Европа
Во Италија веќе не се пее на балконите, владее страв од сиромаштија и од мафија
Неколку дена по прогласувањето карантин во цела Италија, луѓето почнаа да пеат и да свират од терасите.
Три недели подоцна песната престана, а социјален немир се појави кај голем дел од населението, особено во најсиромашниот југ, а нацијата сфаќа дека сето тоа не е добро, пренесува „Гардијан.
„Тие веќе не пеат и не танцуваат на балконите“, рече Салваторе Мелузо, свештеник во црквата „Каритас“ во Неапол.
„Сега луѓето се плашат уште повеќе, не толку од вирусот, туку од сиромаштијата. Многумина се без работа и гладни. Во јавните кујни има долги редици“, рече свештеникот.
„Гардијан“ исто така пишува дека полицијата ги обиколува поголемите продавници и внимава на кражбите. Оние шт се самовработени и оние што работат на договори што не гарантираат социјални бенефиции, останале без плати, а многу мали работодавци ги затвориле своите фирми и прашање е дали и кога ќе ги отворат.
„Гардијан“ додава дека има знаци оти криминалците ја искористуваат ситуацијата. Во тек е истрага за активностите на фејсбук-групата „Национална револуција“, која ги охрабрувала луѓето да крадат во продавниците.
Леолука Орландо, градоначалник на Палермо, побара од владата да воспостави основен приход за опстанок на најсиромашните граѓани затоа што тие стравуваат дека криминалците би можеле да промовираат криминал.
Официјалните лица се загрижени дека мафијата ќе ја искористи лошата ситуација за да ги регрутира луѓето.
„Криминалците имаат многу пари и сега луѓето би можеле да почнат да работат за нив. А штом ќе почнат да работат за нив, веќе не престануваат“, додаде Орсина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.
Европа
Нова корупциска афера во Украина, осомничен министер за земјоделство
Украинската антикорупциска полиција го именуваше министерот за земјоделство Микола Солски како осомничен во кривичната истрага за незаконско стекнување на државно земјиште во вредност од седум милиони долари.
Солски, кој го надгледува производството на жито во Украина за време на војната од март 2022 година, рече дека не разбира зошто сега се појавија наводите поврзани со настаните од 2017 и 2018 година.
„Не се согласувам со обвинувањата“, им рече тој на новинарите во Киев откако Украинското национално биро за борба против корупцијата објави соопштение со резултатите од истрагата.
Канцеларијата соопшти дека министерот го предводел планот за стекнување на државно земјиште во вредност од околу 6,9 милиони евра и обид да се стекне земјиште во вредност од 190 милиони гривни.
Солски е првиот министер во владата на претседателот Володимир Зеленски кој е осомничен во корупциски скандал.
Зеленски се обидува да спроведе стапка на нулта толеранција за корупција, а минатата година го отпушти министерот за одбрана поради обвинувања за примање мито поврзани со одбранбената индустрија.
Законодавците изминативе денови порачаа дека очекуваат реконструкција на Владата, секако до крајот на пролетта.