Свет
Паравоените одреди на смртта поддржани од ЦИА во Авганистан обвинети за воени злосторства
Со помош и со обука од ЦИА авганистанските паравоени сили извршиле серија воени злосторства и други тешки злоупотреби против цивилите, вклучително и тортура и егзекуции, открива истрагата на „Хјуман рајтс воч“, пренесува РТ.
Интервјуирајќи очевидци, американски специјални оператори и персонал во авганистанската војска, невладината организација документирала над десетина случаи на сериозна злоупотреба од страна на силите поддржани од САД кон крајот на 2017 и 2019 година, вклучително и вонсудски егзекуции и исчезнувања, недискриминирачки воздушни напади, напади врз медицински установи и други прекршувања на правилата на војување.
Повеќето од злоупотребите се случувале при ноќните рации убиј или фати за кои американските воени претставници тврдат дека се суштински дел од контратерористичката стратегија во Авганистан.
Во текот на војната рациите привлекоа остри критики поради тенденцијата да резултираат со колатерални цивилни смртни случаи, па дури беа привремено забранети од поранешниот авганистански претседател Хамид Карзаи во 2013 година. Вратени само една година подоцна, рациите нагло зачестија.
„Почнувајќи од 2017 година, добиваме сè повеќе извештаи за цивилни жртви и прекршувања на законите за војување во ноќните рации и други операции поддржани од САД, а спроведени од авганистанските сили. Егзекутирани затвореници, луѓе убивани со рацете врзани зад грбот, деца застрелани во главата во ноќните операции – нема сомнение – со ова се кршат законите на војување“, вели Андреа Прашов, в.д. директор на ХРВ во Вашингтон.
Во извештајот на ХРВ се наведува дека многу од рациите се засновани на погрешни разузнавачки информации понекогаш добиени од непријателски борци под тортура или принуда или од локални моќници што ги напаѓаат ривалите со лажни обвиненија користејќи ја моќта на американската војска како своја приватна милиција.
Авганистанската влада нема развиено никаков значаен капацитет за да се истражат смртни случаи на невини жртви или лошо работење со разузнавачки информации.
„Силите за напад обучени од ЦИА, кои вклучуваат нерегуларни трупи надвор од официјалниот синџир на команда на авганистанската војска, се однесуваат како одреди на смртта влегувајќи во домовите среде ноќ и често пукајќи пред да постават прашања“, вели дипломат запознаен со операциите.
Покрај рациите во домовите, во извештајот се документирани и напади на болници и други здравствени установи, што е забрането според меѓународното право.
„Видовме напади врз медицински установи, врз луѓе што не беа нужно борци или ако имаше борци, дополнителни напади врз цивили“, рече Прашов.
Одговарајќи на извештајот, ЦИА ги оцени наводите како лажни или претерани додавајќи дека ниту спроведуваат ниту свесно би учествувале во незаконски активности.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Двегодишното девојче кое исчезна во Србија се бара насекаде, полицијата врши распити на голем број лица
Потрагата по девојчето Данка Илиќ (2), кое во вторникот исчезна во Бањско поле во Бор, се уште трае и не се знае како е можно девојчето да се изгуби. Полицијата ја проверува секоја информација што ќе дојде до нив, сослушани се неколку лица, повторно се разговараше со родителите, но ниту една информација не укажува на тоа што се случило и каде е Данка, пишува „Нова.рс“
Екипата на порталот денеска беше во Бањско поле каде се уште има голем број полицајци. Властите со багер го чистеа теренот околу куќата во која последен пат била видена Данка. Исто така, на имотот е извршено ископување, а јамите повторно се пребаруваат.
Полицијата ја истражува секоја трага што може да укаже на тоа што се случило со девојчето.
„Полицијата разговараше со голем број луѓе, соседи, познаници, се со цел да ја пронајде Данка. Досега ниту една трага не довела до тоа каде е девојчето или што и се случило“, вели изворот на Нова.рс.
Истрагата се одвива во повеќе правци, а денеска полицијата повторно разговараше со родителите на девојчето.
