Свет
Поранешната принцеза на Катар пронајдена мртва
Поранешната принцеза од Катар е пронајдена мртва во својот дом во Марбела.
Касија Галанио (45) беше трета сопруга на милијардерот Абделазиз бин Калифа Ал Тани (73), вујко на сегашниот емир на Катар.
Касија тврдеше дека нејзиниот поранешен сопруг, поранешниот министер за нафта и финансии на Катар, кој беше најстар син на претходниот емир Калифа бин Ал Тани, сексуално злоупотребувал една од нивните три ќерки.
Тој ги негираше обвинувањата, пренесува „Дејли мејл“.
Галанио, која водеше раскошен начин на живот, одеше на забави на познати личности и присуствуваше на екстравагантната венчавка на Софија Вергара со Џо Манганиел во 2015 година, беше пронајдена мртва во неделата наутро во Шпанија по сомневање за предозирање со дрога.
Според Ле Парисен, шпанската полиција го пронашла нејзиното тело во кревет без знаци на физичко насилство.
Пронајдена е откако нејзината најмлада ќерка од Париз ја известила шпанската полиција дека со денови не може да стапи во контакт со мајка си.
„Ел Паис“ пренесува дека чуварот ѝ дозволил на полицијата да влезе во нејзиниот стан во неделата околу осум часот наутро.
Галанио неодамна помина неколку месеци во болница, а медиумите објавија дека доживеала нервен слом.
Поранешниот кралски пар веќе 15 години е сред жестока битка за старателство над децата.
Двојката има близнаци (17) кои првично живееле со својот татко, пред да решат да се преселат со мајка им во Марбела.
Тие имаат уште една ќерка, која има 15 години и сè уште живее со нејзиниот татко во луксузен стан во Париз, каде што тој беше протеран по државниот удар што го предводеше неговиот полубрат Хамад бин Калифа Ал Тани во 1995 година.
Галанио, која е по потекло од Полска, пораснала во Лос Анџелес и го запознала својот поранешен сопруг кога имала 19 години. Тие се венчаа во 2004 година.
Ќе биде извршена обдукција за да се утврди точната причина за смртта на поранешната принцеза од Катар, пренесуваат медиумите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Атина во густ облак од прашина и песок од Сахара
Главниот град на Грција, Атина, се најде во облак од прашина и песок од пустината Сахара и Северна Африка, феномен кој е проследен со особено високи температури.
Воздухот во градот треба да се подобри од утре наутро, велат метеоролозите.
„Во пролет март-април, циклоните, кои се движат кон исток по северноафриканскиот брег, носат прашина кон источен Медитеран. Типична песочна бура со дострел од 200 километри носи од 20 до 30 милиони тони прашина, понекогаш и до 100 милиони“, објаснува директорот на Грчката метеоролошка служба, Теодорос Колидас.
Главниот град често се наоѓа на патот на тие песочни бури, но оваа година беше проследен со особено високи температури поради што е речиси невозможно да се дише.
Во центарот на Атина на 27 март беа забележани 25,3 Целзиусови степени, што е рекорд од март 2009 година, а на Крит температурите достигнаа и до 32 степена, истакнаа од Грчката метеоролошка служба.
Сојузот на пулмолозите на Грција препорача најранливите групи население, особено луѓето што страдаат од астма, да избегнуваат „непотребни движења и спортови на отворено кога концентрациите на прашина се највисоки“.
„Африканската прашина носи честички кои може да се интегрираат со полен, бактерии и габи создавајќи многу токсична и опасна смеса за човечкото тело, а особено за респираторниот систем“, предупредува Сојузот.
Свет
Апсења во Пакистан по снимка во која брат ја убива сестрата, таткото гледал сè
Пакистанската полиција уапси татко и брат откога видеото од провинцијата Пенџаб, на кое брат ја дави својата сестра додека таткото гледа, стана вирална, соопштија официјални лица.
Настанот предизвика шок и бес во нацијата, која се бори со бранот насилство врз жените. 22-годишна девојка била убиена од својот брат додека таткото гледал, а непознато трето лице го снимило злосторството, изјави за ДПА претставникот на локалната полиција, Рана Акмал.
Инцидентот се случил во градот Тоба Тек Синг минатата недела. Семејството ја закопало жената тврдејќи дека умрела од колера.
И таткото и братот ѝ кажале на полицијата дека со години ја силувале жената и ја убиле за да го скријат своето злосторство, изјави полицискиот службеник Мохамед Имран.
Се спроведуваат рации за апсење на лицето, кое наводно го снимило злосторството.
Регион
Родителите на двегодишната Данка во полиција во Бор: мајката одбила полиграф
Родителите на исчезнатата двегодишна Данка Илиќ се донесени во полициската станица во Бор, објави „Телеграф.рс“.
Тие не се осомничени, но со нив се врши информативен разговор.
Ивана и Милош вчера дадоа исказ во присуство на Центарот за социјална работа.
Како што објави српски „Телеграф“, мајката го одбила полиграфскиот тест бидејќи е бремена.
„Девојчето Данка Илиќ сè уште не е пронајдено. Апелираме до сите луѓе да не објавуваат информации што не се проверени. Со тоа се нарушува и се загрозува истрагата, во која е инволвиран и Одделот за криминалистичка полиција“, изјавиле за „Телеграф.рс“ од српската полиција.