Европа
Европскиот парламент изгласа закон кој може да ja уништи забавата на интернет
Пратениците во Европскиот парламент денеска гласаа за авторските права на интернет, предлог за директива за авторските права на дигиталниот пазар, кој неодамна предизвика многу контроверзии во цела Европа.
Предлогот за директивата, која по тврдењата на Комисијата треба да се воведе во 21 век и да осигури дека авторите на музика, филмови и вести ќе бидат правично платени за својата работа, беше почеток на една од најжестоките лобирачки војни во историјата на официјален Брисел, во кој силите ги одмерија медиумските куќи и Пол Мекартни, од една страна, и поборниците за слобода на интернет, од друга.
Европскиот парламент во јули го отфрли предлогот што претходно беше усвоен од страна на надлежната Комисија за правни прашања, но денес пратениците повторно гласаа за тој предлог.
Критичарите на директивата сметаат дека таа може сериозно да ја поткопа слободата на говорот на интернет, би влијаела за укинување на популарните мемиња, би го закочила развојот на дигиталната технологија во Европската Унија, значително би го отежнала работењето на помалите компании и би го усложнила животот на корисниците на интернет.
Особено се критикува членот 13, кој одговорноста за контрола на користењето авторски содржини целосно ја префрла на конкретни интернет-страници, притоа воведувајќи ја идејата за автоматски филтер на содржини, со кој де факто би се забранило користењето на популарните мемиња, како, на пример, Grumpy cat, но и цитатите од „Википедија“ и разни други работи кои се вообичаен и нераскинлив дел од секојдневната интернет комуникација.
Членот 13 не предвидува правна санкција за проблемите што може да произлезат како резултат на грешките кај автоматските филтри, со што се отвора прашањето за тоа како ќе се решат постапките при погрешно отстранување на содржини од интернет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.