Европа
Во поранешниот берлински аеродром наскоро ќе се вакцинираат по 4.000 луѓе дневно
Големиот натпис „Добре дојдовте“ сè уште виси пред берлинскиот аеродром Тегел, кој месецов беше затворен засекогаш.
Но, наскоро се очекува илјадници луѓе повторно да минуваат низ неговите врати, откако преуредената зграда на терминалот Ц од средината на декември ќе стане центар за вакцинација против коронавирус.
Германија се надева дека ќе ја зајакне имунизацијата во првиот квартал од 2021 година и веќе ги поставува основите на 60 центри низ целата земја.
Иако министерот за здравство Јенс Шпан инсистира на тоа дека вакцинацијата не треба да биде задолжителна, канцеларката Ангела Меркел во четвртокот пред парламентот изјави дека вакцината за Германија претставува светло на крајот од тунелот.
Германската сојузна влада ќе биде одговорна за набавката и испораката на вакцината, а сојузните покраини ќе обезбедат опрема и ќе изберат места за центрите каде што ќе се врши вакцинацијата.
„Во Тегел ќе вакцинираме помеѓу 3.000 и 4.000 луѓе на ден“, изјави за „Франс прес“, Албрехт Броме, одговорен за формирање на центрите за вакцинација во германската престолнина.
Уште еден поранешен аеродром Темпелхоф, кој во минатото наизменично се користеше како центар за бегалци, велодром и лизгалиште, ќе се претвори во центар за вакцинација.
Во шест центри распоредени во четири главни пунктови, треба да биде можно да се вакцинираат по 20.000 луѓе дневно во градот со 3,8 милиони жители, изјави берлинската министерка за здравство, Дилек Калајчи.
Реализацијата на овој проект ќе биде огромен предизвик, признава министерката, додавајќи дека приоритет ќе имаат здравствено чувствителни групи и оние кои се особено изложени на вирусот, како што се здравствените работници. Центрите ќе бидат отворени секој ден од 9 до 19 часот, вклучително и за време на викендите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Полските земјоделци повторно ја блокираа границата кон Германија
Полските земјоделци повторно го блокираа најфреквентниот граничен премин меѓу Германија и Полска, веднаш до градот Франкфурт на Одра, што предизвика сообраќаен метеж од двете страни на границата.
„Во Франкфурт и Губен се блокирани граничните премини, а во самиот Франкфурт се формираат големи толпи“, соопшти полицијата во Франкфурт на Одра во сојузната покраина Бранденбург.
Според најавите на земјоделците, блокадата ќе трае до среда.
Земјоделците со недели протестираат против политиката на Европската унија во врска со субвенциите за земјоделството. Една од причините за протестот е увозот на поевтини земјоделски производи од Украина.
А од германска страна, земјоделците со недели протестираат против политиката на германската влада и укинувањето на субвенциите за гориво.
Во неколку наврати поради блокади се случија сообраќајни незгоди. Пред неколку дена земјоделците истуриле ѓубриво на патот кај Берлин, по што се случила сообраќајна несреќа со неколку повредени.
Земјоделците во неколку наврати ги нападнаа и колоните во кои имаше членови на владата, членови на партијата на Зелените, кои земјоделците ги обвинуваат за аграрната политика на владата.
Европа
Путин вечерва слави „победа“ на Црвениот плоштад: „Доби 76 милиони гласови“
Изборната комисија на Русија денеска ја поздрави „рекордната“ победа на Владимир Путин на претседателските избори, велејќи дека тоа е доказ за национално единство во светлината на неговиот напад врз Украина, и покрај репресијата на опозицијата.
„Тоа е рекорден показател. Речиси 76 милиони гласови“, изјави Ела Памфилова, шеф на изборната комисија. Путин доби 87,29 отсто од гласовите, од 99,76 преброени.
Путин, кој е на власт речиси четвртина век, постигна 10 процентни поени подобро отколку во 2018. Официјалните резултати ќе бидат објавени во четврток. Путин немаше вистински противник на изборите.
Прославувајќи ја победата во неделата вечер, тој рече дека Русија е „консолидирана“ со неговата победа и дека нема да дозволи да биде „поддржана“ од противниците.
Руските државни медиуми и официјални лица го слават „единството“ на Русите, нивната „колосална“ поддршка за Путин и „неверојатната“ консолидација околу него.
Вечер на Црвениот плоштад треба да се одржи концерт по повод победата на Путин. Тоа се совпаѓа со 10-годишнината од анексијата на Крим во 2014 година, почетокот на агресијата против Украина која кулминираше со инвазијата на 24 февруари 2022 година.
Во неделата Путин изрази задоволство од „внатрешната политичка консолидација“ и го повтори лајтмотивот Русија да се спротивстави на западниот непријател.
„Не е важно кој сака да нè згази. Не успеа денес и нема ниту во иднина“, рече 71-годишниот Путин.
Сепак, цела недела беше одбележана со бомбардирања и упади на борци од Украина за да и покажат на Русија дека не е безбедна на нејзина територија.
Путин, кој би можел да се кандидира и за функцијата во 2030 година и со тоа да остане на власт до 2036 година, во своето обраќање до граѓаните ги поздрави војниците кои се борат во Украина, кои, според неговите зборови, ги штитат „историските територии на Русија“, потврдувајќи уште еднаш дека тој има империјалистички амбиции, откако веќе анектирал пет украински региони.
Тој оцени дека руските сили имаат „целосно иницијатива“ на фронтот. Нивниот напредок засега е ограничен, но тој смета на дополнително слабеење на западната поддршка за Киев.
Во Русија веќе никој не може да му се спротивстави.
Опозицијата сепак протестираше на изборите. Јулија Навална ги повика приврзаниците на нејзиниот покоен сопруг да гласаат во исто време, в недела напладне. Таа гласаше по неколкучасовно чекање во голема толпа пред руската амбасада во Берлин.
„Го напишав името на Навални (на билетот) бидејќи не е можно еден месец пред изборите да биде убиен главниот противник на Путин, кој веќе беше во затвор“, рече таа.
Путин оцени дека дејствијата на опозицијата биле „без ефект“.
Соработниците на Навални оценија дека изборната победа на Путин „нема никаква врска со реалноста“. Западните престолнини беа, исто така, во голема мера критични за претседателските избори во Русија, одржани по неколкумесечна немилосрдна репресија врз опозицијата.
Европа
НАТО ја гради најголемата воена база во Европа на Балканот
Романија ја започна изградбата на најголемата европска воена база на НАТО. Трансатлантскиот блок се обидува да ги зајакне своите способности во регионот на Црното Море.
Проектот вреден 2,7 милијарди долари ќе ја прошири 57-мата воздухопловна база Михаил Когалничеану на романските воздухопловни сили, лоцирана во близина на пристанишниот град Констанца на Црното Море.
Новиот објект ќе има периметар од речиси 32 километри, ќе се простира на околу 17 квадратни километри и ќе биде дом на околу 10.000 членови на НАТО и нивните семејства, пишува Њузвик.
Еуроњуз викендов објави дека се започнати работите на основната инфраструктура на базата, како што се пристапните патишта и електричната мрежа. На крајот, изградбата на неколку нови писти се очекува да ги поддржи операциите на различни видови воени авиони.
Николае Крецу, командант на воздухопловната база, рече дека ќе има „хангари за одржување, складирање гориво, муниција, опрема, авијациски технички материјали, симулатори, капацитети за хранење, сместување – сè што е потребно за поддршка на операциите и мисиите на оваа база“.