Европа
Жена го парализира ноќниот живот во Баварија, наместо да седи во карантин, одела во кафулиња и заразила многу луѓе
Само една девојка е одговорна за ширењето на коронавирусот во познатата баварска туристичка дестинација Гармиш-Партенкирхен поради што ноќниот живот е парализиран.
Германски „Фокус“ пренесува дека неименувана дваесет и шестгодишна жена неколку дена седела во неколку кафулиња заразувајќи голем број луѓе со коронавирусот. Според окружната администрација, таа имала симптоми цело време и чекала на резултатите од тестот.
„Имаше симптоми, беше тестирана кај нас и поради симптомите, ѝ рековме да остане во карантин, но не го стори тоа“, објави претставникот на окружната администрација, Штефан Шарф.
„Само што се вратила од одмор во Грција и не знаеме дали таа се заразила на патот или во Гармиш-Партенкирхен“, објасни Шарф.
Станува збор за Американка која живее во Гармиш-Партенкирхен и се претпоставува дека работи за американската армија. Научниот центар за безбедност на американскиот Центар за одбрана се наоѓа на тоа место, а жената работи во хотелот „Еделвајс“ во рамките на Центарот, објави „Билд“. Американката била на караоке-забава во барот „Пичис“, каде што заразила уште неколку лица.
„Не можам да верувам дека некој може да биде толку глуп“, изјави сопственикот на коктел-барот, Питер Месершмит, кој ја карактеризира жената како потенцијален убиец.
Од петок се воведени мерки за заштита во Гармиш, така што кафулињата и рестораните ќе работат до 22 часот, а само пет лица може да престојуваат во барови истовремено.
Германскиот адвокат Арнт Кемпгенс во соопштението за јавноста наведе дека 26-годишната жена може да биде казнета за намерно и опасно нанесување телесна повреда, кривично дело за кое се соочува со казна затвор од шест месеци до десет години затвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.