Свет
Лукашенко: Украина треба да прифати дека изгуби некои региони ако сака да избегне нуклеарна војна
Претседателот на Белорусија, Александар Лукашенко, изјави дека крајот на конфликтот во Украина зависи од Киев, кој треба да ги води преговорите со Москва.
„Сѐ зависи од Украина, она што е интересно во овој момент е дека воените операции сега може да се завршат под поповолни услови за Украина. Треба да седнат на преговарачка маса и да се обврзат никогаш да не ѝ се закануваат на Русија“, изјави белорускиот лидер во интервју за агенцијата „Франс прес“.
Лукашенко смета дека Украина, Западот и Русија треба да се договорат за прекин на конфликтот во Украина за да се избегне нуклеарна војна.
„Треба да застанеме, да постигнеме договор, да ставиме крај на оваа конфузија, операција и војна во Украина. Да застанеме, а потоа да одлучиме како да продолжиме да живееме. Нема потреба да се оди понатаму. Бездната на нуклеарната војна е подалеку“, рече белорускиот претседател.
Тој исто така додаде дека Украина треба да се помири со фактот дека ги изгубила регионите на истокот и на југот на земјата, кои потпаднаа под контрола на Русија, пренесува „Франс прес“.
Според мислењето на Лукашенко, предоцна е да се разговара за ова прашање.
„За ова веќе не се разговара, можеше да се разговара во февруари, март“, рече белорускиот лидер.
Истовремено, тој предупреди дека Русија сè уште не ги употребила сите сили што можела во Украина.
Лукашенко потсети дека Западот го предизвика конфликтот во Украина.
„Ги видовте причините за оваа војна – ако Русија не го препречеше НАТО, вие (западните земји) ќе се организиравте и ќе почневте напад врз него. Вие сте нејзината основна причина и продолжувате со оваа војна“, рече Лукашенко во интервју за „Франс прес“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хезболах го нападна северниот дел на Израел со беспилотни летала
ЛибанскиХезболах соопшти дека извршил напад со беспилотни летала врз израелските воени бази северно од градот Акра, во најдлабокиот напад на израелска територија од почетокот на војната во Газа.
Израелската војска соопшти дека нема сознанија за некој од нејзините објекти погодени од Хезболах, но претходно соопшти дека пресретнала две „воздушни цели“ во близина на северниот брег на Израел.
Двете страни редовно разменуваат ракетни и воздушни напади од почетокот на војната во Газа минатиот октомври, но се воздржуваат од отворена војна. Сепак, со оглед на честите напади, постојат стравувања дека несреќа или погрешна проценка на која било страна може да доведе до брза ескалација на конфликтот, како и до потенцијално вклучување на други регионални и светски сили, вклучително и САД.
Хезболах вели дека нападот е одмазда за претходниот израелски напад во кој загина еден од нивните борци. Групата објави сателитска снимка со локацијата на нападот на половина пат помеѓу Акра и Нахарија на север. На едно видео е видливо и како израелската воздушна одбрана ги пресретнува беспилотните летала.
Израелската војска соопшти дека нејзините воени авиони одговориле со гаѓање воени цели во областа Маркаб во јужен Либан.
Најмалку две лица загинаа, а уште шест се повредени откако израелски воздушен напад погоди станбена област во јужниот либански град Ханин, објави во вторникот официјалната либанска новинска агенција NNA.
Регион
Убиен работник од Украина во Славонски Брод
Во центарот на Славонски Брод во попладневните часови е пронајдено машко тело.
Полициската управа Брод-Посавина соопшти дека е приведено едно лице поврзано со инцидентот.
Се работи за млад градежен работник од Украина. Конфликт се случил во стан во центарот на градот каде што биле сместени работниците (родени во 90-тите).
Полицијата соопшти дека телото на мажот е пронајдено во куќата околу 15:17 часот и дека се води истрага, а потоа и кривична истрага која треба да ги расветли сите околности.
Свет
Макрон и градоначалничката на Париз најавија дека ќе пливаат во Сена: Сакаат да го докажат добриот квалитет на водата за Олимписките игри
Градоначалничката на Париз, Ан Идалго изјави дека ќе плива во Сена со францускиот претседател Емануел Макрон за да докаже дека квалитетот на водата на реката ќе биде на нивото потребно за претстојните Олимписки игри.
Идалго потврди дека ги поканила организаторите на Олимпијадата и високите француски функционери да пливаат во Сена на настан кон крајот на јуни или почетокот на јули оваа година, вклучувајќи го и Макрон, кој претходно ветил дека ќе плива во реката, пренесува АП.
„Ќе нуркаме во Сена и многу волонтери се појавија да нуркаат со мене и многу спортисти ќе бидат таму. Ќе биде безбедно да се плива во Сена“, изјави Идалго.
Претходно, француската невладина организација „Suffrider Foundation“ предупреди дека квалитетот на водата во Сена не е доволно добар за пливање за време на Олимпијадата, врз основа на шестмесечни мерења на квалитетот.
За чистење на оваа река ќе бидат инвестирани 1,4 милијарди евра, а од 1 јуни ќе почнат новите рутински мерења.
Организаторите на ОИ претходно најавија дека е можно да се одложат одредени настани во случај на голема загаденост на Сена, а во најлош случај ќе биде откажан пливачкиот дел од планираните триатлони.
Исто така, беше најавено дека пливањето во делови на Сена ќе биде дозволено за јавноста, за прв пат од 1923 година.