Свет
Германски тинејџери под истрага за пеење антисемитски песни по посетата на Бухенвалд
Екскурзијата во логорот на смртта во Бухенвалд имала мало влијание врз група германски тинејџери кои не гледале ништо лошо во тоа да играат и да пеат антисемитски песни на место каде што умреле над 56.000 затвореници за време на Втората светска војна, пренесува РТ.
Тројца 14-годишни ученици пуштале песни на телефон и пееле заедно во автобус додека нивниот клас се враќал од посетата на меморијалниот центар во Бухенвалд, кој се наоѓа источно од Дрезден.
Приказната се најде на насловните страници во локалните медиуми кусо време откако наставниците го пријавиле случајот во полиција и била покрената истрага за поттикнување омраза. Инцидентот вознемири многумина со оглед на озлогласеноста на локацијата.
Раководен од екипите на смртта на СС, Бухенвалд примил над 280.000 затвореници во екот на прогонот. Освен Евреите од сите страни на Европа и СССР, меѓу уапсените имало и Полјаци и Роми, како и советски воени затвореници.
Бухенвалд не бил голем како Аушвиц, кој е познат по своите гасни комори, но маките на затворениците биле исти. Некои затвореници биле подложени на брзи егзекуции со бесење или распнување, додека други умреле во медицински експерименти или биле застрелани од стражарите на СС.
До периодот кога американската армија го ослободи кампот во 1945 година, вкупно 56.545 луѓе, речиси секој четврти затвореник умрел таму. По војната, Бухенвалд бил зачуван како меморијал. Училиштето во кое учат тинејџерите, именувано по познатиот германски антрополог Тео Кох, е добитник на бројни награди за спрелување на екстремизмот, пишува „Ди велт“. Институтот организира и четиримесечен специјален курс за нацизмот, чија ефективност сега е доведена во прашање.
Антисемитските инциденти се зголемија за речиси 20 отсто меѓу 2017 и 2018 година, а бројот на забележани насилни напади е речиси двојно зголемен според податоците на Министерството за внатрешни работи. Во меѓувреме, комесарот за антисемитизам во германската влада, Феликс Клајн, рече дека не може да им препорача на Евреите да носат кипа насекаде во Германија во кое било време. Забелешката беше критикувана од израелскиот претседател Рувен Ривлин заради, како што рече тој, капитулацијата на антисемитизмот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
„Политико“: Американскиот пакет помош за Украина ќе биде многу поголем од претходните
Американските власти се подготвени да започнат со испорака на воена опрема во Украина откако Претставничкиот дом го усвои нацрт-законот за воена помош во саботата, изјави портпаролот на Пентагон, генерал-мајор Пат Рајдер.
Предлог-законот за воена помош мора да биде одобрен од американскиот Сенат и да биде испратен до претседателот Џо Бајден за негов потпис, се вели во соопштението на американското Министерство за одбрана.
Генералот Рајдер рече дека законодавството ќе ги направи САД и нивните сојузници и партнери побезбедни.
„Овој нов закон е доказ дека претпоставката на рускиот претседател Владимир Путин дека групата што ја поддржува Украина во нејзината борба против руската инвазија ќе се распушти е апсолутно погрешна“, рече генералот Рајдер.
Повикувајќи се на свои извори во американската администрација, бриселскиот портал „Политико“ пишува дека следниот пакет помош од САД за Украина ќе биде значително поголем од вообичаеното, јави Танјуг.
Според неименувани американски претставници, новиот пакет ќе вклучува оклопни возила, како и опрема за воздушна одбрана и артилерија.
Конкретно, соговорниците на бриселскиот портал велат дека САД ќе ја снабдат Украина со нова серија оклопни транспортери „Бредли“, оклопни транспортери „Хамви“ и „М113“.
Според еден од изворите, администрацијата подготвува „голем пакет за да помогне во задоволувањето на потребите на украинското бојно поле“.
Се очекува по Претставничкиот дом, американскиот Сенат конечно да го одобри законот за помош на Украина, со кој на Киев би му била укажана помош во износ од речиси 61 милијарда долари.
Свет
Венеција почнува да наплаќа влезници
Оваа недела, Вeнеција ќе почне да им наплаќа влез во градот на еднодневните патници, што е прв ваков случај во светот.
Наменет е да се намали притисокот врз античкиот италијански град, кој тоне под тежината на масовниот туризам.
Почнувајќи од четврток, посетителите кои доаѓаат во градот на еден ден ќе треба да купат билет од пет евра, кој ќе го контролираат инспекторите на клучните локации.
