Свет
Писателот Салман Ружди е опериран, не може да зборува и најверојатно ќе го загуби окото
Британскиот писател со индиско потекло Салман Ружди (75) , кој повеќепати беше избоден со нож во вратот и стомакот од напаѓач на сцената за време на предавање во американската држава Њујорк, опериран е и сега е на вентилатор, објави неговиот агент Ендрју Вајли, пренесува „Би-Би-Си“.
Тој изјави дека „вестите не се добри“, дека Ружди не може да зборува и дека може да го загуби едното око.
„Салман веројатно ќе го изгуби едното око, нервите во раката му се отсечени, а црниот дроб му е пробиен и оштетен“ – рече Вајли.
Њујоршката полиција соопшти дека го привела Хади Матар, напаѓачот на познатиот писател, кој вчера бил нападнат додека се подготвувал да одржи предавање во западниот дел на Њујорк.
Матар, 24-годишен маж од Фервју, Њу Џерси, го купил билетот за да присуствува на настанот, соопшти полицијата, пренесе „Ројтерс“.
Во официјалното соопштение од њујоршката полиција во врска со нападот врз Ружди, тие наведуваат дека напаѓачот го нападнал писателот околу 11 часот по локално време, и го прободел во пределот на вратот и стомакот.
Новинар на АП видел човек како упаднал на сцената во Институтот Чаутаука и почнал да го удира или прободува Ружди додека го претставувале на почетокот на предавањето.
Водителот кој беше со него на сцената, Хенри Рис, се здоби со полесна повреда на главата и беше пренесен во локалната болница, јави „Би-Би-Си“.
Полицијата на прес-конференција соопшти дека персоналот и членовите на јавноста се упатиле кон напаѓачот и го собориле на земја пред да биде уапсен. Се претпоставува дека осомничениот немал соучесници, а засега не е познат мотивот за нападот.
Полицијата соопшти дека лекар од присутните веднаш му пружил прва помош на Ружди.
Писателот потоа со хеликоптер бил префрлен во Универзитетската болница во Медицинскиот центар во Питсбург Хамот, каде што бил чуван од полицијата, каде што му била извршена операција.
Ружди, кој е роден во Индија, се прослави со книгата „Деца на полноќ“ во 1981 година, која беше продадена во повеќе од милион примероци само во Велика Британија.
Но, неговата четврта книга, „Сатанските стихови“, објавена во 1988 година, го принуди да се крие речиси десет години.
Таа е забранета во Иран од 1988 година, бидејќи многу муслимани ја сметаат за богохулна
Една година подоцна, тогашниот ирански лидер, ајатолахот Хомеини издаде фатва, или указ, повикувајќи на смрт на Ружди.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Вонредна состојба во регион во Русија, поради несреќа во рудник затрупани 13 лица
Во Амурската област, на рускиот далечен исток, воведена е вонредна состојба поради инцидентот во рудникот за злато „Пионир“, во областа Зеја, каде 13 лица останаа заробени под урнатините поради пад на карпа, соопштија од тој регион.
„Во Амурската област е воведена регионална вонредна состојба поради инцидентот во рудникот Пионир во областа Зеја со цел да се мобилизираат сите сили и ресурси. Оваа одлука е донесена на вонредна седница што ја одржа регионалниот гувернер“, се вели во соопштението на локалната самоуправа.
Претставник на службата за вонредни состојби за РИА Новости изјави дека во рудникот во моментот на уривањето имало 13 лица. Групата спасувачи, главно од Руската Република Јакутија, се состои од 25 вработени, а со нив пристигнале и четири парчиња опрема.
Покрај тоа, хеликоптерот Ми-8 на руското Министерство за вонредни ситуации полета од територијата Хабаровск до местото на несреќата, пренесува Интерфакс. Од оперативните служби за Интерфакс велат дека, според првичните информации, луѓето се на длабочина од 100 до 150 метри, а засега нема информации за можни жртви.
Свет
Силен земјотрес го погоди Пакистан
Земјотрес со јачина од 5,5 степени според Рихтеровата скала ја погоди провинцијата Белучистан во Пакистан, соопшти германскиот истражувачки центар за геонауки (ГФЗ).
ГФЗ додаде дека земјотресот бил на длабочина од 10 километри, пренесува Ројтерс.
Засега нема информации за жртви, а не се знае и колкава е штетата предизвикана од земјотресот.
Свет
Дваесет загинати во израелски воздушни напади
Дваесет Палестинци се убиени рано утринава во израелските воздушни напади врз Рафах, како и врз централниот дел на Појасот Газа, соопштија здравствените власти во енклавата.
Тие додадоа дека во Рафах, на југот на енклавата, каде во моментов се наоѓаат над милион Палестинци, 14 лица загинаа, а десетици други се ранети во нападите што погодија неколку куќи и станови.
Уште шест лица загинаа во вториот воздушен напад врз куќа во бегалскиот камп Ал-Нусеират во централниот дел на Појасот Газа, додадоа официјални лица.
Деир Ал Балах, град во централниот дел на Појасот Газа, на околу 14 километри јужно од градот Газа, исто така беше бомбардиран во текот на ноќта, јавува Ројтерс.
Од почетокот на израелската агресија врз Газа, според Министерството за здравство во Појасот Газа, загинале повеќе од 31.000 луѓе.
Шефот на израелската разузнавачка служба Мосад, Дејвид Барнеа, во понеделникот отиде во Катар за да ги продолжи преговорите за привремен прекин на огнот и ослободување на израелските заложници во Газа, пишува „Тајмс оф Израел“.