Европа
Германија, Италија, Португалија и Австрија поставија генерали на челните позиции на кризните тимови против Ковид-19
Четири европски земји – Португалија, Италија, Германија и Австрија – назначија високи воени офицери во првите редови на кризните тимови за кампањи против Ковид-19 и вакцинација против болеста.
Во Португалија исклучителна улога во организацијата и унапредувањето на вакцинацијата имаше вицеадмиралот Хенрике Едуардо Пасал, во Италија генерал-полковник Франческо Паоло Фиглиуола, а сега го следи примерот и Германија, каде што на чело на кризниот штаб е назначен генерал-мајор Карстен Бројер, и во Австрија, каде што координативното тело за борба против Ковид-19 сега е предводено од генералот Рудолф Стридингер. Консензусот меѓу лидерите на овие земји е дека воените експерти поседуваат драгоцено логистичко знаење и искуство во управувањето со кризи.
„Досега се вакцинирани 25 милиони луѓе. Можеме да достигнеме 30 милиони до крајот на годината“, рече генерал-мајор Карстен Бројер (56) повторувајќи ја целта што ја постави канцеларот Олаф Шолц кога го префрли кризниот штаб од Министерството за здравство, предводен исто така од еден генерал, Ханс-Улрих Холтерм, во неговиот кабинет. Бројер, познат како корона-генерал, инаку е одговорен за распоредување на армијата во земјата, има искуство од Косово и Авганистан и досега го координирал одговорот на Ковид-19 во војската.
Слична задача како онаа на Бројер во пресрет на очекуваниот бран на сојот омикрон има и неговиот австриски колега Рудолф Стридингер.
Португалците беа првите што допреа до офицерите кога вицеадмиралот Хенрике Едуардо Пасал беше назначен за шеф на тимот за вакцинација во февруари откако неговиот претходник, државниот секретар Франциско Рамос, беше сменет поради вакцинација преку ред. Пасал бргу ја освои јавноста со начинот на кој комуницираш – тој ја цитира „Војна на ѕвездите“, ги повика своите сонародници да бидат витези на џедаи против пандемијата и рече дека антиваксерите ѝ припаѓаат на темната страна. Со негова координација вакцинирани се 90 отсто од населението, а во Португалија штотуку е избран за личност на годината.
Помалку јавна, но исклучителна работа, направи генерал-полковникот Франческо Паоло Фиглиуола, кој беше назначен од италијанскиот премиер Марио Драги во март да раководи со работната група за координација и вакцинација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.