Минатата година, 3,2 милиони туристи поминаа барем една ноќ во историскиот центар на градот, но десетици илјади други поминаа низ градот во текот на денот, често од бродови за крстарење, за да ги видат знаменитостите, вклучувајќи го плоштадот Свети Марко и мостот Риалто.
Целта на воведувањето билети е да се намали гужвата.
Првично, билетите ќе бидат потребни само за 29 „пик“ туристички денови во текот на 2024 година, главно за викенди од мај до јули.
Дали ваквата мерка ќе даде резултати, внимателно ќе се следи и во другите туристички дестинации низ светот кои се борат да се справат со масовниот туризам.
Во Шпанија, втората најпосетувана земја во светот по Франција, десетици илјади луѓе протестираа во саботата на Канарските острови барајќи ограничување на бројот на посетители на архипелагот.
Луиџи Бруњаро, градоначалникот на Венеција, го опиша потегот како „експеримент, прв во светот, кој има за цел да ја направи Венеција попријатна за живеење“.
Венеција, која се простира на повеќе од 100 мали острови и островчиња во североисточна Италија, се смета за еден од најубавите градови во светот.
УНЕСКО го вброи градот и неговата лагуна како светско наследство во 1987 година, наведувајќи го како „извонредно архитектонско ремек-дело“.
Организацијата на ОН, сепак, минатата година се закани дека ќе ја стави Венеција на својата листа на загрозено наследство, наведувајќи го масовниот туризам и зголемувањето на нивото на водата што се припишуваат на климатските промени.
Долго време се дискутираше за системот за издавање билети, но неговата имплементација постојано беше одложувана поради загриженоста дека сериозно ќе ги намали приходите од туризмот и ќе ја загрози слободата на движење.
Градските советници од опозицијата тврдат дека тоа нема да има никаква корист. Педесет евра можеа да помогнат“, рече еден од нив Џанфранко Бетин.
Градоначалникот на Венеција вети дека новиот систем ќе биде наметнат „нежно“, без строги контроли и редици за билети, отфрлајќи ги шпекулациите дека градот ќе постави бариери или контролни пунктови на улиците.
Инспекторите ќе бидат стационирани во и околу главните влезови на градот, особено на железничката станица Санта Лусија, проверувајќи ги посетителите на лице место.
Туристите кои немаат билет ќе добијат инструкции како да купат, но може да ризикуваат казни од 50 до 300 евра доколку ги игнорираат.
Ќе им се наплаќа само дневните туристи кои ќе дојдат во стариот дел од 8:30 до 16:00 часот, а од ова се ослободени оние кои престојуваат во хотели, до 14 години и лицата со посебни потреби.
Свет
Австралискиот премиер: Маск е арогантен милијардер
Австралискиот премиер го нарече Илон Маск арогантен милијардер, откако неговата платформа на социјалните мрежи „Икс“ го одложи отстранувањето на снимките од минатонеделниот напад во Сиднеј.
Вчера, австралискиот суд нареди „Икс“ (поранешен Твитер) да ги отстрани видеата од настанот. „Икс“ претходно најави дека ќе ја отстрани наведената содржина по законска одредба, пишува „Би-Би-Си“.
Сепак, Маск оттогаш објави меме во кој ја обвинува владата за цензура. Затоа, премиерот Ентони Албанес денеска изјави за „Еј-би-си њуз“ рече дека Маск е арогантен милијардер кој мисли дека е над законот.
Минатата недела, независниот интернет регулатор им се закани на „Икс“ и другите компании за социјални медиуми со високи казни доколку не ги отстранат видеата од нападот со нож во црквата Христос Добриот Пастир, кој полицијата го прогласи за терористички чин.
„Икс“ тврдеше дека оваа одредба не е во опсегот на австралиското право. Регулаторот потоа побара судска забрана за објавување на спорните снимки, а набрзо дојде до расправија на социјалните мрежи и во медиумите.
„Би сакал да го искористам овој момент за да му се заблагодарам на премиерот што ѝ посочи на јавноста дека оваа платформа е единствената што ја покажува вистината“, напиша Маск. Тој претходно ја критикуваше австралиската комесарка за безбедност на Интернет, Џули Инман Грант, опишувајќи ја како „австралиски комесар за цензура“.
Албанес застана во одбрана на Инман Грант, велејќи дека таа ги штити граѓаните на Австралија.
„Социјалните медиуми мора да бидат и општествено одговорни. Ова не е случај со Маск“, додаде тој. X мора да ги отстрани спорните снимки во рок од 24 часа по одлуката на судот.