Свет
Загрижени лекари велат дека Навални би можел да умре за неколку дена, му се заканува срцев удар
Лекарите задолжени за здравјето на рускиот опозициски лидер Алексеј Навални велат дека „може да умре за неколку дена“ доколку не му биде укажана соодветна грижа.
Лекарите тврдат, пишува Би-би-си, дека неговите најнови откритија во крвта покажуваат дека тој може да умре од срцев удар или откажување на бубрезите во секој момент.
Навални штрајкува со глад веќе 19 дена, со цел да добие соодветни лекови за акутна болка во грбот и вкочанетост на нозете.
Рускиот амбасадор во Велика Британија, Андреј Келин, вели дека нема да дозволи Навални да умре во затвор. Познатиот критичар на Путин заврши во затвор во февруари.
Четворица лекари, вклучувајќи ја и неговата лична докторка Анастасија Васиjeева, ѝ пишале на управата во затворот. Тие бараат дозвола итно да го посетат Навални, а во писмото наведуваат дека нивото на калиум во крвта станало критично.
„Ова значи нарушена бубрежна функција и сериозни проблеми со срцето кои може да се појават во секое време“, изјавија тие.
Се наведува дека нивото на калиум во крвта е многу високо и бара итен третман.
Келин го обвини опозиционерот дека сака да привлече внимание, жалејќи се дека еден ден го боли левата рака, а другиот боли левата нога.
„Да се однесуваше нормално, ќе имаше шанса да биде ослободен порано“, рече тој.
Вашингтон предупреди во неделата дека тоа ќе биде последица на Русија доколку Навални умре, а министрите за надворешни работи на ЕУ ќе разговараат за случајот на состанок во понеделник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во Индија почнаа изборите, кои ќе траат шест недели, а ќе гласаат речиси 970 милиони
Денеска, почнаа најобемните избори во светот, а речиси 970 милиони регистрирани гласачи во Индија учествуваат во овој огромен процес, кој ќе се одвива во седум фази и ќе трае дури шест недели.
Премиерот Нарендра Моди се надева дека ќе освои трет последователен мандат во земјата со 1,4 милијарда жители. Гласачите, всушност, не го избираат директно премиерот, туку 543-те пратеници на Лок Сабха, долниот дом на парламентот на најнаселената земја во светот, објави „Дојче веле“.
На натпреварот учествуваат шест национални партии, 57 партии од индиските сојузни држави и 2.597 помали партии. Сепак, главната трка ќе биде меѓу двете најголеми политички партии во Индија: владејачката Индиска народна партија (БЈП) и опозицискиот Индиски национален конгрес (ИНЦ) или скратено Конгресната партија.
За да се спротивстави на владејачката БЈП и премиерот Моди, Конгресната партија формира сојуз од 28 партии, наречен Индиски национален развој – инклузивен сојуз.
Според анкетите, премиерот Моди и неговата хинду-националистичка БЈП се очекува да победат на изборите оваа година.
Моди е популарен лидер, делумно благодарение на агендата насочена кон хинду-мнозинството во Индија, кое сочинува 80 отсто од населението.
Свет
Русија повика на воздржаност помеѓу Израел и Иран
Русија повика на воздржаност по информациите за напад на Израел врз Иран.
Портпаролот на Кремљ, Дмитриј Песков, изјави денеска за новинарите дека Русија ги проучува деталите за нападот и дека ќе го коментира кога ќе се разјасни неговата природа.
„Во секој случај, без разлика на сѐ, продолжуваме да се залагаме за воздржаност од двете страни за да нема дејства што би предизвикале натамошна ескалација на тензиите во регионот“, рече Песков.
Русија и Иран имаат блиско партнерство. За време на инвазијата на Украина, Москва користи беспилотни летала „Шахед“ од иранско производство.
Свет
(Видео) Туристи малтретирале мечиња за селфи, па ги фатила полиција во Северна Каролина
Во станбен комплекс во округот Бункомб, Северна Каролина, шест лица се снимени како влечат мали мечиња од гранките на дрвото за кои се држеле, а сè со цел да позираат за фотографија. Шестемина ги тегнеле двете мечиња, а едното дури им испаднало од рацете во текот на снимањето.
Кога снимките од инцидентот стигнале до експертите што се занимаваат со заштита на дивите животни, тие веднаш излегле на терен и повикале полиција. Меѓу нив бил и биологот Ешли Хобс, која за „Еј-би-си 13 њуз“ рекла дека кога пристигнала до дрвото каде што луѓето се фотографирале, пронашла само едно мече. Целото било влажно и смрзнато, па било дадено на човечка грижа и нега за да закрепне. Поради тоа, сосема е можно никогаш да не може да се вратат во дивината бидејќи мечките што растат со луѓе потоа не сакаат да ги напуштат. Неверојатно, но можно е некој да ѝ го уништил животот на мечката само за да добие убава фотографија за социјалните мрежи.
„Мечето преживеа големо трауматско искуство. На луѓето што го направија тоа им објаснивме колку е неодговорно и потенцијално смртоносно за мечето да се одвои од мајка си, а особено на овој начин да го влечат од дрвото“, рекла Хобс, пренесува „Унилад“.
По објавувањето на видеото, многумина се згрозиле од она што го направиле овие луѓе. За сето тоа морало да разговараат и со полицијата.