Свет
Норвежаните протестираат против надградбата на американскиот арктички радар
Додека американскиот радарски систем во најсеверниот регион во Норвешка, Финмарк, кој се наоѓа на 28 километри од руската граница, се надградува со сосема нова опрема, локалното население станува сè повнимателно и несигурно, пренесува „Спутник“.
Надградувањето на американскиот радар во поларниот норвешки град Вардо предизвикува незадоволство кај локалното население, објави националниот радиодифузер НРК. Минатиот викенд, 153-метарскиот американски товарен брод „Оушн фридом“ пристигна во Вардо со втор товар со разузнавачка опрема директно од Портланд, Мејн.
„Целиот кеј на Вардо беше затворен со високи метални огради. Областа беше под силна стража од воени и цивилни лица. Најголемиот дел од специјалната достава беше придружуван од полицијата. Ова не беше добредојдена глетка за жителите на рибарското село, кои се чувствуваат сè повеќе вовлечени во борбата на суперсилите против нивната волја“, стои во извештајот.
Локалниот жител Стиг Нилсен ја опишал ситуацијата како „чисто војување“. Тој посочил дека американската опрема може да се користи за попречување на руските авиони.
„Тоа е едноставно закана за градот. Апсолутно страшно “, рекол Нилсен за НРК.
Друг локален жител, Асле Кристијансен, ја довел во прашање законитоста на надградбата, посочувајќи дека има околу 2.000 луѓе кои живеат околу новиот радар.
„Како ќе спасуваме животи ако нешто се случи, не можам да разберам. За возврат нема да добиеме ништо. Ги гледам само негативностите на целата работа. Ова ја прави целата заедница тука во Вардо небезбедна“, вели Кристијансен.
Рони Бјорклунд, кој живее на 200 метри од радарот, целиот Вардо го гледа како бомбашка цел.
„Прво, ова е провокација кон нашите соседи на исток. Второ, ние сме бомбашка цел ако нешто се случи. Воопшто не е добро“, смета Бјорклунд.
Градоначалникот на Вардо, Орјан Јенсен, рекол дека иако лично не е загрижен, може да ја разбере загриженоста на жителите. Тој дури и се согласил дека може да дојде до „остра ситуација“.
„Радарскиот систем е трн во око на Русија. Можна е таква ситуација во Вардо“, вели тој.
Јенсен рекол дека очекува Министерството за одбрана да преземе мерки за подобрување на безбедноста околу радарскиот систем и за зајакнување на мерките во случај на евакуација.
Министерството за одбрана е свесно за локалните критики, но смета дека радарскиот систем е важен за заштита на Норвешка и нејзините национални интереси. Според високата советничка на Министерството за одбрана, Марита Исаксен Ванберг, модернизацијата, која трае веќе неколку години, нема да ја промени мисијата на радарскиот систем или некако да ги зголеми воените тензии на северот.
Поради својата близина до полуостровот Кола и Баренцовото Море, американскиот радар„ Глобус два“ беше сместен во Вардо. Иако официјално се користи за следење вселенски отпад, неговата можна улога во американскиот противракетен систем и можноста за изградба на база на податоци за руски ракети го направија трн во норвешко-руските односи.
Надградениот и помоќен радар наречен „Глобус III“ е во фаза на изградба уште од 2017 година.
И двата радара се повеќегодишен извор на полемики за жителите на Вардо. И покрај огромната критика, тие обезбедуваат многу потребни работни места за рибарското село, чие население брои 2.100 жители и е преполовено во однос на 1970-тите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Свет
Шефот на НАТО: Никој нема корист од војната на Блискиот Исток
Генералниот секретар на НАТО Јенс Столтенберг изрази загриженост за ситуацијата на Блискиот Исток по израелскиот напад врз Иран.
„Клучно е конфликтот да не излезе од контрола и затоа ги повикуваме сите страни на воздржаност“, изјави Столтенберг денеска во Брисел. „Никој нема корист од војната на Блискиот Исток“, рече тој.
Израел го нападна иранскиот Исфахан
Според извештаите на медиумите, Израел ја нападнал иранската провинција Исфахан рано во петокот како одговор на големиот ирански напад со беспилотни летала и ракети минатиот викенд.
Според израелскиот весник Jerusalem Post, нападот бил насочен кон воздушна база во Исфахан, недалеку од иранските нуклеарни постројки. Сепак, според Меѓународната агенција за атомска енергија (МААЕ), нуклеарните капацитети не биле погодени.
Свет
Шефот на МААЕ: Не ги напаѓајте иранските нуклеарни постројки
Шефот на Меѓународната агенција за атомска енергија (МААЕ), Рафаел Гроси, ги предупреди земјите да не ги напаѓаат иранските нуклеарни постројки.
Во Исфахан, каде што беше извршен нападот, има неколку нуклеарни постројки во земјата. Гроси за програмата на Би-би-си Радио 4 изјави дека му олеснало кога слушнал дека ниту една нуклеарна постројка не била погодена во нападот.
„Нападот врз иранските нуклеарни постројки би бил страшна работа“, вели Гроси.
Тој смета дека во светот деновиве се појавува прашањето за таргетирање на нуклеарни постројки и дека МААЕ го смета за жално.