Свет
Емотивни сведочења на медицински сестри од Аризона: Никогаш немало толку починати секој ден
Медицинските работници во американската сојузна држава Аризона се најдоа на првите линии во борбата против ковид-19. Аризона стана едно од светските жаришта на коронавирус.
Медицинска сестра на одделот за интензивна нега во Феникс рекла дека и` доаѓаат солзи на очите кога ќе се сети на сите оние луѓе кои починале од ковид-19 во нејзината болница. Медицинскиот персонал во главниот град на Аризона ги опишува преполните итни служби во кои пациентите се ставаат на респиратори додека чекаат слободно место на интензивна нега.
„ Се грижиме за лекарите кои се заразија, се грижиме за мајките. Минатата недела симнавме од апарат за одржување во живот 48-годишна мајка и стоев покрај нејзиниот 17-годишен син се додека таа не почина“ вели Ангела Мази, сестра во медицинскиот центар Тусон, каде се пополнети сите 20 кревети на интензивната нега, кои се одделени за пациентите со коронавирус.
На младите сестри најтешко им паѓа смртта на млади луѓе кои претходно биле здрави. На пример, многу тешко ги погодила смртта на 25-годишна жена која починала во Скотсдејл.
„ Нагло и` се влоши состојбата. Тоа беше многу емотивно. Една медицинска сестра воопшто не можеше да зборува за тоа“ раскажала сестрата Каролин Малони.
Во друг случај, жена во четириесетите години отишла на итна помош со симптоми на коронавирус, се тестирала и била испратена дома. Нејзиното семејство исто така се разболело и таа се вратила во болница кога и` се влошила состојбата. Наскоро завршила на интензивна нега. На почетокот одбивала да ја стават на респиратор.
„ Ми рече дека се плаши од интубација. Ме замоли да ја држам за рака и и` ветив дека ќе биде добро. Преживеа две ипол недели. Направивме се што можевме, а на крајот таа почина. Такви работи се случуваат постојано. Веќе нема смена во која некој не умира. Тоа е ужасно“ раскажува друга медицинска сестра.
Таа додала дека никогаш во животот не видела толку многу луѓе да умираат секој ден.
Болниците во државата Аризона сега се полни со пациенти, од кои некои се во критична состојба. Аризона вчера имаше над 66.000 потврдени случаи, во однос на нешто повеќе од 20.000 на 1 јуни. Секојдневно се пријавуваат повеќе илјади новозаразени, а досега починале 1535 луѓе, пренесува АП.
Пациентите на респиратори се ставаат во индуцирана кома додека машините дишат место нив. Тие се приклучени на повеќекратни инфузии. На одделот за интензивна нега можат да останат со недели или месеци.
Медицинските сестри имаат 12-часовна работна смена, носат заштитни одела, маски, ракавици и очила. Пациентите се отсечени од своите семејства, а неретко и од стварноста. Честопати се превртуваат на стомак за да им се олесни дишењето. Таа постапка им помага на пациентите, но е многу напорна задача за медицинските работници, понекогаш за тоа треба да се ангажираат шест до осум медицински сестри.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Свет
Шефот на НАТО: Никој нема корист од војната на Блискиот Исток
Генералниот секретар на НАТО Јенс Столтенберг изрази загриженост за ситуацијата на Блискиот Исток по израелскиот напад врз Иран.
„Клучно е конфликтот да не излезе од контрола и затоа ги повикуваме сите страни на воздржаност“, изјави Столтенберг денеска во Брисел. „Никој нема корист од војната на Блискиот Исток“, рече тој.
Израел го нападна иранскиот Исфахан
Според извештаите на медиумите, Израел ја нападнал иранската провинција Исфахан рано во петокот како одговор на големиот ирански напад со беспилотни летала и ракети минатиот викенд.
Според израелскиот весник Jerusalem Post, нападот бил насочен кон воздушна база во Исфахан, недалеку од иранските нуклеарни постројки. Сепак, според Меѓународната агенција за атомска енергија (МААЕ), нуклеарните капацитети не биле погодени.
Свет
Шефот на МААЕ: Не ги напаѓајте иранските нуклеарни постројки
Шефот на Меѓународната агенција за атомска енергија (МААЕ), Рафаел Гроси, ги предупреди земјите да не ги напаѓаат иранските нуклеарни постројки.
Во Исфахан, каде што беше извршен нападот, има неколку нуклеарни постројки во земјата. Гроси за програмата на Би-би-си Радио 4 изјави дека му олеснало кога слушнал дека ниту една нуклеарна постројка не била погодена во нападот.
„Нападот врз иранските нуклеарни постројки би бил страшна работа“, вели Гроси.
Тој смета дека во светот деновиве се појавува прашањето за таргетирање на нуклеарни постројки и дека МААЕ го смета за жално.