Свет
Моди му порача на Путин: Сега не е време за војна
Индискиот премиер Нарендра Моди му порача денеска на рускиот претседател Владимир Путин дека сега не е време за војна бидејќи недостигот на храна, ѓубрива и гориво е еден од главните проблеми во светот.
„Знам само дека денешната ера не е ера на војна и за тоа разговарав со вас на телефон“, му рекол Моди на Путин на маргините на самитот во Узбекистан додавајќи дека демократијата, дипломатијата и дијалогот го држат светот заедно, објави „Ројтерс“.
Путин одговори дека ја разбира загриженоста на Моди за војната во Украина.
„Го знам вашиот став во однос на конфликтот во Украина и ја знам вашата загриженост. Сакаме сѐ да заврши што е можно побргу“, одговори Путин.
Путин изјави и дека трговијата меѓу двете земји се зголемува благодарение на дополнителните испораки на руско ѓубриво на индискиот пазар, кои се зголемени осум пати, пренесе „Телеграф.рс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Германија уапси две лица: соработувале со Русите, планирале да ја саботираат армијата
Две лица, кои освен германско државјанство имаат и руско државјанство, се уапсени во Германија поради наводно планирање саботирање на воени објекти, вклучително и американски, со цел да ја поткопаат воената поддршка за Украина, соопшти денеска германското обвинителство. Властите извршија претрес во домовите и работните места на двајцата осомничени, кои се обвинети дека работеле за странска тајна служба, се наведува во соопштението на обвинителството.
Еден од осомничените, идентификуван како Дитер С., разговарал за можни заговори со лице поврзано со руската тајна служба од октомври 2023 година, се посочува во соопштението.
Дитер С. подготвувал бомбашки напади и палење во воени објекти, вклучително и оние со кои управуваат американските сили, се додава во соопштението.
Според магазинот „Шпигел“, еден од објектите е воената база „Графенвоер“ во јужната сојузна држава Баварија, каде што украинските војници се обучуваат да управуваат со американските тенкови „Абрамс“. Руската амбасада во Берлин не одговори веднаш на барањето за коментар.
„Намерата на акциите беше да се поткопа воената поддршка што Германија и ја дава на Украина против руската воена агресија“, се вели во соопштението на германските обвинители.
Свет
Уште еден земјотрес ја погоди Турција
Земјотрес со јачина од 3,9 степени според Рихтеровата скала утрово ја погоди Турција.
Земјотресот се случил на длабочина од 11 километри, во областа Гоксун во Кахраманмараш.
Засега нема информации за евентуални жртви и материјална штета.
Турција синоќа беше погодена од земјотрес со јачина од 4,7 степени според Рихтеровата скала. Земјотресот се случил на 46 километри јужно од Турхал, на длабочина од 10 километри.
Свет
Поранешниот директор на Мосад за нападот на Иран: Сите опции се „на маса“
Поранешен директор за разузнавање во израелската разузнавачка агенција Мосад вели дека таргетирањето на нуклеарните објекти во Иран е една од опциите за одговор на нападот врз Израел, пишува „Sky News“.
Зохар Палти зборуваше за можните форми на одговор откако Иран истрела повеќе од 300 проектили и беспилотни летала кон Израел.
Запрашан дали сè е на маса, вклучително и таргетирање на нуклеарни постројки, Палти рече: „Нема прашање. Сè е на маса во моментов“.
Запрашан дали тоа вклучува нуклеарни постројки, тој рече: „Вклучувајќи сè“.
Иран во неделата привремено ги затвори своите нуклеарни постројки од „безбедносни причини“.
Нападот врз Израел уследи по наводниот смртоносен израелски напад врз иранскиот конзулат во Сирија. ИДФ соопшти дека 99 отсто од оружјето испукано кон Израел не успеало да навлезе во неговата моќна противвоздушна одбрана.
Сепак, како што пренесуваат медиумите, израелската влада нема да изврши одмазда за масовниот ирански напад на израелска територија минатиот викенд.