Свет
Откриени 29 милиони вакцини на „Астра зенека“ во фабрика во Италија, ЕУ бара објаснување
„Астра зенека“ објави дека во фабрика во Италија се пронајдени 29 милиони дози вакцини наменети за Европската Унија и за донации во посиромашните земји преку програмата „Ковакс“, предводена од Светската здравствена организација (СЗО).
На барање на Европската комисија италијанските безбедносни сили извршија инспекција за време на викендот во фабриката „Каталент“ во Анањи во близина на Рим и таму пронајдоа вакцини од „Астра зенека“, пишува „Ла Стампа“. Италијански официјален претставник подоцна го потврди извештајот за инспекцијата и рече дека дозите ќе бидат испратени во Белгија.
Серијата реакции на извештајот покажуваат ниво на недоверба кон англо-шведскиот производител, што го намали снабдувањето со вакцини во Унијата до крајот на јуни на 100 милиони дози наместо 300 милиони дози според договорот.
Пронајдените 29 милиони дози вакцина се доволни за вакцинирање 14,5 милиони луѓе.
„За време на инспекцијата биле пронајдени 30 милиони вакцини, кои се запленети“, изјави портпаролот на француската влада, Габриел Атал.
„ЕУ нема да страда поради туѓите грешки во врска со вакцинацијата“, нагласи тој.
Европратеникот Питер Лизе од истата партија со германската канцеларка Ангела Меркел рече дека извештајот го оставил без зборови и ја повика „Астра зенека“ да ја разјасни ситуацијата.
Компанијата објасни денес дека повеќето дози од фабриката „Каталент“ се наменети за ЕУ, а остатокот е за посиромашните земји преку програмата „Ковакс“.
Марио Гаргиуло од „Каталент“ за „Ројтерс“ изјави дека поседувањето 29 милиони дози вакцина во фабриката е во согласност со вообичаената постапка и дека компанијата често има повеќе дози таму. Европската комисија одби да го коментира случајот.
УНИЦЕФ, во име на програмата за размена на вакцини „Ковакс“, објави дека закажаната достава на вакцини до сите земји, вклучително и Виетнам, мора да се одложи поради доцнење во производството.
Официјален претставник на ЕУ рече дека некои дози пристигнале во фабриката во Италија од холандска фабрика за вакцини управувана од „Халикс“, подизведувач за „Астра зенека“. Фабриката во Анањи е задолжена за пакување на вакцините произведени во фабриката „Халикс“ и во фабриката во Белгија, управувана од подизведувачот „Термо Фишер Синсиенл“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Моќната сестра на севернокорејскиот лидер: Ќе изградиме супериорна воена сила
Ким Јо Џонг, моќната сестра на севернокорејскиот лидер Ким Џонг Ун, рече дека земјата ќе продолжи да гради супериорна и најмоќна воена сила за да го заштити својот суверенитет и регионалниот мир, објави севернокорејската новинска агенција КЦНА.
Ким рече дека серијата воени вежби на американската војска во регионот оваа година, почнувајќи со вежби спроведени со „јужнокорејски марионетски воени гангстери“, опасно ја нарушуваат регионалната безбедносна средина.
„Ќе продолжиме да ја градиме најголемата и најмоќната воена сила за заштита на нашиот суверенитет, безбедност и регионален мир“, ја цитираше КЦНА нејзината изјава.
Војските на САД и Јужна Кореја во последните месеци спроведоа серија големи и интензивни вежби, а лидерите на двете земји ветија дека ќе ја подобрат борбената готовност против воените закани на Северна Кореја.
Околу 100 воени авиони извршија двонеделни воздушни вежби овој месец, соопшти јужнокорејската војска.
Северна Кореја вели дека американските воени вежби се подготовки за нуклеарна војна против неа. Вашингтон и Сеул велат дека вежбите имаат одбранбен карактер и се спроведуваат редовно за да се одржи подготвеноста.
Свет
Израел: Нашата армија не ги закопа Палестинците во масовна гробница во Газа
Телата откриени во масовна гробница во Појасот Газа не биле закопани од израелски војници, туку од Палестинци, соопшти израелската амбасада во Женева.
„Тврдењето дека израелските одбранбени сили (ИДФ) закопале палестински тела е неосновано“, соопшти амбасадата.
„Војниците само ги прегледале телата во гробницата во потрага по израелски заложници, се почитувало достоинството на загинатите, а телата на Палестинците биле вратени на истото место“, се додава во соопштението.
„Прегледот беше извршен внимателно и исклучиво на места каде разузнавачките информации укажуваа на можно присуство на заложници“, соопшти амбасадата.
Палестинскиот тим за цивилна одбрана во Газа извести дека масовна гробница со 283 тела била откриена во близина на болницата Насер во градот Кан Јунис на југот од енклавата.
Според канцеларијата на високиот комесар на ОН за човекови права Фолкер Турк, кој ја повика цивилната одбрана, на некои тела им биле врзани рацете.
Свет
Кина изрази противење на пакетот помош од САД за Тајпеј
Кина е „одлучно против“ на американскиот пакет за безбедносна помош за Тајпеј во износ од над осум милијарди долари, соопшти Канцеларијата за тајвански работи на кинеското Министерство за надворешни работи.
Пекинг ги повика САД да ја исполнат својата обврска да не ја поддржуваат независноста на кинескиот регион Тајван, како и да прекинат со секаков вид негово вооружување, рече портпаролот на Канцеларијата.
Американскиот Сенат усвои нацрт-закон со кој се одобрува пакетот безбедносна помош за Израел, Украина и кинескиот регион Тајван во вкупна вредност од 95 милијарди долари.