Свет
Првиот астронаут од ОАЕ ќе следи строг исламски водич за молитва во вселената
Првиот астронаут од Обединетите Арапски Емирати (ОАЕ) ќе биде лансиран во вселената со пакет строги исламски насоки кои му кажуваат како да ја практикува својата религија на Меѓународната вселенска станица (МВС), пренесува „Галф њуз“.
Како муслиман, Хаза ал Мансури треба да се моли пет пати на ден, но прашање е како би го сторил тоа поради временските и просторните ограничувања. Хаза ќе ја обиколува Земјата на секои 90 минути, што значи дека ќе биде сведок на 16 зајдисонца и изгрејсонца на ден.
Од посветените муслимани се очекува да се молат и да постат според времето од денот, без разлика каде се наоѓаат.
„Како професионален пилот, се навикнав да се молам додека летам со голема брзина. Секако во вселената ќе биде малку поинаку. Планирам да снимам молитва додека слегувам на Земјата“, одговори Хаза на прес-конференцијата во „Бајконур“.
А како ќе ги исполни своите верски обврски додека е на бродот на МВС? Исламските религиски власти во Дубаи ја решија оваа дилема за Хаза со молитвена брошура и му препорачаа да се раководи според времето на Мека во Саудиска Арабија.
Претходниот астронаут муслиман, малезискиот шеик Музафер Шукор, беше советуван да се раководи според времето во Казахстан, каде што се спушти неговата ракета.
„Но, Мека, како најсвет град во исламот, има предност бидејќи нема смисла да се следи времето на земјата на лансирање“, се вели во брошурата на ОАЕ.
Тие го советувале Хаза да се врти кон Земјата додека се моли ако е тоа можно. Властите во Дубаи велат дека Хаза исто така треба максимално да се потруди да го испочитува ритуалот на миење пред молитва, но ако водата не му е достапна, тогаш би можел да користи камен или зрно песок.
Хаза треба да се врати на Земјата на 3 октомври заедно со Ник Хејг од НАСА и со рускиот космонаут Алексеј Овчинин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД: Ќе го блокираме полноправното членство на Палестина во ОН, тие треба да преговараат со Израел
САД ќе гласаат против палестинската кандидатура за полноправно членство во Обединетите нации и ќе ја блокираат светската организација да признае палестинска држава.
„САД продолжуваат да тврдат дека најбрзиот пат до државност за палестинскиот народ е преку директни преговори со Израел и палестинската управа со поддршка на САД и други партнери“, рече американскиот претставник.
Планирано е 15-члениот совет да гласа за нацрт-резолуцијата со која се препорачува на Генералното собрание на ОН од 193 држави „Државата Палестина да биде примена во членство во ОН“.
За да усвои резолуцијата, потребни се најмалку девет гласа и никакво вето од САД, Велика Британија, Франција, Русија или Кина. Дипломатите проценуваат дека резолуцијата би можела да собере 13 гласа, што би ги принудило САД да стават вето.
„Одамна јасно ставивме до знаење дека предвремените акции во Њујорк, дури и ако се во најдобар интерес, нема да резултираат со државност за палестинскиот народ“, рече американскиот функционер. Палестинците во моментов имаат статус на набљудувач не-членка, што е де факто признавање на државноста доделена од Генералното собрание на ОН во 2012 година.
Меѓутоа, барањето за полноправно членство мора да биде одобрено од Советот за безбедност, а потоа од најмалку две третини од членовите на Генералното собрание. Засилените напори на Палестина за полноправно членство дојдоа шест месеци по масакрот на Хамас во јужен Израел и војната во Појасот Газа по започнувањето на израелската офанзива и проширувањето на еврејските населби на Западниот Брег.
Генералниот секретар на ОН, Антонио Гутереш, смета дека „повеќе од кога било, неопходно е да се поддржат напорите со добра волја за воспоставување траен мир меѓу Израел и независна, одржлива и суверена палестинска држава“.
Регион
Земјотрес во Србија
Земјотрес со јачина од 2,7 степени според Рихтеровата скала го погоди Чачак.
Според ЕМСЦ, епицентарот бил два километри северно од Чачак и 47 километри западно-северозападно од Крагуевац.
Земјотресот се случил на длабочина од осум километри.
Европа
Уапсен Полјак: „Планирал убиство на Зеленски“
Маж од Полска е уапсен под обвинение дека бил подготвен да шпионира за руското воено разузнавање и да и помогне да го испланира убиството на украинскиот претседател Володимир Зеленски, соопштија полските обвинители, а пренесе Асошиетед прес.
Полското национално обвинителство соопшти дека мажот, идентификуван само како Павел К., бил обвинет дека сакал да ги пренесе безбедносните информации на аеродромот на руски агенти и бил уапсен вчера во Полска.
Човекот побарал контакт со Руси директно вклучени во војната во Украина и се очекувало да пренесе детални информации за аеродромот Жешов-Јасионка во југоисточна Полска, во близина на границата со Украина, кој е портата за меѓународни воени и хуманитарни снабдувања за Украина. Аеродромот е под контрола на американски војници.
Доколку биде прогласен за виновен, тој може да добие и до осум години затвор, се вели во соопштението за печатот.
Обвинителите рекоа дека апсењето е резултат на блиска соработка со обвинителите и безбедносните служби на Украина, кои обезбедија клучни докази. Членката на ЕУ, Полска е цврст поддржувач на соседна Украина и Зеленски во одбрана од руската агресија повеќе од две години.