Европа
На Макрон му се заканува дебакл во вториот круг од регионалните избори
Во Франција се одржува втор круг од регионалните избори, што може да го смени односот на „политичките тешкаши“ кои следната година ќе се натпреваруваат во претседателската трка.
Резултатите од првиот круг минатата недела беа разочарувачки за претседателот Емануел Макрон, чија партија веројатно нема да освои ниту еден од 13-те континентални региони на Франција.
Крајно десничарската партија предводена од Марин Ле Пен исто така оствари послаб резултат од очекуваното. Првиот проблем на денот ќе биде излезноста, која беше исклучително ниска во првиот круг. Околу 48 милиони луѓе се поканети на гласање, со строг епидемиолошки протокол, особено поради делта варијантата на коронавирусот.
Со многу мала излезеност, партијата на Марин Ле Пен во првиот круг поведе во само еден регион, а анкетите предвидуваа дека може да освои шест региони. Наместо тоа, традиционалните конзервативци, кои беа поразени од Макрон на претседателските и парламентарните избори во 2017 година, одеднаш се вратија. Тројцата главни членови, сите поранешни министри и сегашни лидери на некои од најнаселените региони во Франција, се кандидираат за реизбор, што според нив ќе биде отскочна даска за претседателските избори во 2022 година.
Ксавиер Бертан од северниот регион От де Франс стана фаворит на конзервативците за претставување на партијата во претседателската трка. Советниците на Макрон сметаат дека поранешниот министер за здравство претставува закана што може да го загрози централно-десничарското гласачко тело на претседателот во првиот круг од изборите во април. Претседателката на регионот Ил де Франс, во кој се вклучени и Париз, Валери Пекрес и Лоран Вакиез од пошироката област на Лион, се уште двајца претставници на конзервативците чиј резултат може да биде одлучувачки дали да го предизвикаат Бертан следната година.
Партијата на Марин Ле Пен продолжува да се надева на освојување на регионот Прованса-Алпи-Азурен Брег, брегот околу Марсеј и Ница. Освојувањето на тој регион би дал поттик на Ле Пен и платформата да му се спротивстават на Макрон во 2022 година, што би било повторување на дуелот од 2017 година, кој според анкетите, Макрон би го победил повторно, но овојпат со послаба предност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.
Европа
Нова корупциска афера во Украина, осомничен министер за земјоделство
Украинската антикорупциска полиција го именуваше министерот за земјоделство Микола Солски како осомничен во кривичната истрага за незаконско стекнување на државно земјиште во вредност од седум милиони долари.
Солски, кој го надгледува производството на жито во Украина за време на војната од март 2022 година, рече дека не разбира зошто сега се појавија наводите поврзани со настаните од 2017 и 2018 година.
„Не се согласувам со обвинувањата“, им рече тој на новинарите во Киев откако Украинското национално биро за борба против корупцијата објави соопштение со резултатите од истрагата.
Канцеларијата соопшти дека министерот го предводел планот за стекнување на државно земјиште во вредност од околу 6,9 милиони евра и обид да се стекне земјиште во вредност од 190 милиони гривни.
Солски е првиот министер во владата на претседателот Володимир Зеленски кој е осомничен во корупциски скандал.
Зеленски се обидува да спроведе стапка на нулта толеранција за корупција, а минатата година го отпушти министерот за одбрана поради обвинувања за примање мито поврзани со одбранбената индустрија.
Законодавците изминативе денови порачаа дека очекуваат реконструкција на Владата, секако до крајот на пролетта.