Европа
ЕУ сака да ја преполови употребата на пестициди до 2030 година
Европската комисија сака да ја преполови употребата на хемиски пестициди до 2030 година за да се запре падот на опрашувачите, план што веројатно ќе предизвика критики од оние што бараат постепено исфрлање на хемикалиите, но и од земјоделците што тврдат дека земјоделските култури ќе пропаднат.
Комисијата сака да ја задолжи ЕУ да престане со употреба на хемиски и ризични пестициди до 2030 година, според нацрт-документот достапен на „Ројтерс“, кој треба да биде објавен на 20 мај.
Не е објаснето што значи висок ризик, ниту како ќе се спроведе намалување.
Комисијата одбива да коментира за необјавените нацрти, кои се документи за работа и се подложни на промена сè додека не бидат усвоени.
Пчеларите во Западна Европа известуваат за пад на бројот на пчели и загуби во пчелните колонии во текот на изминатите 15 години, објави Европската агенција за безбедност на храна. Таа предупредува дека тој тренд загрозува 76 проценти од производството на храна во Европа, што зависи од опрашувањето.
Уште во 2018 година европските регулатори забранија употреба на неоникотиноидни инсектициди на отворено, што значи дека може да се користат само во оранжерии.
Европските законодавци веќе повикаа на обврзувачки цели за намалување на употребата на пестициди во Унијата. Организацијата за органска храна и култивирање ИФОАМ исто така се залага за поамбициозни цели од нацрт-предлогот, односно за 80-процентно намалување на синтетичките пестициди до 2030 година и целосно укинување до 2035 година.
Нацрт-предлогот исто така предвидува да се засадат три милијарди дрвја во ЕУ до 2030 година за да се помогне во апсорпцијата на јаглероден диоксид од атмосферата и градовите да се направат позелени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Захарова: Киев продолжува отворено да најавува терористички напади врз Русија
Марија Захарова, портпаролка на руското Министерство за надворешни работи, на брифинг со новинарите рече дека режимот во Киев продолжува отворено да најавува планирани терористички напади врз Русија.
„Режимот во Киев продолжува отворено да најавува планирани терористички напади на руска територија, чии детали, нема да верувате, се детално дискутирани во западниот печат“, рече Захарова, според државната руска новинска агенција ТАСС.
Захарова наведе дека во украинските напади се повредени руски цивили и додаде дека украинските специјални служби не се откажуваат од „масакрите на нивните поранешни сонародници“.
„Просветените, како што се нарекуваат себеси, престолнините на колективниот Запад сè уште не го оквалификуваат ова како терористички напад. Како можат да го оквалификуваат како таков? Во спротивно, ќе мора да донесат резолуции и закони со кои се осудува нивното спонзорство на тероризмот“, изјави Захарова на новинарите, пишува ТАСС.
Европа
Германија уапси две лица: соработувале со Русите, планирале да ја саботираат армијата
Две лица, кои, освен германско, имаат и руско државјанство, се уапсени во Германија поради наводно планирање саботирање воени објекти, вклучително и американски, со цел да ја поткопаат воената поддршка за Украина, соопшти денеска германското Обвинителство. Властите извршија претрес во домовите и работните места на двајцата осомничени, кои се обвинети дека работеле за странска тајна служба, се наведува во соопштението на Обвинителството.
Еден од осомничените, идентификуван како Дитер С., разговарал за можни заговори со лице поврзано со руската тајна служба од октомври 2023 година, се посочува во соопштението.
Дитер С. подготвувал бомбашки напади и палење во воени објекти, вклучително и оние со кои управуваат американските сили, се додава во соопштението.
Според магазинот „Шпигел“, еден од објектите е воената база „Графенвоер“, во јужната сојузна држава Баварија, каде што украинските војници се обучуваат да управуваат со американските тенкови „Абрамс“. Руската амбасада во Берлин не одговори веднаш на барањето за коментар.
„Намерата на акциите беше да се поткопа воената поддршка што Германија и ја дава на Украина против руската воена агресија“, се вели во соопштението на германските обвинители.
Европа
Фон Дер Лајен: На Европа не и се заканува војна, но треба да бидеме подготвени и да произведуваме оружје
Европа во моментов не се соочува со непосредна закана од војна, но мора да биде подготвена за тоа, изјави претседателката на Европската комисија, Урсула фон дер Лајен.
„Заканата од војна можеби не е непосредна, но не е невозможна. Треба да бидеме подготвени и тоа започнува со итната потреба за зајакнување и трансформирање на вооружените сили на членките на блокот“, рече Фон дер Лајен на Европскиот самит за одбрана и безбедност.
Според неа, ЕУ мора да произведе оружје од новата генерација за да „победи на бојното поле“.
„Европа треба да се стреми да развие и произведе нова генерација на оперативни способности за да победи во битките и да обезбеди доволно материјално количество и технолошка супериорност што можеби ќе и треба во иднина, а тоа значи турбо полнење на нашиот одбранбен индустриски капацитет во следните пет години,“ изјави Фон дер Лајен.