Свет
Полицијата во Мадрид користи класична музика за тренинг на кучиња
Полициска станица во Мадрид користи терапија со класична музика како дел од тренингот на своите кучиња. Дресерите за оваа терапија велат дека е многу ефективна бидејќи ги смирува полициските кучиња, а со тоа тие поефикасно тренираат и работат.
„Кучињата ни се колеги. Со нив поминуваме по осум часа секојдневно. Пред неколку години наидовме на едно истражување за експеримент со класична музика, па си рековме зошто да не се обидеме“, вели инспекторот Рафаел де ла Гандара од полициската единица на Мадрид во прилог за Би-би-си.
Гандара додава дека откако почнале со овој експеримент, секој пат кога минуваат покрај кафезите забележуваат дека кучињата се исклучително смирени, не лаат и не скокаат како претходно.
Инспекторот вели дека работата на дресерите е значително олесната бидејќи кога кучињата се порелаксирани тие подобро работат.
Оваа полициска единица за дресура има вкупно 23 кучиња кои се специјално обучени за пронаоѓање дрога, експлозиви, како и за спасувачки акции.
„Кучињата дресирани за пронаоѓање екплозиви ги изнесуваме на терен секое утро за да се осигураме дека нема да има некаков инцидент во Мадрид“, вели инспекторот.
Гандара објаснува дека оваа единица користи методи со награда наместо казна и додава дека на овој начин кучињата не се подложни на стрес и имаат чувство дека си играат.
„Ќе продолжиме да користиме терапија со класична музика. Ако наидеме на нешто посоодветно, ќе го промениме правецот, но засега ова е најдобриот метод штосме го пробале“, појаснува инспекторот Гандара.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
„Клучот е кај родителите, тие мора да одговорат на едно прашање“, вели поранешен шеф на белградската полиција за случајот со исчезнувањето на Данка
Родителите се тие кои имаат многу да објаснат. Прво, зошто чекаа да го пријават исчезнувањето? Колку што знам, чекаа два часа. Познато е дека кога ќе исчезне дете, веднаш се пријавува за да се реагира брзо, изјави за Телеграф.рс Марко Ницовиќ, поранешен началник на белградската полиција.
Според Ницовиќ, полицијата оди во добра насока, бидејќи ја чешла секоја педа од земјата, но се надеваат и дека темелно се проверуваат граничните премини, бидејќи не ја исклучуваат можноста за киднапирање.
– Би можело да биде се, не е исклучена никаква можност. Ако мајката рече дека го оставила девојчето на минута, го поставуваме прашањето каде би можело да оди двегодишното дете? Колку далеку, без мајка му да го најде? Второ, зошто чекаа два часа? Има простор и за киднапирање, а знаеме дека границата е блиску, но и за многу повеќе. Отворени се многу прашања и останува да се почека истражните органи да си ја завршат работата, вели Ницовиќ за српски Телеграф.
Да потсетиме, потрагата по двегодишната Данка Илиќ влезе во четврти ден. Во потрагата од утрово се вклучени уште 18 пожарникари и кучето Зиги.
Багери вчера цел ден копаа и вадеа ѓубре и шут од куќата, а пред куќата каде последен пат беше видена исчезнатата Данка по која трага цела Србија пристигна тешка механизација која ќе продолжи да работи денес за да се расчисти теренот.
Свет
Во Таџикистан се уапсени девет лица поврзани со масакрот во Москва
Таџикистан уапси девет лица осомничени дека се поврзани со масовното пукање во руската концертна сала минатиот петок, како и милитантна исламистичка група која ја презеде одговорноста за нападот, изјави таџикистански безбедносен извор за Ројтерс. Четворицата осомничени напаѓачи зад најсмртоносниот напад во Русија во последните 20 години се државјани на Таџикистан. Тие беа уапсени со уште седум други осомничени, од кои некои исто така потекнуваат од поранешната советска централноазиска земја.
Одборот за државна безбедност на Таџикистан приведе девет лица во градот Вахдат. Осомничените сега се во главниот град Душанбе, рече изворот, но не даде детали. Најмалку 143 лица загинаа во напад на концертна сала во близина на Москва.
Таџикистан, член на безбедносниот блок предводен од Русија и дом на руската воена база, ги собра семејствата на осомничените напаѓачи за да можат да бидат испрашани од руските истражители во Душанбе, изјавија извори за Ројтерс.
Исламска држава ја презеде одговорноста за нападот во концертната сала, а американските официјални лица рекоа дека имаат разузнавачки информации кои укажуваат на тоа дека нападот го извршил авганистанскиот огранок на мрежата, Исламската држава Хорасан (ИСИС-К).
Руските истражители вчера објавија дека пронашле докази дека напаѓачите се поврзани со „украински националисти“. САД веднаш го отфрлија тврдењето како неоснована пропаганда. Киев остро негираше каква било вмешаност во нападот на концертната сала.
Регион
Нов силен земјотрес ја погоди Грција: се стресе на Крит
Нов земјотрес со јачина од 3,7 степени според Рихтеровата скала ја погоди Грција, соопшти ЕМСЦ.
Земјотресот е регистриран на Крит, на 62 километра од Ираклион, на длабочина од 16 километри.
Земјотресот е регистриран во 12.37 часот по локално време.
Засега нема информации за повредени или материјална штета.
Грција утрово ја погоди силен земјотрес со јачина од 5,7 степени според Рихтеровата скала по што следеа афтершокови.