Свет
Пелоси бара на Трамп да му се одземат кодовите за нуклеарното оружје
Претседателката на демократите во Конгресот на САД, Ненси Пелоси, денес изјави дека разговарала со началникот на Генералштабот на американската армија, Марк Мили. Разговорот бил спроведен со цел да се спречи шефот на државата во заминување Доналд Трамп да иницира воени акции или нуклеарен напад.
Пелоси им рекла на членовите на Конгресот дека разговарала со Мили за „достапните мерки за спречување на нестабилниот претседател да започне воени непријателства или да пристапува до кодови и да нареди нуклеарен напад“, пренесе „Асошиејтед прес“.
Таа изјавила дека ситуацијата со „овој ментално неурамнотежен претседател не може да биде поопасна отколку што е“.
Пелоси се состана вечерва со демократите од долниот дом на Конгресот за да ја разгледа можноста за започнување на постапката за отповикување на републиканецот Трамп, и покрај фактот дека неговиот мандат истекува на 20 јануари.
Извори на АП наведуваат дека Пелоси на состанокот изјавила дека Мили ѝ рекол дека се преземаат чекори што ќе го спречат Трамп да изврши нуклеарен напад.
Вчера, Пелоси и лидерот на демократите во Сенатот, Чак Шумер, ги повикаа американскиот потпретседател во заминување Мајк Пенс и министрите да се повикаат на 25. амандман на Уставот на САД и веднаш да го отстранат Трамп.
Според 25. амандман, потпретседателот на САД и повеќето министри можат да го прогласат шефот на Белата куќа за неспособен за извршување на функцијата. Во тој случај, потпретседателот на Соединетите Држави веднаш ќе стане шеф на државата.
Демократите сакаат да го отстранат Трамп пред 20 јануари, обвинувајќи го за поттикнување револт на неговите приврзаници кои упаднаа во Конгресот на САД во средата и го држеа под окупација четири часа. Пет лица беа убиени за време на насилствата во Конгресот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Никој нема корист од војната на Блискиот Исток
Генералниот секретар на НАТО Јенс Столтенберг изрази загриженост за ситуацијата на Блискиот Исток по израелскиот напад врз Иран.
„Клучно е конфликтот да не излезе од контрола и затоа ги повикуваме сите страни на воздржаност“, изјави Столтенберг денеска во Брисел. „Никој нема корист од војната на Блискиот Исток“, рече тој.
Израел го нападна иранскиот Исфахан
Според извештаите на медиумите, Израел ја нападнал иранската провинција Исфахан рано во петокот како одговор на големиот ирански напад со беспилотни летала и ракети минатиот викенд.
Според израелскиот весник Jerusalem Post, нападот бил насочен кон воздушна база во Исфахан, недалеку од иранските нуклеарни постројки. Сепак, според Меѓународната агенција за атомска енергија (МААЕ), нуклеарните капацитети не биле погодени.
Свет
Шефот на МААЕ: Не ги напаѓајте иранските нуклеарни постројки
Шефот на Меѓународната агенција за атомска енергија (МААЕ), Рафаел Гроси, ги предупреди земјите да не ги напаѓаат иранските нуклеарни постројки.
Во Исфахан, каде што беше извршен нападот, има неколку нуклеарни постројки во земјата. Гроси за програмата на Би-би-си Радио 4 изјави дека му олеснало кога слушнал дека ниту една нуклеарна постројка не била погодена во нападот.
„Нападот врз иранските нуклеарни постројки би бил страшна работа“, вели Гроси.
Тој смета дека во светот деновиве се појавува прашањето за таргетирање на нуклеарни постројки и дека МААЕ го смета за жално.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.