„На вториот ден од нејзиното исчезнување, родителите на девојчето биле во полиција до доцна во ноќта. Тие утрово биле повторно повикани, а исто така цел ден поминале во полициска станица. Не се познати околностите врз основа на кои два дена биле на распит. Извесно е дека родителите вчера имале разговори и со Центарот за социјална работа, а повеќе од тоа не се знае“, додава изворот на „Нова.рс“.
Неофицијално беше објавено и дека полицијата нашла нова трага, односно дупка на местото на кое исчезна девојчето, и дека целото внимание го насочува кон тоа.
Она што е сигурно е дека се проверуваат сите околности и се сослушуваат и сите лица кои можеби имаат сознанија за случајот.
Меѓу нив е и кој бил зад воланот на автомобилот „пунто“ што го снимиле надзорните камери на куќата во Бањско Поље, во моментот на исчезнувањето на малата Данка. Куќата пред која е снимен автомобилот се наоѓа на стотина метри од местото каде исчезна Данка.
На снимката се гледа автомобил кој брза околу 13 часот и 47 минути, а малото девојче исчезнало малку пред тоа, околу 13 часот и 45 минути, како што вели нејзината мајка.
„Ја знам таа жена, ја видов како носи две деца во парк, страшно е што се случи“, велат соседите.
Девојчето Данка Илиќ исчезна во вторникот во Бањско Поље кај Бор. Во средата по 27 часот полицијата ја прекина потрагата и започна друг вид на акција за пронаоѓање на детето. Во ова мало место кај Бор се уште остана одреден број полицајци, а вчера беше блокиран и пристапот до куќата.
Во потрагата по исчезнатото дете се вклучени припадници на Жандармеријата, пожарникари, планинска спасувачка служба, како и голем број доброволци.
Регион
„Само се шалевме“ – уапсените поради тврдењата за исчезнатото девојче се донесени во полиција
Тројцата кои беа уапсени во Босна и Хервеговина, а тврдеа дека имаат информации за исчезнатото девојче од Србија, Данка Илиќ и бараа пари, во полиција рекле дека „само се шегувале“, пренесува Н1 Сараево.
Федералната полициска управа вечерва уапси три лица кои на социјалните мрежи тврдеа дека имаат информации за исчезнувањето на двегодишното девојче од Србија, Данка Илиќ, по коешто трага речиси целиот регион.
Како што јави известувачот на Н1, уапсените биле донесени во зградата на Федералната полициска управа.
Како што се дознава, за време на преносот во живо на „Тик-ток“, тие побарале десетици евра за да ја откријат локацијата на девојчето и тврделе дека ја чуваат во подрумот.
Веднаш по апсењето изјавиле дека „само се шегувале“. Сите уапсени се членови на исто семејство.
Инспекторите на Одделот за компјутерски криминал на Федералната полициска управа преку ИП адресата ги лоцираше лицата кои тврделе дека имаат информации за исчезнувањето на детето.
Вчера на социјалните мрежи се појави видео од надзорната камера на куќа лоцирана во близина на местото каде исчезна Данка Илиќ во 13:45 часот.
На видеото се гледа автомобил кој брза во 13 часот и 47 минути, а малото девојче исчезнало малку пред тоа, односно во 13 часот и 45 минути, како што рекла нејзината мајка.
Свет
Тешка автобуска несреќа во Јужна Африка, загинаа 45 лица
Министерството за транспорт на Јужна Африка денеска соопшти дека 45 лица загинале, а едно лице е повредено во автобуска несреќа кај Маматлакала во северната провинција Лимпопо.
Министерството објави дека возачот изгубил контрола над автобусот, кој потоа удрил во бариерите на мостот, по што возилото паднало преку мостот, удрило во земјата и се запалило.
Автобусот превезувал луѓе од Боцвана до Морија, град во Лимпопо.
Спасувачките операции продолжија до доцна денеска.
Некои тела изгореле до непрепознатливост, а некои патници останале заробени во урнатините на автобусот, соопштија сообраќајните власти во Лимпопо.