Свет
Иран нема да ја промени политиката додека САД не ги тргнат санкциите
Иранското раководство нема да го промени курсот на својата политика ако САД не ги тргнат санкциите кон Техеран, изјави виранскиот претседател Хасан Рохани, пренесува ТАСС.
„Иран ќе продолжи да ги намалува своите обврски од нуклеарниот договор ако не се тргнат санкциите на САД. Разговорите со САД ќе станат можни само ако се укинат санкциите. Инаку, ништо нема да се промени“, рече тој.
Рохани истакна дека Иран никогаш не се обидел да поседува нуклеарно оружје.
„Што се однесува до нуклеарниот договор, ние ќе продолжиме да комуницираме со другите потписници“, рече тој.
На 8.5.2018 година, американскиот претседател Доналд Трамп најави повлекување на Вашингтон од иранскиот нуклеарен договор. Тој рече дека старите санкции за Иран ќе бидат обновени, а нови ќе бидат воведени во случај Техеран да се обиде да ги реализира своите нуклеарни амбиции.
Првата серија нови санкции од САД врз Иран стапи на сила на 7 август, а втората стапи на сила на 5 ноември.
На 8 мај 2019 година иранскиот претседател Хасан Рухани објави дека Техеран ги намалува обврските во рамките на ЗКПОА. Тој посочи дека другите потписнички, пред сè земјите на ЕУ, не успеале да ги исполнат своите економски обврски од договорот. Рохани потоа им даде рок од два месеца, кој истече на 7 јули.
На 8 јули портпаролот на Организацијата за атомска енергија на Иран, Бехруз Камалванди, изјави дека Техеран го надминал нивото на збогатување на ураниум од 4,5 отсто. Иран соопшти дека ќе продолжи постепено да ги намалува своите заложби за договорот на секои 60 дена, освен ако другите потписнички не ја обноват усогласеноста.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД: Ќе го блокираме полноправното членство на Палестина во ОН, тие треба да преговараат со Израел
САД ќе гласаат против палестинската кандидатура за полноправно членство во Обединетите нации и ќе ја блокираат светската организација да признае палестинска држава.
„САД продолжуваат да тврдат дека најбрзиот пат до државност за палестинскиот народ е преку директни преговори со Израел и палестинската управа со поддршка на САД и други партнери“, рече американскиот претставник.
Планирано е 15-члениот совет да гласа за нацрт-резолуцијата со која се препорачува на Генералното собрание на ОН од 193 држави „Државата Палестина да биде примена во членство во ОН“.
За да усвои резолуцијата, потребни се најмалку девет гласа и никакво вето од САД, Велика Британија, Франција, Русија или Кина. Дипломатите проценуваат дека резолуцијата би можела да собере 13 гласа, што би ги принудило САД да стават вето.
„Одамна јасно ставивме до знаење дека предвремените акции во Њујорк, дури и ако се во најдобар интерес, нема да резултираат со државност за палестинскиот народ“, рече американскиот функционер. Палестинците во моментов имаат статус на набљудувач не-членка, што е де факто признавање на државноста доделена од Генералното собрание на ОН во 2012 година.
Меѓутоа, барањето за полноправно членство мора да биде одобрено од Советот за безбедност, а потоа од најмалку две третини од членовите на Генералното собрание. Засилените напори на Палестина за полноправно членство дојдоа шест месеци по масакрот на Хамас во јужен Израел и војната во Појасот Газа по започнувањето на израелската офанзива и проширувањето на еврејските населби на Западниот Брег.
Генералниот секретар на ОН, Антонио Гутереш, смета дека „повеќе од кога било, неопходно е да се поддржат напорите со добра волја за воспоставување траен мир меѓу Израел и независна, одржлива и суверена палестинска држава“.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Европа
Уапсен Полјак: „Планирал убиство на Зеленски“
Маж од Полска е уапсен под обвинение дека бил подготвен да шпионира за руското воено разузнавање и да и помогне да го испланира убиството на украинскиот претседател Володимир Зеленски, соопштија полските обвинители, а пренесе Асошиетед прес.
Полското национално обвинителство соопшти дека мажот, идентификуван само како Павел К., бил обвинет дека сакал да ги пренесе безбедносните информации на аеродромот на руски агенти и бил уапсен вчера во Полска.
Човекот побарал контакт со Руси директно вклучени во војната во Украина и се очекувало да пренесе детални информации за аеродромот Жешов-Јасионка во југоисточна Полска, во близина на границата со Украина, кој е портата за меѓународни воени и хуманитарни снабдувања за Украина. Аеродромот е под контрола на американски војници.
Доколку биде прогласен за виновен, тој може да добие и до осум години затвор, се вели во соопштението за печатот.
Обвинителите рекоа дека апсењето е резултат на блиска соработка со обвинителите и безбедносните служби на Украина, кои обезбедија клучни докази. Членката на ЕУ, Полска е цврст поддржувач на соседна Украина и Зеленски во одбрана од руската агресија повеќе од две години.