Европа
Каталонија воведува ноќен полициски час
Каталонскиот Врховен суд ги одобри построгите ограничувања на јавниот живот наметнати од регионалната влада поради наглиот пораст на случаите на Ковид-19.
Од утре стапува на сила полициски час, а луѓето нема да можат да ги напуштат своите домови помеѓу еден и шест часот наутро во градовите со над 10.000 жители каде стапката на неделна инциденца, заразени на 100.000 жители, е повисока од 250.
Речиси сите градови ги исполнуваат овие критериуми, па мерките ќе важат за 6,3 милиони луѓе или 82 отсто од североисточниот регион.
Новите прописи, одобрени од судот денеска, треба да траат две недели.
Според правилата, клубовите и кафулињата мора да бидат затворени, а рестораните можат да примат гости во 50 отсто од нивниот полн капацитет. Речиси сите други продавници и јавни институции мора да го ограничат влезот на 70 отсто од нивниот целосен капацитет. Само 10 луѓе можат да се групираат на јавни места или на приватни собири.
Каталонија е единствениот шпански регион кој воведе вакви мерки за ограничување, додека другите региони не го следеа ваквиот пример.
Шпанскиот премиер Педро Санчез денеска соопшти дека луѓето мора повторно да носат маски надвор, иако повеќето граѓани тоа веќе го прават доброволно.
Покрај тоа, само оние кои се вакцинирани, кои се опоравиле од Ковид-19 или кои имаат негативен тест, можат да влезат во рестораните и други места за забава во многу делови од земјата.
Бројот на заразени во Шпанија неодамна се зголеми и покрај високата стапка на вакцинација од 80 проценти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.