Свет
Иран се надева дека Гибралтар ќе му го ослободи танкерот за нафта до вечер
Велика Британија би можела наскоро да го ослободи иранскиот танкер за нафта „Грејс 1“, откако Техеран и Лондон разменија документи што би можеле да го олеснат ослободувањето на заробениот брод, изјави заменик-шефот на иранската пристанишна и поморска организација, Џалил Еслами, пренесува ИРНА.
„Велика Британија е заинтересирана да го ослободи иранскиот танкер за нафта „Грејс 1“ по размената на некои документи, па се надеваме дека ослободувањето ќе се случи наскоро. Танкерот беше запленет врз основа на лажни обвиненија и сè уште не е ослободен“, рече Еслами.
Велика Британија досега не даде коментар за изјавата на Иран за размената на документи. Во меѓувреме, портпаролот на Гибралтар рече дека територијата ќе продолжи со напорите за деескалација по законската заплена на супертанкерот „Грејс 1“.
Покрај тоа, иранската новинска агенција „Фарс“ ги цитираше властите на Гибралтар кои велат дека „Грејс 1“ ќе биде ослободен до вечер.
Иранскиот супертанкер што превезува нафта беше запленет на Гибралтар на 4 јули од страна на властите на Гибралтрар поддржани од британските кралски маринци. Властите наведоа повреда на санкциите на ЕУ против Дамаск како причина за запленувањето. Техеран ги негираше тврдењата и истакна дека Велика Британија ја загрозила поморската безбедност со своите активности во Гибралтар.
Тензиите дополнително се зголемија откако британски танкер беше запленет од Исламската револуционерна гарда на 19 јули. Техеран рече дека бродот го прекршил поморското законодавство игнорирајќи ги предупредувањата од војската, го исклучил уредот за позиционирање и се судрил со ирански рибарски брод.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД: Ќе го блокираме полноправното членство на Палестина во ОН, тие треба да преговараат со Израел
САД ќе гласаат против палестинската кандидатура за полноправно членство во Обединетите нации и ќе ја блокираат светската организација да признае палестинска држава.
„САД продолжуваат да тврдат дека најбрзиот пат до државност за палестинскиот народ е преку директни преговори со Израел и палестинската управа со поддршка на САД и други партнери“, рече американскиот претставник.
Планирано е 15-члениот совет да гласа за нацрт-резолуцијата со која се препорачува на Генералното собрание на ОН од 193 држави „Државата Палестина да биде примена во членство во ОН“.
За да усвои резолуцијата, потребни се најмалку девет гласа и никакво вето од САД, Велика Британија, Франција, Русија или Кина. Дипломатите проценуваат дека резолуцијата би можела да собере 13 гласа, што би ги принудило САД да стават вето.
„Одамна јасно ставивме до знаење дека предвремените акции во Њујорк, дури и ако се во најдобар интерес, нема да резултираат со државност за палестинскиот народ“, рече американскиот функционер. Палестинците во моментов имаат статус на набљудувач не-членка, што е де факто признавање на државноста доделена од Генералното собрание на ОН во 2012 година.
Меѓутоа, барањето за полноправно членство мора да биде одобрено од Советот за безбедност, а потоа од најмалку две третини од членовите на Генералното собрание. Засилените напори на Палестина за полноправно членство дојдоа шест месеци по масакрот на Хамас во јужен Израел и војната во Појасот Газа по започнувањето на израелската офанзива и проширувањето на еврејските населби на Западниот Брег.
Генералниот секретар на ОН, Антонио Гутереш, смета дека „повеќе од кога било, неопходно е да се поддржат напорите со добра волја за воспоставување траен мир меѓу Израел и независна, одржлива и суверена палестинска држава“.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Европа
Уапсен Полјак: „Планирал убиство на Зеленски“
Маж од Полска е уапсен под обвинение дека бил подготвен да шпионира за руското воено разузнавање и да и помогне да го испланира убиството на украинскиот претседател Володимир Зеленски, соопштија полските обвинители, а пренесе Асошиетед прес.
Полското национално обвинителство соопшти дека мажот, идентификуван само како Павел К., бил обвинет дека сакал да ги пренесе безбедносните информации на аеродромот на руски агенти и бил уапсен вчера во Полска.
Човекот побарал контакт со Руси директно вклучени во војната во Украина и се очекувало да пренесе детални информации за аеродромот Жешов-Јасионка во југоисточна Полска, во близина на границата со Украина, кој е портата за меѓународни воени и хуманитарни снабдувања за Украина. Аеродромот е под контрола на американски војници.
Доколку биде прогласен за виновен, тој може да добие и до осум години затвор, се вели во соопштението за печатот.
Обвинителите рекоа дека апсењето е резултат на блиска соработка со обвинителите и безбедносните служби на Украина, кои обезбедија клучни докази. Членката на ЕУ, Полска е цврст поддржувач на соседна Украина и Зеленски во одбрана од руската агресија повеќе од две години.