Свет
Во американски град со 150.000 хотелски соби луѓе спијат на паркиралиште
Карантинот поради коронавирусот, што стапи во сила во повеќето сојузни американски држави, стана проблем за бездомната популација, која на западот од САД брои над 50.000 луѓе.
Во Лас Вегас, Невада, поради еден случај на инфекција, затворен е прифатен центар за бездомници, во кој имало 500 кревети, па градските власти отворија засолниште за бездомници – на паркинг. Неверојатните фотографии од бетонот на кој се исцртани квадрати, кои служат како потсетници за одржување на потребното растојание, предизвикаа гнев на социјалните мрежи, но градските власти се правдаат дека за бездомниците обезбедиле и душеци, кои сè уште не се во доволен број. Сепак, и ваков вид сместување значи многу за некои луѓе.
„Ќе се расплачам од среќа. Се чувствувам убаво и безбедно тука, не е како на улиците“, вели бездомничката Дениз Ленкфорд.
Таа и другите бездомници на паркингот нема да бидат тука предолго бидејќи набргу се очекува да се отвори црковно засолниште, но дотогаш ќе мора да спијат на бетонот.
Лас Вегас, кој е познат како престолнина на коцкањето, поради коронавирусот, ги затвори сите 113 хотели, во кои вкупно има 150.000 соби, па некои корисници на социјалните мрежи ги критикуваа градските власти кои не покажале иницијатива барем на неколку дена да ги сместат бездомниците во некој од хотелите.
Меѓу нив е и Џулијан Кастро, поранешен претседателски кандидат, кој исто така беше и во тимот на Барак Обама. Тој предупреди на репресијата кон бездомниците, кои градот Лас Вегас од неодамна ги казнува со 1.000 долари ако спијат или лежат на градски површини.
Во државата Невада има приближно 6.500 бездомници, повеќето од нив во Лас Вегас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас: Ќе станеме политичка партија ако се формира палестинска држава
Заменик-претседателот на политбирото на Хамас за Газа, Калил ал-Хаја, рече дека палестинската милитантна група е подготвена да се договори за петгодишно примирје со Израел и да се претвори во политичка партија доколку се формира палестинска држава со границите од 1976 година.
Ал Хаја, претставник на Хамас во преговорите за прекин на огнот и враќање на заложниците, рече дека групата ќе прифати „целосно суверена палестинска држава на Западниот брег и Појасот Газа и враќање на палестинските бегалци во согласност со меѓународните резолуции“.
Во интервју за „Асошиетед прес“ тој додаде дека во тој случај военото крило на Хамас ќе биде распуштено.
„Сите искуства на луѓето што се бореле против окупаторите, кога се осамостоија и ги освоија своите права и својата земја, се претворија во политички партии, а нивните борбени сили се претворија во национална армија“, рече тој.
Тој оцени дека долго најавуваната израелска копнена офанзива во градот Рафа нема да го победи Хамас.
Свет
Погодена железница во Украина, оштетен и облакодер: Русите нападнаа со моќниот „Искандер“
Руски проектил оштети критична инфраструктура и повреди шест лица во регионот Черкаси во централна Украина, изјави регионалниот гувернер.
Во нападот беше погодена цивилната и железничката инфраструктура во градот Смила, изјави портпаролот на украинските воздухопловни сили, Илја Јевлаш, во телевизиски пренос. Според првичните информации, во нападот бил употребен проектил „Искандер-К“, додаде Јевлаш.
Оштетени се и 47 приватни станбени згради и искршени се прозорци во станбена висококатница, објави на „Телеграм“ гувернерот на Черкаси, Ихор Табурец. Украинската воздушна одбрана ја собори воздушната цел, рече тој, додавајќи дека службите за итни случаи се на терен.
Руските сили претходно ја оштетија железничката инфраструктура во нападот на реонот на Днепар на 19 април, како што објавија украинските железници „Укрзализница“ на „Телеграм“.
Свет
(Видео) Пратеник во ЕУ пушти гулаб во знак на мир
Словачки пратеник во Европскиот парламент денеска привлече внимание со пуштање жива птица од говорницата по својот говор. Како што рече, тоа го направил во знак на мир во светот.
На збунетост и изненадување на присутните претставници во Стразбур, Мирослав Радачовски, лидер на десничарската партија Словачки патриот, посегна во чантата што ја имаше под јакната и го пушти гулабот да одлета во собраниската сала.
Тој рече дека „сака мир за целиот свет, за Русите и Украинците“.
„Би сакал да го ослободам овој гулаб како симбол на мирот, да симболизирам дека на Европа ѝ треба мир. Да оставиме овој гулаб да нѐ обедини сите“, рече Радачовски.
Сепак, иако сакаше да ги обедини присутните, некои ги згрози.
Каролин Руз, француска пратеничка во Европскиот парламент од редовите на зелените, го критикува велејќи дека користел живо животно за да даде политичко мислење, што е спротивно на правилата на парламентот.
„Тој употреби животно, скриено во неговата торба како едноставен предмет, само за да даде изјава за мир денес. Што ќе направите за да го вратите ова животно, господине? Каде е благосостојбата на животните во гестот на овој говорник? Сметам дека ова е апсолутно неприфатливо“, рече Руз.
Додека птицата леташе во салата, друг колега го праша Радачовски: „Можеш ли да ја фатиш“.
Јан-Кристоф Отјен, заменик-претседател на парламентот, рече дека инцидентот ќе биде пријавен кај претседателот на домот, додавајќи: „Се надеваме дека животното ќе биде добро“.