Европа
Литванскиот претседател до Блинкен: Русија треба да се запре, инаку ќе следи трета светска војна
Литванскиот претседател Гитанас Наузеда денеска го предупреди министерот за надворешни работи на САД, Ентони Блинкен, дека неуспехот да се запре руската агресија во Украина ќе доведе до глобален конфликт.
Наузеда му се обрати на американскиот државен секретар, кој е во посета на балтичките земји, велејќи дека рускиот лидер Владимир Путин нема да застане во Украина и дека светот има обврска да им помогне на Украинците со сите расположливи средства.
„Навистина со сите средства мислам ако сакаме да ја избегнеме третата светска војна. Изборот е во наши раце“, изјави Наузеда во разговорот со Блинкен.
Членката на НАТО, Литванија испрати воена помош за Украина и прифати помал број украински бегалци од почетокот на руската инвазија на 24 февруари.
По Литванија, Блинкен во понеделник и вторник треба да ги посети и соседните Латвија и Естонија.
Белорусија, која граничи со Литванија и Латвија, ѝ дозволи на Русија да изврши напад од нејзина територија, откако руските трупи со недели беа стационирани во земјата под маската на воени вежби.
Претходно, шефот на американската дипломатија пред вработените во американската амбасада во Вилнус изјави дека руската инвазија на Украина ги прекршила основните принципи создадени за одржување на мирот меѓу земјите.
„Важно е луѓето да видат што навистина е во прашање овде, и тоа да е пошироко од Украина, пошироко од балтичките земји, па дури и пошироко од Европа“, рече Блинкен.
Некои дипломати кои работат за американската амбасада во Белорусија се исто така во Вилнус, откако дипломатската мисија беше затворена минатата недела од безбедносни причини.
Минатата година Белорусија му забрани на амбасадорот Фишер да ја преземе функцијата и му рече на Вашингтон дека ќе го намали бројот на американскиот дипломатски персонал како одговор на американските санкции, откако белорускиот лидер Александар Лукашенко ги задуши протестите во 2020 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.