани деца, вели дека во деновите кога не знаеле каде е неговата ќерка Тијана Јуриќ, посакувал некој да излезе и да побара откуп.
„Навистина верувам и го чекам соопштението на полицијата за да видам кое е конечното решение за оваа драма, но дефинитивно бев среќен што детето не беше пронајдено на тој простор, особено таа прва вечер, бидејќи тешко дека детето може да преживеало таму во тие услови. Кога исчезна Тијана се надевавме дека некој ќе ни побара откуп и дека е жртва на киднапирање, некако сега се надевам дека има шанси детето поради некоја причина да е со некои луѓе и да е уште живо. Таа надеж постои во нашите глави, но од нашето искуство мораме да бидеме подготвени за најлошите вести.
Според него, добро е што е пребарана областа и последната надеж е дека некој е вмешан и дека детето е скриено поради некоја причина.
„Сега очекувам дека оперативците на МУП ќе завршат добра работа и дека конечно ќе ја дознаеме вистинската вистина.
Игор Јуриќ зборуваше и за активирање на системот „Најди ме“.
„Системот го активираат началниците на полициските одделенија, во случајов тоа беше полициското одделение каде што детето исчезна. Кога ќе се процени дека детето е во опасност, системот се активира. Она што беше специфично во овој случај е дека детето е екстремно мало, самите околности беа многу чудни и полицијата брзо реагираше и поради возраста на детето темелно го пребара теренот.
„Полицијата се погрижила да не го загрози дополнително животот на детето и да ги истражи сите околности, детето да не биде жртва на киднапирање, да не се бара откуп и слично, затоа системот бил активиран околу 7: 00 часот“, објаснува тој.
Европа
(Аудио) Кралот Чарлс ја испрати првата јавна порака по дијагнозата на здравјето на Кејт
Порака од кралот Чарлс беше емитувана денеска по повод годишната служба на Величетврток.
Аудиообраќањето на Чарлс беше емитувано на собранието во катедралата „Ворчестер“ во негово отсуство поради тековното лекување на ракот на монархот.
Тој им порача на сите „да ја подадат раката на пријателството“.
„Актот на богослужба, овде во катедралата ‘Ворчестер’, ме потсетува на заклетвата што ја дадов на почетокот на моето крунисување да го следам примерот на Христос ‘да не ми служат, туку да служам’“, рече кралот.
„Тоа е она што секогаш се трудев да го правам и правам со целото мое срце“, додаде тој.
Кралот дојде на тронот пред 18 месеци, а на почетокот на годината му беше дијагностициран рак поради што беше подложен на хемотерапија.
Европа
Заменик-началникот на генералштабот: Британија може да се бори со Русија само 2 месеца
Британските вооружени сили мора да управуваат со оперативниот ризик, што произлегува од недостигот на ресурси што би сакале да ги имаат во идните војни, пишува „Телеграф“.
Информациите се појавија откако Грант Шапс, министерот за одбрана, им рече на пратениците дека лобирал кај премиерот, Риши Сунак, и министерот за економија и финансии, Џереми Хант, повеќе пари во буџетот да се потрошат за одбраната, но не успеал да обезбеди зголемување.
За време на сослушувањето пред пратениците во Комитетот за одбрана на долниот дом, висок офицер на кралските маринци рече: „Ние бевме многу јасни дека сумата што моментно ја трошиме за муниција не ги покрива трошоците во сите области и заканите со кои се соочуваме“.
„Бевме јасни дека треба да потрошиме повеќе пари над буџетот, на она што го нарекуваме интегрирани противвоздушни ракети“.
На прашањето на Марк Франсоа, поранешен министер за вооружени сили, дали е вистина оти Обединетото Кралство „не може да се бори со Владимир Путин повеќе од неколку месеци во целосна воена ситуација поради недостиог на резерви муниција и опрема, Шапс додаде дека секој таков конфликт ќе се води заедно со сојузниците од НАТО, кои заедно би можеле да ја совладаат Русија, наместо само Велика Британија.
„За луѓето што гледаат и слушаат дека Велика Британија не е подготвена за војна исклучиво со Русија, важно е да разберат дека сме во НАТО и постои меѓусојузнички одбранбен договор Член 5, така што никогаш не би биле во таква ситуација“.
Во еден извештај пратениците рекоа дека на вооружените сили им требаат повеќе средства за „учество во операции додека развиваат воена готовност“ или ќе мора да го намалат „оперативниот товар“ на војската.
Поранешните воени началници на комитетот му кажаа дека вооружените сили се ослабени од 2010 година и дека „во конфликт со еднаков противник тие ќе бидат исцрпени по првите неколку месеци од распоредувањето“.
Шапс исто така им рече на пратениците дека лекциите научени од војната во Украина ја покажале важноста на војната со беспилотни летала бидејќи е смртоносна и евтина.
„Ова во Украина е веројатно првата вистинска војна со беспилотни летала и мислам дека никогаш повторно нема да видиме војна која не вклучува тешка употреба на беспилотни летала“, рече тој.
Минатиот месец Обединетото Кралство објави дека, заедно со Латвија, ќе ја предводи новата коалиција за испорака на илјадници беспилотни летала „камикаѕе“ во Украина во услови на растечки недостиг на муниција на фронтот.
„Дроновите ги нарушуваат нормалните факти за војната. Обично секоја генерација станува поскапа за да има смртоносен ефект, но всушност беспилотните летала, кои понекогаш чинат неколку илјади фунти, може да бидат крајно смртоносни“, рече Шапс.
Сепак, тој предупреди дека „основното војување и муницијата“ остануваат важни во секој иден конфликт.