Европа
Наплив на алги направи помор на илјадници тони лосос во Норвешка
Во текот на изминатата недела во норвешките рибни фарми дојде до помор на речиси 8 милиони лососи, што резултира со загуба на повеќе од половина од очекуваниот раст на продажбата оваа година, објави во средата норвешкиот Совет за морска храна.
Алгите, кои бргу се шират околу брегот на северна Норвешка, се лепат на жабрите на рибите и ги задушуваат. Рибите во морето може да испливаат подалеку од појасот на алги, но оние во фармите се заробени.
Штетните алги, меѓу другото, се шират и поради топлото време. Алгата продолжува да се шири, соопшти норвешката Управа за рибарство.
Управата за рибарство во вторникот соопшти дека имало помор на над 10.000 тони лосос, со продажна цена од речиси 620 милиони норвешки круни (околу 63 милиони евра), но Советот за морска храна посочува дека загубата ќе биде многу поголема.
„Прерано е да се каже колку големи ќе бидат загубите за производителите. Прелиминарните бројки укажуваат на 8 милиони риби, што одговара на 40.000 тони лосос што нема да стигнат до пазарите“, рече аналитичарот на Советот, Пол Аандал.
Според еден аналитичар, ова значи неостварување на половина од очекуваниот пораст и зголемување на цените на лососот.
Норвешка извезе 1,24 милион тони лосос во 2018 година, што е 2,5 проценти повеќе од 2017 година. Оваа година се очекуваше раст од речиси 4 проценти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Повеќе од сто килограми кокаин пронајдени меѓу банани во супермаркети во Германија
Вработени во неколку германски супермаркети во Берлин и Бранденбург откриле повеќе од 100 килограми кокаин во пакувања со банани, пренесува „Билд“ повикувајќи се на полициски извори.
Во Бранденбург, како што се наведува, во најмалку четири продавници биле пронајдени меѓу 20 и 100 килограми кокаин, пренесува „Танјуг“.
Полицијата во моментот спроведува истрага со проверка на стоката во продавниците поради што сѐ уште не се знае конечната количина дрога во нив, но не и информацијата во колку продавници има.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.