Свет
Порака на Захарова до Западот: Имате вие свои пациенти
Портпаролката на руското Министерство за надворешни работи, Марија Захарова, ги коментираше барањата на западните земји да им се дозволи на лекарите пристап до Алексеј Навални.
Таа ги повика странските земји ваквите прашања да ги решаваат на нивна територија и го наведе примерот со основачот на Викиликс, Жулијан Асанж, кому му е потребна итна медицинска помош.
„Ги прочитав сите изјави за загриженоста на лидерите на западните земји и министрите за надворешни работи и официјални лица и гледам дека тука и таму има врска помеѓу сегашната ситуација на Алексеј Навални и она што тие го нарекуваат труење со хемиско оружје. Имам прашање: ако сте толку загрижени за неговата здравствена состојба и го доведувате во врска со наводно труење со хемиско оружје, ве молиме да и ги дадете на руската страна сите материјали за тоа што му се случило – медицински сертификати за анализа итн.Тоа сè уште не е сторено “, истакна Захарова за руските медиуми.
Во исто време, таа потсети дека има многу луѓе на територијата на земјите од „колективниот Запад кои не само што бараат, туку и гласно повикуваат дека им треба медицинска помош“.
„Има и луѓе кои не можат да викаат, како Асанж, а има и такви кои бараат помош од медицински установи преку адвокати, меѓу другото и преку европски структури. На нив тоа им е ускратено. Концентрирајте се на решавање на вашите внатрешни проблеми”, рече Захарова.
Претходно, ЕУ објави дека се загрижени за здравствената состојба на Навални. Соединетите Американски Држави го повторија повикот на независните лекари да добијат пристап до Навални, откако народниот правобранител Татјана Москаjкова рече дека четворица цивилни лекари го посетиле Навални и заклучиле дека неговото здравје не претставува сериозна грижа и дека на пациентот му е дадена потребната терапија.
Комисијата на лекарите на затворот, каде што ја издржува казната, пред два дена одлучи да го префрли во затворската болница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
11 канали на „Телеграм“ блокирани во Русија поради терористичка содржина
Руската агенција за следење на комуникациите „Роскомнадзор“ го ограничи пристапот до 11 канали на платформата „Телеграм“ поради терористичка содржина во последните два дена, објави агенцијата РИА.
„Од терористичкиот напад во концертната сала ‘Крокус сити хол’ спроведуваме насочен мониторинг. Ги бележиме фактите за намерното ширење разни невистини по терористичкиот напад – фалсификати и повици за екстремистички активности“, соопшти „Роскомнадзор“.
РИА наведува дека на барање на „Роскомнадзор“ биле отстранети околу 600 документи со терористичка содржина или има забранет пристап до нив.
Регион
Кризата во Бугарија продолжува: никој не може да формира влада, на повидок се нови избори
Претставниците на партијата „Има таков народ“ денеска на бугарскиот претседател Румен Радев му го вратија третиот и последен мандат за состав на влада со што се отвора патот за закажување на вонредна парламентарна избори.
Мандатот што и беше врачен на ИТН беше последна шанса за формирање на редовна влада во рамките на сегашното Народно собрание, јавува Бугарското радио. Претседателот Радев сега треба да го одреди датумот на предвремените избори за парламентот, откако неисполнети му беа вратени трите мандати за формирање влада.
На изборите во април минатата година, ГЕРБ освои 69 пратенички мандати, додека коалицијата предводена од партијата „Продолжуваме со промените“ освои 64 од вкупно 240 места во бугарскиот парламент, а нивните обиди за формирање влада претходно беа неуспешни.
Првиот мандат Радев и го довери на коалицијата ГЕРБ-СДС, но таа не формираше влада, мандатарката Марија Габриел се откажа и го врати мандатот.
Вториот мандат за состав на влада му беше доверен на Николај Денков.
Третиот мандат за состав на влада, според бугарскиот устав, претседателот го доверува на една од останатите парламентарни сили, по негова дискреција, во рок од 7 дена. Според уставот, доколку не се постигне договор за формирање влада, претседателот по консултација со пратеничките групи назначува преодна влада и распишува нови предвремени избори во рок од 2 месеци.
Регион
Атина во густ облак од прашина и песок од Сахара
Главниот град на Грција, Атина, се најде во облак од прашина и песок од пустината Сахара и Северна Африка, феномен кој е проследен со особено високи температури.
Воздухот во градот треба да се подобри од утре наутро, велат метеоролозите.
„Во пролет март-април, циклоните, кои се движат кон исток по северноафриканскиот брег, носат прашина кон источен Медитеран. Типична песочна бура со дострел од 200 километри носи од 20 до 30 милиони тони прашина, понекогаш и до 100 милиони“, објаснува директорот на Грчката метеоролошка служба, Теодорос Колидас.
Главниот град често се наоѓа на патот на тие песочни бури, но оваа година беше проследен со особено високи температури поради што е речиси невозможно да се дише.
Во центарот на Атина на 27 март беа забележани 25,3 Целзиусови степени, што е рекорд од март 2009 година, а на Крит температурите достигнаа и до 32 степена, истакнаа од Грчката метеоролошка служба.
Сојузот на пулмолозите на Грција препорача најранливите групи население, особено луѓето што страдаат од астма, да избегнуваат „непотребни движења и спортови на отворено кога концентрациите на прашина се највисоки“.
„Африканската прашина носи честички кои може да се интегрираат со полен, бактерии и габи создавајќи многу токсична и опасна смеса за човечкото тело, а особено за респираторниот систем“, предупредува Сојузот.