Свет
Египет подготвен повторно да ги прими туристите во своите одморалишта
Египет го прекина воздушниот сообраќај во март, а туристичките места беа целосно затворени за посетителите. Сепак, со смирувањето на епидемиолошката состојба оваа земја е подготвена повторно да ги прими своите туристи.
Во Египет хотелите полека се отвораат, пред сè, за домашните туристи, но со строго почитување на правилата за безбедност.
Хотелите ќе може да работат со капацитет од само 50 отсто. Дезинфицирани се сите археолошки места, а исчистени се и плажите.
„Работиме на тоа туристите од целиот свет да ја пронајдат оваа дестинација во примерни санитарни услови. Чекаме да се израмни нашата крива. Условите за меѓународен туризам ќе бидат објавени во наредните денови. Сè што сакаме е да се осигуриме дека туристите нема да се соочуваат со проблеми кога ќе се отвориме“, изјавија официјални лица за АФП.
Одморалиштата на Црвеното Море, вклучувајќи ги Јужен Синај, Шарм ел-Шеик и Дахабм, ќе бидат првите што ќе се отворат заедно со медитеранските плажи западно од крајбрежниот град Александрија.
Големите туристички атракции, како што се пирамидите на Гиза и храмот Луксор, ќе бидат повторно отворени за туристите, но ќе се спроведуваат контроли. На пример, ќе може да влезат максимум 10 лица во гробницата на Тутанкамон.
Во Египет 39.726 луѓе биле заразени со вирусот од почетокот на епидемијата на коронавирусот, а 1.342 лица починале како резултат на инфекцијата. Во последните две недели бројот на нови случаи на Ковид-19 во оваа земја со речиси 100 милиони жители надминува илјада.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Додик повторно во Русија: Имаме притисок, но остануваме посветени на добрите односи со Москва
Лидерот на босанските Срби, Милорад Додик, повторно отпатува во Русија за да ја изрази својата желба за зајакнување на односите со режимот на Владимир Путин, а денеска на средбата со шефот на рускиот Совет за безбедност, Николај Патрушев, тоа го потврди. Додик отпатува за Санкт Петербург, каде ќе учествува на меѓународниот безбедносен форум организиран од руските власти, а таму го однесе и министерот за безбедност на БиХ, Ненад Нешиќ, со чија партија е во коалиција на државно ниво.
Како што објави јавниот сервис на Република Српска (РТРС), Додик веднаш се сретнал со Патрушев, кој се смета дека е еден од најблиските соработници на Путин. Двајцата разговараа за соработката меѓу РС и Русија, а Патрушев особено ги пофали добрите лични односи меѓу Додик и Путин.
„Вашите одлични лични односи со претседателот на Русија, Владимир Путин, водат до одлични односи меѓу РС и Руската Федерација“, рече Патрушев на средбата, додавајќи дека е свесен дека РС е под голем притисок поради тоа.
Додик одговори дека нема да го поколебаат притисоците.
„Ние сме под голем притисок, но остануваме посветени на добрите односи со Русија“, рече Додик.
Актуелниот претседател на РС, кој е под санкции на САД и Велика Британија, отпатува во Русија во време кога Босна и Херцеговина се соочува со сериозна политичка криза. Министерот за надворешни работи на БиХ, Елмедин Конаковиќ, во понеделникот предупреди дека односите во владејачката коалиција се „најлоши досега“.
Кризата беше предизвикана од барањето на Додик за укинување на техничките измени на изборниот закон, кои беа наметнати во март од високиот претставник за БиХ Кристијан Шмит, како и противењето на најавеното усвојување на резолуцијата во Обединетите нации со која би се прогласил 11 јули како ден за сеќавање на жртвите од геноцидот во Сребреница.
Поради оваа причина, Додик ги актуелизираше своите закани за независност на РС, и тоа го стори во пресрет на неговото заминување во Русија.
„Не можеме да живееме со оние кои работат против нас. Време е секој да тргне по својот пат“, изјави вчера Додик.
Свет
Драма во Америка: во куќа пронајдени тела на пет лица, меѓу нив и деца
Телата на пет лица, меѓу кои и две деца, се пронајдени во куќа во Оклахома Сити, соопшти денеска американската полиција.
Получникот Гери Најт од полицијата на државата Оклахома изјави дека загинатите биле семејство и дека починале од насилна смрт, пренесува „Ен-би-си њуз“.
Најт додаде дека полицијата сè уште не може да открие што точно откриле инспекторите.
Полицијата беше испратена во дом на 20-ина милји западно од центарот на Оклахома Сити под сомнение дека таму се наоѓаат телата, рече Најт.
Според него, на сите тела имало повреди, кои изгледале како да се работи за убиство.
Свет
Швајцарија ги замрзна руските средства во вредност од 5,8 милијарди франци
Швајцарија го замрзна рускиот имот во вредност од 5,8 милијарди швајцарски франци или 5,95 милијарди евра, објави денеска Државниот секретаријат за економски прашања на земјата (SECO).
Оваа бројка се однесува на вкупната вредност на руските средства замрзнати од Швајцарија од почетокот на војната во Украина до крајот на 2023 година.
Вредноста на замрзнатите руски средства во Швајцарија е значително помала отколку на крајот на 2022 година кога изнесуваше 7,5 милијарди швајцарски франци, пренесува „Ројтерс“.